優點:
1. 影相像素僅次於A7RIV兼可1秒連拍30張(五千萬像素)
2. 攝影推上8K(僅支援25格及4:2:0 bit)
3. 機頂右邊多咗似A9嘅快速設定轉鈕
4. 可以關機時落低快門簾,換鏡頭有防塵作用,不怕CMOS直接露出來
5. 追焦快,對焦點多
6. 估唔到ISO去到6400比起A7SIII抗燥更佳
缺點:
1. 貴囉,其他唔講啦,你其他SPEC都贏哂其他機咁滯
* 拍片盡量用8K,因為4K表現反而冇A7SIII咁好,另外唔似傳聞咁唔怕熱
評價:
貴囉,冇嘢㗎,買機送技術嘛,早買早享受囉。不過我覺得行內人反而未必會買,業餘攝影愛好者又想威威,入手後應好有滿足感,因為真係好爽快,無論你點按快門都捕捉到啲嘢睇吓,當然鏡頭亦好緊要。
見A7RIV出咗A,本身想賣咗部舊嘅A7III換一部影相像素高啲嘅機兼顧影相,點知比A1毒咗,銀包在淌血,之後不斷諗「真係有需要嗎?」可惜呢個世界冇後悔藥,唔係話部機唔好,8K拍片喺Macbook Pro度preview幾順,影相放大剪裁幅度較大都可以用,但其他功能又唔覺同A7SIII有咩分別,有啲仲未必用得著,試過影動物同雀眼球對焦又唔覺人哋講到咁出色。
今次SONY失驚無神推出呢部旗艦機,野心真係好大,想影相同錄影都想兩全其美。講真,一部機真係頂得你一部A7SIII同A7RIV,加上今時今日拍片嘅人起碼都要有兩部機喺手,點㨂真係自己諗。
優缺點只列個人喜好嘅個人意見,至於反唔反MON其實睇你需求,除非成日自拍,否則我覺得A1個傳統MON我覺得幾好嘅。另外,如果定價降返三分一應該合理啲,但就係因為咁貴先顯得有身價嘛,家陣仲周圍缺貨,吹佢唔漲!