Canon EOS RP

評測報告

2013年Sony出了A7，Full Frame, Palm size，自此再無4xx gm的機身，而且Sony沒有反mon。
平，Canon機平，鏡平。要平有24-105 STM，Sony只有28-70，無24mm，無70-105。比較24-105 f4，Sony貴幾多千呀? 鏡頭質素不比L鏡好。再買多枝長鏡，100-400，Sony枝鏡贏唔到大白2，但係貴幾千。幾千幾千加埋，對不起A7 III貴過Canon好x多。唔好同我講平。
鏡頭選擇? Sony由2013年出A7開始，至今1枝1.2鏡都無，仲要Canon準備出第2枝。仲要唔好提，Canon有28-70 f2.0

Dynamic Range唔夠Sony 來? 對，如果你執相，又要under硬推，是Sony較好。如果你是一位爸爸或媽媽，影完相無時間執，唔好意思，Canon肉色仲要靚d。
A7 III有4K oversampling，FF視角，Sony 勝。

一部A7 III平，是平得有原因，你當Sony是傻的嗎? 真的賣大包比你?
Canon機身，CMOS係無A7 III咁好。但睇定價，到2019年尾，應該RP + 24-105 STM，成套唔駛1萬蚊。留意，係新款機，唔係慢同舊既A7 II。
整套去睇，RP唔係我杯茶，但Canon，方向正確，絕對值得留意，值得期望。
難得市場終於有返一部4xx gm既FF相機

1.應該比Sony A7系列耐用,A7用得一年半載D掣就會甩甩地.
2.介面無A7系列咁反人類.
3.個芒一定靚過A7iii,全完反芒只此一部.
4.出來溝女,一個字"靚仔"
5.應該幾好渣手.
6.聽聞個Touch芒幾好用
7.Canon玩法係直出JPG,靠佢影RAW尤其是係6DII塊爛鬼CMOS晒氣喇!!
8.Canon的底氣就係佢GA色水,連呢一點都保唔住既話,間廠可以摺架喇!!
9.Canon出機係擺到明嘔人血架喇, 但D鏡頭就好爭氣,同一間廠兩種工作態度,為左C記鏡頭部門班人,應該入部RP鼓勵下佢地!!

留意番丫,11800HKD呢個初始價其實一D都唔平.
以現役機來講,呢部RIP同價既對手係A7Rii仲要平500舊水,比一比吧.
買機從來都唔係睇佢優點,只係睇佢GA缺點你頂唔頂得順.
1.畫質同寬容度絕對係A7Rii大勝九條街,11300買部Rii己經可以係一部好好用GA風景機同Studio機;EOS 6Dii面世己來, 有幾多人因為D爛鬼RAW入到Light Room拉都無得拉,DR低到懷疑人生,放機都放唔切!!
2.電池同A7Rii比應該都係鬥屎,準備成副麻雀出街吧!!
3.一樣無Joystick.
4.一樣無雙卡.

定位一樣都係入門而言,11800你比多千二蚊就可以買到A7iii馬上又係另一個世界.
1.無joystick的相機就好似渣車無軚胎一樣A73有
2.無雙卡個心唔安隱A73有
3.粒電理論值得250張,A73狂啪700-800張都無問題,A73去旅行成個星期唔法換電.
4.望住A73近乎變態GA對焦系統你會心理唔平衡
5.望住A73強大GA拍片能力而且又無1.7X Corpo你會心理唔平衡
6.有幾個錢係身都好,想直插唔用接環都要有D耐性等下.
7.又話FF出D RAW好好執咩?呢部RIP的DR係FF機中數一數二的(尾數上來)
8.ISO一定無A73好
9.今時今日,DC Fever 仲要放水用部RP同四年前部A7ii比,以免輸得太難睇.
10.成日疑神疑鬼Canon古古怪怪,D牙膏擠極都擠唔出.
.
.
.
XX...................................就係差戈千二蚊,慳來都唔夠睇醫生.

Canon出機而家係無得同Sony鬥架喇,Sony是但出部萬三蚊A7iii都可以當A9咁用;
Nikon唔好話消費傻瓜機,而家連入門APS單反都無產線得閒出,專心做高階.
Canon 好明顯係睇準S家N家都主攻高階...........咁佢填返低階呢個空位都係好正常,被人鬧就鬧硬架喇,但一定比重蹈Nikon覆轍,守唔住低階,無左市佔咁高階幾勁都係做二奶.
而家佢岩岩出賣11800HKD, 不過有幾多斤两收幾多錢, 佢好快就9800,8800咁跌架喇, 期間仲會有大把唔做足功課, 受佳能名氣同外表幪騙GA少年或新仔落疉的...............呢個先係佳能最終目標,所以被人鬧都係一個過程來架姐!!
其實都唔係一味黑Canon既,我都好持平咁列左佢9個優點出來丫!!

樓下條【挑機】果然挑機，雖然你評論好長氣，但無可否認都好有道理。但我未 click 入睇內容時，都估到你機身根本都未到手! 就算你上 showroom 逗留足一日，都唔係長時間俾你玩，但你已經講到好似用咗一段時間，真係好有作家潛質!

