前言：
同事 K さん 話香港無咩好影，我心諗…唔係吖！明明就大把嘢影！（不服來辯...講笑）
入正題！！！上年小弟喺 IG 見到好多「節果決明」嘅靚相，但奈何見到人哋出相時已過滿開時分，唯有備戰一年，今年再戰~
▲ 小弟覺得自己都影得幾有日系感，各位師兄點睇？
據網上資料，香港好似得兩棵節果決明，其中一棵就係中環美利酒店呢棵，已係百年古樹，通常喺 5 月開花。
由 4 月尾開始，我日日都轆 IG 望實有無人去影、同留意住啲花開成點。不過人算不如天算，到滿開前後嗰幾日，竟然陰天同落雨（喊出嚟！）Well ... 其實落雨又有乜好怕喎！啱呀 ... 人生就同影花一樣，唔係話你 Plan 好晒就一定影到！！！所以都唔理得咁多，都係衝去影咗先算。
P.S. 仲要嗰幾日落雨我就頸痛... 成個人嘅狀態都麻麻。
▲ 以 250mm 拍攝
打算去影嘅前一日就落大雨，唔少花都吹落咗。
利申返唔是咩教學文，只係係咁而都開心 share 吓用咩器材啦～嗱！小弟今次就帶咗 NIKKOR Z DX 50-250mm F4.5-6.3 VR 配合 Nikon Z50 嚟影。因為棵樹都幾高吓（而我又幾矮吓），所以無 200mm 都炒唔到上去。加上用 APS-C 可以再炒遠啲，所以 Z50 都真係幾唔錯 :3
又 P.S. 等效焦距唔計了，懶...
▲ 以 100mm 拍攝。
講開又開，細佬以前做旅遊記者嘅時候都去日本影過幾次櫻花，不過發現影櫻花嘅經驗對影呢棵節果決明無咩幫助。事關呢棵古樹嘅花形態獨樹一幟，啲花一條條圍住生，老實講構圖時都有啲搲頭，唔 Sure 點影先影得啲花好睇。歡迎咁多位巨巨畀啲 Comment 我。
▲ 節果決明花葉相間，有時又有啲垂枝「阻住」，搞到畫面少亂，真係人都燥埋。不過粉白色花又幾靚係真～
▲ 我懷疑要影到一條條先可以顯示到節果決明嘅美態。（9up）
▲ 呢張自己覺得影得唔錯...
呢棵節果決明原來曾經歷多次危機，又畀政府列為病樹、啲樹枝又染過真菌，啲根又爛過…但就係未死，仲年年都開出咁靚嘅花，令我呢個真文青都有少少感動同慨嘆。更加覺得趁佢開花，非常值得嚟留影。
可能住得喺香港嘅動植物都寧舍頑強，生於斯長於斯，見證時代變遷，未知可否有下一個百年。
▲ 最後用 iPhone 影返張廣角畀大家睇吓周圍個環境。咁啱棵樹有啲頂光照落嚟又幾靚啵～（並沒有）
欲知後事如何，且待下回分解。
本集完。
—————
香港攝影平台（敝平台）地味女編輯日常廢文廢相，乜都影、最鍾意貓。
面書專頁
https://www.facebook.com/garueditordaily
