Honda Freed

Easy to drive & manage. Low Fuel consumption for Highway-18KM/L.
Last row seats is good enough space for 2 adults but no air cond for last row.

1.）細7中馬力扭力足夠冇投訴。初頭市區7成用數用慳油模式，一家大細慢慢揸沒有問題，發現比用D波慳油10-15%約10-11km/L，但去到高速公路或自己一個人在市區奔馳，我就轉用S波，起動反應快，即刻有心有力（不是有推背感），只是小路出大路和Cut線比較安全，但好耗油反而最慳油約11-12km/L。這種動力是這部1500cc細7車仔嚟講算唔錯了，的確是最大賣點。
2.）算低油耗，但平均油耗都係10Km/L，可能我態度唔好，吓吓踩住去，5人車始終仲低油耗，始終大部了（講廢話），但有師兄話做到油耗13-15km/L，小弟佩服佩服，唔知道你吹水還是我無能，不過我明白，部部車都係吹架啦！
3.）三排空間和同等對手中最好，人齊朋友反而鍾意坐最後排，兩個人坐後排空間和自由道比坐中排三個更加舒服。
4.）揸開5人車，換了大一個碼Freed，仍然輕鬆駕馭。
5.）雙電趟門安全又方便，在窄小的香港停車場，一家大細兼且扶老攜幼一齊落車，安全度勝過車內1000個氣袋，你是使用者就會感受到，還有泊車L周街都係，我可以行去第二排趟門一齊落車，即時泊車無障礙。
6.）斜坡發進輔助系統是非常實用。
7.）後視泊車鏡頭視線好廣闊清楚。
8.）座椅坐高了視線都廣闊了，感覺一清二楚睇位都安全左。
9.）大燈有auto自動感應好實用，我這些大頭蝦，夜晚唔開燈，鎖車冇熄燈，現在轉個auto後開關都已經唔關我事了，好似忘記了要這個每晚的動作了。

1.）油缸只有36L，入油站密左，本人一星期一次，每次都入到彈槍。
2.）控制雙電趟門的開關位置唔就手及偏低，每次都要左望友望先搵到，唔就手又不視線範圍。
3.）後牌照妖鏡睇得唔清楚，只望到一團野係後排。
4.）兩側鏡泊車後不會自動收接，會自動就好。
5.）車頭兩側沒有sensor，只有車尾有。
6.）踩大油門引擎起動轉數高始終比較嘈。
7.）中和後排沒有冷氣出風口。
8.）中後排或尾門位多幾個USB就Perfect了。
9.) apple carplay 垃圾導航。

寶寶出世了自己係時候要換車，周圍睇車試車，睇到自己就1516，朋友歐洲工作個多月，借來細7玩吓體驗吓，OK喎！搞到我都想分享下。
咁細嘅空間可以放至七個人的設計其實已經好滿足，車箱內的設計和用料是舒服及高貴的，約25萬的價格，好難想像你會買同級的另外一些牌子，唔想踩低人抬高自己，只是有些牌子換湯唔換藥，還周街都見到佢的新影，但新freed推出後，我覺得用家一定會識得選擇，而新freed在同級的這款車中，舊的設計已經非常完美，現在新款還提升了空間、車箱用料和安全，最大最大最大問題就是這種車的馬力，上一代是緊緊好，爬頭起圍和人多上山有事會感覺力不從心，但這話一代真的針對性客戶的需要，提升了馬力和扭力還要兼容慳油。有人話約25萬好貴就見仁見智，亦有一些評論話新Freed的外型一成不變，買了新freed會俾人誤會買來的車是舊款車，上一代設計好就根本冇需要大變革，你有冇見過寶馬3或5系和Audi A4和A5會大變革或停產，唔知道佢係照抄人文章，還是收了人家的錢寫衰這部車，本人建議大家要親自落去showroom 感受下對比下及試吓車。

細細架以7人車黎講香港地搵S搵都易入D, 主要4人屋家庭平時普通當5人車用好方便, 仲有位擺貨, 間中都可以車埋父母岩岩好
1.5黎講都好力,又慳油D

始終細7人,最後兩位真心難坐...比細路後生坐無問題, 坐得耐都會辛苦
坐晒人尾箱放唔到乜

岩一大"細"用

個人感覺外表靚仔斯文。

新色Blue Horizon Metallic 好靚，有人叫湖水藍，有人叫叮噹藍。（一定要睇真車，感覺好唔同。）

車頭電子螢幕儀表板設計進步了，深灰色控制台感覺優雅有時尚感。

3排都「真。坐到人」。

雙電趟門低地台方便。

車身高度低過1.8米，搵停車場容易。

7人車嚟講算慳油（好視乎自己的駕駛方法）

最後第三排坐兩個其實非常闊落，當然不是講腳位，細車仔坐7個人，腳位都算非常理想的。

只有Apple CarPlay 沒有Google 使用，還要加$1000-（當然買車時要屈佢送俾你）

尾排座椅向上摺疊，比較out的設計及摺疊坐椅上落比較辛苦，可能車子太細，賣點是低地台，所以犧牲了放落地台的方便性。

接近25萬沒有霧燈及天窗，第二三排沒有冷氣機出風口和沒有USB。

中排坐三個大人，中排的三點式安全帶真的會騷擾到隔離的大人剩客，所以一係放BB Car Seat， 一係直情中排坐兩個算數。

中排座椅感覺其實有啲偏低，如果高大或想坐沙發的感覺就要諗清楚，當然不是那麼惡劣，只是坐開私家車就會有比較，可能佢為了遷就中排摺疊設計的需要，但太上皇和皇后身高只有164以下，對我們來講沒有什麼差別。

