20 May 2019
話說呢張相事緣WhatsApp群組,有位師兄send出左天文台閃電預告嘅一張相,方向喺大埔嘅西北面,好似會吹過嚟。
當知道呢個消息後,於是咋咋淋柯埋篤屎出發。筆者從屋企去回歸塔只需要5~7分鐘步距,可以話係非常方便。22:11分我開始步入大埔海濱公園噴水池位置,當行多幾步之後大風大雨開始來臨,於是筆者加快步伐到回歸塔可以避雨嘅地方,諗住拍攝閃電。但由於實在太大風大雨,根本冇可能拎腳架相機出嚟曝光,於是等... 等到咁上下開始細雨,拎出相機來曝光,曝光設定10~15秒,但係由於閃電嘅位置,不在我們正前方。於是我哋冒着微雨擔遮改變地方,到回歸塔平地地方進行曝光。落雨影閃電真係好x麻煩,一手擔遮一手拎腳架相機,仲要咩住個背囊周圍走。唔好理啦終於到達,安置好腳架相機係適當位置,進行曝光。一路曝光雨水一路係咁整濕鏡頭,由於閃電頻率好密,筆者又好驚損失拍攝閃電機會,鏡頭濕咗都係用衫抹,我件衫仲要係運動衫唔吸水嗰啲=.='' 閃電不斷閃,快門不停按,閃電不斷閃,快門不停按,閃電不斷閃,快門不停按... 真正符合筆者閃電痕跡,只有兩張。筆者選擇前者,因為雲嘅氣勢好重要,係呢張相嘅重點之一。構圖由於太匆忙,只係用咗塔尖做中間做軸心,之後用鏡頭最wide嘅焦距,低炒構圖就算xx數,務求扑中理想閃電形態嘅一刻。
16mm iso64 f5.6 15s (Fotopro X-go plus)
筆者在此非常感謝, WhatsApp群組send出天文台閃電預報消息嘅嗰位師兄!今次體驗非常難忘,自己住咗大埔咁耐,大埔回歸塔呢個景點咁出名,終於成功打卡!影到回歸塔閃電!
更新重新後製:19 Jan 2020
歡迎加ig交流!
instagram: andrewncy.images