先從外觀上講一下， E90呢一代三系列我認為設計上相當美觀，外表上甚具玩味。流線但係少許兇悍嘅車頭設計，全車四處可見嘅肌肉線條，都塑造出3系列卓越嘅運動氣息。但其實同時間佢無將一輛歐美高級房車應有嘅穩重與質感減少。所以就算完全沒有任何改裝底下，外型仍然唔會睇得厭倦。
323i係引擎發動時嘅聲浪與音噪微乎其微，如果你無觸發到油門，其實並唔容易發現正處於運轉狀態，但當你輕微咁踩油門，你會發現佢等待緊你去探索佢。慢慢開始運作轉動並隨著轉速攀高，逐漸尖銳的高頻聲浪開始爆出。動力源源不絕，可謂十分有趣的直六引擎。而且係sports mode 嘅時候，動力可以話係十分滿意，源源不絕咁谷出黎，油門反應敏感好多，會更多數處於高轉區間3500 - 4500左右，聲浪相當好聽。隨傳隨到嘅感受，而且一點都無力不從心。但當然你唔可以當佢係一部跑車，但房車黎講呢一組接近180匹馬力嘅直六都已經可以話十分稱職。
操控方面，始終323I都係一部後輪驅動嘅車種，佢係過彎上面嘅操控同埋玩味都相當之滿意，相當之紮實嘅感覺，即使係高速過彎都唔會有控制唔到嘅情況，可以話係相當之靈活尤其係佢俾你一種可以相信佢全速前進嘅感覺，十分之穩定，係操控上面我都覺得十分之滿意。
如果你問我嘅話我會覺得內籠方面係最大嘅敗筆啦，其中一個原因係因為中控台成個都好有塑膠嘅味道，唔會特別覺得做功紮實同埋吸引，而且顏色配搭方面亦都唔係話十分之靚同美觀。最後就係內籠入面好多設備容易壞亦都好多野會甩出黎，我覺得內裝方面係最大嘅可改善空間。
講到改裝同埋個人化方面呢，咁其實呢一部車個玩味同埋可以改裝嘅空間都相當之大，無論係頭唇、包圍、裙腳、尾翼前後燈、以至於引擎內部嘅改裝，嗰個可以改動嘅地方同埋可以提供俾你更換嘅產品亦都相當之多，呢一方面我覺得e90係做得相當之好，而且呢部車顏色上大部份都襯得相當之好睇，無論係原裝嘅深灰色定還是翻噴嚟做藍色都好好睇。
總括而言我認為呢部車係相當之值得擁有，而323i可以話係一部同時可以做家庭車又可以有少少玩味咁擁有，我十分之推薦一部車，而我諗呢一部車永遠係我心入面都有個重要嘅地位。