樓下條【挑機】電池續航力冇提

無論你寫到幾咁公平公正、幾有道理幾咁圓滑都好，你始終未拎到機身在手，講乜都冇用! 俾你拎到機之後，相信補評測都係水蛇春咁長，口水多過浪花，離離去去都係差唔多意思，只係俾你發揮長氣、榕樹頭講古佬潛質。

結論：如果你拎左機身，我會90%以上支持相信你，弊在次次有新產品，總有你呢類蒙混過關人士出現，但睇日期又未有真機在手時，任你吹到上天都冇用，反而令我對你好唔支持及信任。

-輕(雖然未算最輕-A7第一代最輕)
-細(雖然未算最細)
-平(以定價計, $10880, 肯定當今最平)
-2600萬像素剛剛好, 對得住呢個價.
-配支35/1.8好sharp, 散景十分淺.
-色系好(我玩過Canon, Nikon, Sony, 因為色系, 所以最後選擇Canon, 本人影人像為主)
部機拍片好方便, 主力用來拍片
-有touch mon
-有扭mon, 扭到可以自拍, 冇一個品牌既FullFrame mirrorless 做到(佢地連自拍都唔做, 留個咁大既漏洞, 咁就比canon切入左) . 扭mon好處是靈活, 打橫打直部機都可以做高炒/低炒/自拍.
-4779個對焦區(不是4779個對焦點, 因為DuelPixelCmos, 就是2千6百萬個對焦點, 呢樣野冚世界寫錯)
-快門聲好輕微，震動好輕微，什至比我用過的APS-C機m50仲細聲。震動越輕微對拍照影響越少。
-三個轉盤調參數，機身兩個，鏡頭一個，可以自訂功能，我set左分別控制光圈/快門/曝光補償。
-新Fv mode，覺得好好用，再多手動參數，兩個轉盤控制到。
-有mic插頭同時有耳機插頭，部機可以一邊錄影錄音，一邊即時聽返收音收成點。呢一點對專業拍片者好重要。而且呢個功能係m50未有，而RP 有了。
-續航能力不差，我試過充滿電可拍接近400張相片（下面我會詳細講）

-呢個價位, 就算再多缺點, 都已經唔係缺點. 現在只是按建議零售價去想, 但遲下跌到一萬以下, 更吸引.
-沒有GPS, 如果呢部係公認既6D-R版, 應該要有GPS.
-人像模式當中cut 走了美肌功能，明白是入門機定位如m100/m50先需要有，但冇都有少少唔方便。m50美肌功能做得都幾自然，適合相機直出JPG
-以前m50有一個wifi制一按直接開wifi，就過相，RP沒有，要入menu開wifi

我上過ShowRoom玩過真機, 我2月22日訂貨，仲訂左Body+RF 35/1.8, 2月27日急不及待取機。

真正的續航能力，官方數字是250張，是根據CIPA標準測試，方法如下：
"开启电源30秒后，先进行首次拍摄，然后在这30秒的等待期间(即进行下一次拍摄的间隔)进行一次全闪光和一次不闪光，以及从远摄端变焦到广角端，并从广角端变焦到远摄端。随后，继续每30秒拍摄一次，每完成10张相片将电源关掉再次开机。测试直至电源完全耗尽为止。"

以上測試方法明顯是不實用的方法，當中很多的等待時間，加上每張要zoom in zoom out，如果EosRP實戰上，不用拍每張相片都等待那麼久，而35mm鏡頭是沒有zoom的。
所以基於這樣，我自己試過充滿一粒電，分開5日用，分別拍了17/15/53/22/285張相片（當中6條是短片），我試用期間是平均每拍十幾張就查看照片一次，以及每天都用wifi過相到手機一次，用screen 影相（不是用evf），這樣的測試下充滿電實際能拍到相片＋影片合共數目是392。
但我買的套裝送多粒原廠電，張數增加一倍，再者如果大家覺得這張數仍然不夠，很簡單，EosRP有扭MON ，大可以把扭MON揭出來反轉級返落去，只用EVF拍照，必定更省電。

~~~呢個世界冇最好既相機, 只有最適合自己既相機. ~~~ 例如你比個唔識相機既人一部EOS1DX2, 佢可能覺得EOS1DX2唔夠手機好用. 因為EOS1DX2中的90%功能佢用唔著.
同一個道理套用係所有人身上都合適.

有人話:
有人話EosRP冇機身5軸防震, 所以部機好差, 雖然R鏡大部份有5級防震, 但當玩舊鏡就冇防震啦...我會問: 舊鏡來自上世紀菲林機, 你當年玩菲林機有防震嗎? 你舊鏡是日日用定係間唔中玩下?
所以冇必要花2萬以上買一自己唔常既功能.

有人話EosRP追焦連拍只有4張, 不夠用... 我會問: 唔夠邊個用先? 所有買FullFrame機既人都係職業球賽運動攝影師? 都係成日打雀? 如果以一部無反日常生活街拍/去旅行使用, 連拍呢個功能應該一年用唔到幾次. (我玩左十年相機, 我有過7D2, 起碼我自己係咁)
所以冇必要花2萬以上買一個連拍數字

有人話EosRP關機冇落快門簾...我會話: Sony / Nikon 都冇啦, 你又去買?

有人話EosRP的ISO唔夠sony A73高...我會話: 比個二十萬ISO你, 有冇回憶過你用過幾多次(除左剛買返來試機咁推高之外?) 部機ISO有二十萬都好, 一般你推到6400都唔會再推上去.
所以冇必要花2萬以上買一個ISO數字

有人話EosRP拍4k要CROP... 我會建議, 你買一支EF 10-18mm 拍4K時x1.7有17mm, 仲唔夠wide? 我建議你地咁做, 但我唔會, 因為我拍片用全高清; 我手機有得拍4K, 我唔拍4K, 我拍全高清; 我部航拍機有得拍4K, 我唔拍4K, 我拍全高清; 我隻gopro hero7有4k, 但我用來拍2k片；我唔想用咁多儲存容量去製片.
4K對我來說真是少用.

又有人話eosRP冇joystick，用evf 時要移動對焦點不方便...我會答，佢有drag to focus 功能，眼睛對準evf時，左手指可以當個mon是mouse pad咁移動對焦點，用過你就知，方便過joystick。人地又會話，冇joystick 睇相唔方便... 我就話touchscreen睇相最方便，touchscreen做setting最方便。你部智能手機機面咪又係一個制都冇，你今時今日用你部手機多過用你屋K部電腦了。