唔認識汽車引擎的構造，沒有長時間試過其他牌子汽車的經驗，本人講唔出馬力和扭力的問題和差別，現在只會講一個消費者對產品設計和實用性的訴求。

人生第一部車，需要一步到位，價錢亦都要再接受範圍，又要舒適又要安全，平時坐3個大人一個太子大人，間唔中做下貨車、又要坐吓6個人甚至合法性坐7個，這款偽七人車小車非常適合我的口味！當然市場有好多種選擇，到最後我們篩選了這三台最平入場費的偽七人車！（BMW 218d 柴油，可惜太貴！）

人生交叉點！
Toyota Sienta （用S代表）vs
Honda Freed （用F代表）vs
Volkswagen Touran（用T代表）

到最後精挑細選加性價比加個人感受和老婆大人的恩賜，選擇了All New Freed。

講真車相設計各有千秋
S 和 T 尾排座椅可以收納在中排車底和尾排車底，但前者比較繁複，中排人客要落車，再揭起中排座椅，後排收納在中排車底，如果有BB Car Seat 更加麻煩，中排放吓又有機會夾腳，感覺好唔安全，買得七人車，公主與太子少不了，設計概念是理想的，可惜現實使用上真的不方便，而後者T後排座椅非常唔人道，只可以臨時性質或細路仔使用，講真太子和公主點敢放喺最後排。

車廂用料及氛圍，馬力和扭力，T歐洲車一分錢一分貨，S就太膠了。（講真日本引擎技術落後於歐洲多年，但在香港維修保養費用和服務上就應該日本車最平和服務應該最好。）Volkswagen Touran一聽到每年的維修費，我已經死心了。

S和F沒有天窗，T又大又靚，S和F點解.....！問代理回覆安全性問題，日本已經沒有出天窗，因為車架會比較堅固及安全。（如果唔介意天窗，信吓佢囉，講真我就非常介意！）

長期坐六至七個人，我就唔建議你買這部車，講真我就冇試晒咁多部車，但始終首要條件都係睇住個銀包，又冇錢又要李嘉欣，本人完全明白這道理，買之前都睇咗好多文章、好多口水佬、好多討論區的心得，最後當然親身感受了，最後的選擇了性價比最高的Honda Freed了，買車好主觀，這只是我的感受，好似有人話Sienta 設計好靚好突破性，但本人感覺好像蘇媚，不可以講樣衰，但自己感覺唔鍾意囉，Freed有人話佢設計好保守，沒有變化，但我望落去就好舒服及實際，可能我是年輕爸爸守舊派。

買新車最大的優點是選擇喜愛的顏色，Freed 已經推出了八年，現代引擎技術和車箱上的設計一日千里，2016年尾又出了新款，現在還買舊款車，揸多兩年，就已經過十個年頭的設計和科技了，現在科技產品的周期性非常短，再轉手還有競爭力嗎？還有買得Freed的朋友多數都是有小朋友而買的，我睇過的座椅多數是用布料，本人不太喜歡，而皮椅又多龜裂痕跡，車箱感覺比較邋遢，還有3年車都唔平，所以最後決定買了新車，始終買二手車要好講運氣，對我們這些不認識車的人非常困擾，維修加換零件，再驗吓車，加加埋埋又係一條大數目，車價話平唔平話貴唔貴，買到心驚膽跳何苦呢！還有新款車設計真的方便了許多細微地方，這些不想重複再講，自己睇吓YouTube評語好過。又有Apple CarPlay玩，買二手都可以安裝，但又係要加錢，所以一步到位是最有性價比的。

揸了一段時間油耗（市區8成），約10-11/km油耗上落，慳唔慳油就自己判斷。

Apple CarPlay導航現在非常不成熟，用過幾次後放棄了。
Siri如果用車機支咪收音，回應完全唔準確，講幾次都聽錯或錯漏。
Spotify 聽歌是幾好的，$4.9-試聽三個月後每個月要$58-太太太貴了。
其他Function都沒有用了，好彩最基本打電話是沒有問題????，iPhone電話簿聯絡人資料全部一清二楚，是唯一可讚賞的。
希望下次Apple更新資料會有改善。

馬力方面本人是初哥都覺得好普通，因為平時揸開姐夫的BMW188i，所以差距有點大，及到現在都未試過坐七個大人，最多都係五個大人＋1個細路仔，但上山及起步感覺馬力是足夠使用的，家庭車算好合格了，當然人多D波大油加速引擎聲會比較大，但都是接受範圍，我到現在都未發現部車唔夠力要推上S波。


大家唔啱聽唔好鬧，小弟只是一名孤寒鬼用家，下下都講性價比。
分享下自己的感受。謝謝！