Fever 達人文章分類

直播婚禮好煩呀?攝錄師教你點解決:平又得!貴亦得!

 

dcf-travel-img-42238

專業直播可以將小型發射器駁在穩定器上,咁觀眾就可以睇移動中既靚畫面唔駛眼定定 (不過上圖沒有駁發射器)

結婚一刻值千金,新郎新娘梗係想所有親朋好友都能共聚一堂,見証這一刻啦!但限聚令搞婚禮,會場只係俾廿個人入去,計埋攝影師雙方父母律師或神職人員,隨時連親兄弟姐妹都入唔到去!諗起都幾灰架。點算好呢!

 
好彩呢個世界有直播既出現,親朋好友都能夠有機會見到新人最重要既一刻。但問題係,雖然直播話難唔難,但對於唔係做開打機直播、真人show既普通市民,又要set角度又要煩延時一大堆問題,搞直播隨時搞到一鑊粥,咁點樣先可以搞得掂直播呢?
 
專業、唔親民既方法 (如無興趣深究可直跳入親民方法)
為咗解答呢個我地攝影師被人問得最多既問題,我上網翻查咗好多直播方法:攝影師搞直播最專業最理想既形式,係好似電視台咁有幾cam轉換、咁就可以睇到不同角度不同時刻。呢個時候攝影師需要請多個助手,用直播器駁2-3cam,再上傳到網上平台串流一下,實際操作不易,因要考慮埋訊號源、延時、器材接駁、鏡頭角度運用,wifi同hdmi線配置、同埋攝影師之間既走位。
 
而好多人都想用手提電腦做直播,但手提電腦只有hdmi輸出而無輸入,而要駁hdmi入就要用capture入usb,先唔講極繁複,而且極易斷訊號。所以我地都會用一部專業級既直播器去處理,這些直播器不單可輸入2-3個hdmi訊號,更可以駁航拍機(當然不太建議因有機會撞訊號而炒機),甚至可以攞會場既MIXER聲,更可直接駁wifi、lan線甚至sim card上4g,直接在FACEBOOK , YOUTUBE 或TWITCH LIVE添。不過,因請多咗人同用多咗器材,單係個直播器己經貴過一張單,個成本無可避免上升。
 
親民方法
講咗上面嗰個唔親民既直播方法,疫情經濟下的新人都希望能省即省,靳緊褲頭在所難免。咁最親民既方法係D咩呢?答案我諗大家都知,就係4G智能手機啦!
 
手機拍片畫質夠用但要注意收音
 
其實如果唔係追求極致畫面,TVB式既多角度現場直播,一部智能手機就己經掂哂!4K畫質同埋有埋防震,加枝腳架其實拍片己經無敵!
 
直播最重要係有WIFI駁上FB YOPUTUBE LIVE,拎到手提電腦要搵WIFI都唔容易架!萬一部腦慢仲會隨時斷線。4G智能手機好就好在可以4G極速上網!而且己連接直播平台,一機在手,真係拍盡所有!不過要留意係各個直播平台或會有人數限制。
 
只係手機收音認真麻麻,聽下歌無問題,但如果面對既係宏偉既伯大尼大教堂,嗰D蕩氣回腸既回音足夠令你聽唔清新人講我願意!當然要手機駁現場MIXER或者落WIFI RECEIVER插藍芽咪,對手機用家都「太難啦」!但買一枝指向式較高既手機咪(加防風罩),對手機收音都係有一定幫助既!但要留意指向式咪真係好指向性,一定要指向發聲既地方,如果能放近新人就放近D,如果迫住要在角落位置既落可以指向喇叭。
 
企中間唔一定拍得最好
另外拍片要穩定,也要有角度,尤其教堂証婚時,企中間一來擋住攝影師,二來新人長時間面向聖台,咁直播新人就好容易變咗直播影后了。
 
我地會建議放置直播機時,要先了解新人會長時間面向邊度,有時真係側面會好D!因為側面唔單止影靚女D,仲可以見多新人幾面架!
 
PS埋:也要問埋教堂邊度俾放邊度唔俾~~~
 
搵人HOLD機好唔好
咁拍片梗係有人HOLD住機會好D,無人HOLD咁叫會場俾個cctv訊號俾你駁電話係咪仲方便?不過呢,針無兩頭利,hold機人始終係直播緊,直播就唔好郁嚟郁去了,一來震過貓皇,二來唔係嗰個拍片既都有王家衛幫手導演嘛。
 
我喺大陸睇邊個台好?
所以我話香港真係福地,香港有facebook live , youtube live, instagam, twitch , skype.......... 真係一眼而知世界事呀!但如果有親友身在內地又點算好呢,要知道內地極注重訊息安全,我地梗係唔可以教內地親友翻牆咁離譜!好在內地科研一日千里,沒有FB卻有 人人網、哔哩哔哩站、沒有youtube仲有土豆、仲有大量網紅直播平台,還有疫情期間大家居家工作必備開會神器ZOOM,所以內地親友要觀賞到新人婚禮都唔係無可能既!
 
講多少少首播功能
無論你有無FANS,你都可以開一個Facebook FANS GROUP或FANS PAGE做直播,更可設置提示同埋首播功能,令大家好似睇巴塞對拜仁既歐聯四強咁,雖不能親臨卻有即時感,拍手掌都會熱烈D~~~

當然諸如youtube live等其實都好好用,也有類似功能,但曾經有新人反映過,youtube live要你個PAGE有一定人數先可以用直播功能,唔知而家仲係咪,有錯請指正。
 
今日就講到咁多先~~~~ 希望幫到大家,雖然疫情下大家都好辛苦,但婚禮係開心既,記得上唔上到鏡都好,記得要笑呀!
 
 
 
 
 
分享感想
Stein Chau 的其它文章
直播婚禮好煩呀?攝錄師教你點解決:平又得!貴亦得! Stein Chau .2 月 14 日   專業直播可以將小型發射器駁在穩定器上,咁觀眾就可以睇移動中既靚畫面唔駛眼定定 (不過上圖沒有駁發射器) 結婚一刻值千金,新郎新娘梗係想所有親朋好友都能共聚一堂,見証這一刻啦!但限聚令搞婚禮,會場... (繼續閱讀)
拍好成長片段的九個問題 Stein Chau 曾在本網站上見過一篇文章,名為「每個婚宴總有一段成長片段」。當然,事實也許並非如此,但成長片段在香港婚宴中,可說是司空見慣,逐漸失去了本來的意義,變得為做而做。也許有很多人都會問,為什麼要弄一段成長... (繼續閱讀)
示威現場業餘攝影者的安全心得 Stein Chau 近日席捲金鐘、銅鑼灣和旺角的「雨傘革命」,是香港的城中大事,無論是支持學生的,或是希望社會早日回復正常的,都留心著這場大事的最新動向。但隨著攝影器材的普及,在示威現場除了身著標誌傳媒外套、手拿整套專... (繼續閱讀)
每對新人總想有一段《那些年》:拍攝婚禮微電影注意事項 Stein Chau 在香港舉行的婚禮,一年不知凡幾,也許在每位新人心中,都希望有一個與別不同的婚禮。多得單鏡反光相機拍片功能,在十年前還要花千金才能拍出的微電影,現在用相對低廉的成本便能拍出不俗效果的微電影來。回想兩年... (繼續閱讀)