~~~呢個世界冇最好既相機, 只有最適合自己既相機.~~~
EosRP最吸引是操作容易, 有扭mon, 做到高/低炒/自拍, 最適合是用來拍片.
睇過有人寫過: 如你要平平地買部機只係影相, 買RP啦, 但你要拍片, 要選擇SonyA7III啦... 我就話, 我買RP就是用來拍片, 我不太大需求4K, 我要的是靈活的反mon去幫助我多角度去拍片, 可以做出好多不可思議的角度去錄製短片, 加上touch screen, 對焦得心應手
加上DuelPixelCmos對拍片幫助好大(如果單拍照分別沒太明顯, 0.05秒對焦同 0.04秒對焦, 你分到嗎? 但拍片追焦果種反應就不同了).

我之前講過EFM 22/2.0是全世界最好的APSC鏡頭:
https://www.dcfever.com/lens/readreviews.php?id=702
現在可以用FullFrame RF 35/1.8來取代我支EFM 22/2.0 (22mm x 1.6=35.2mm 焦距相同), 片幅升級了, 光圈升級了.

EosRP, 其實睇成為m50加強版，會代替我的M50, 成為我的每日旁身機, 加上35/1.8好輕, 天作之合, 好輕, 影人, 影景, 低光, 微距, 什麼都可以... 機+鏡=7百幾克重量.

佢個touchscreen超好用，我昨晚同朋友酒樓食飯，臨走時來一個大合照，要比部eosRP 酒樓呀姐幫我地影相。以往經驗，酒樓呀姐唔識半按快門對焦拍攝，佢地一野按落去快門制，所以以前要影相之前花時間教佢地用部相機，教完都未必識用。
但今次我enabled 左個touch-shoot功能，叫呀姐篤一篤個mon 立刻影到。可想而知係幾咁易用，連呀姐都秒懂。

我亦試過放用eosRP 放上我個三軸云台，操作上沒問題，因為實際上只比m50重少少，所以三軸云台可以承受到，拍到好流暢的短片（型號：feiyi crane-m）。

如果一部相機買返來, 但好少用, 我覺得即使買左, 都唔算真正屬於自己.
如果部機太大太重, 買佢返來只有weekend先帶出街拍野, 整下整下嚴太重, 不如放係屋K先, 去旅行先帶去用啦, 到左去旅行時, 覺得自己帶左咁多行理, 部相機太重, 都係不如唔好帶啦, 去旅行用手機咪得law.
相反，EosRP+35/1.8可以跟出跟入日日帶出街，日日都用得著, 感覺上部機先係屬於自己既.

R系統既鏡頭發展得很快, 今年出多6支, 支支都咁堅, 唔會膽心冇鏡用, 加上EF鏡, 可用鏡頭大大話話幾十支, 所以選擇一個品牌, 未必需要起勢咁追佢既黑科技, 反而睇下部機既配套/鏡群, 以及該系列發展空間.

~~~呢個世界冇最好既相機, 只有最適合自己既相機.~~~(好重要, 要講三次)
EosRP, 係一部平到你買左永遠唔會後悔既相機.

{另外，有什麼意見可以PM說，心得區不是出心得來反對別人而引起罵戰的地方。

我這個心得自己反覆修改了很多次，我心得出了後有不少人出心得反對，我查看某某人心得記錄，原來佢一直以來出既心得全部用來插別人心得，沒有一個屬於自己見解既心得。
所以本內容一加再加，用來滿足反對者的論點(以及間接指出他們的錯處)。今年年頭打手特別多。｝