大概係三年前出過一篇分享四年攝影生涯既文章，
講述有關自己由助手一步步成為攝影師既經歷，
雖然打著分享經驗既旗號，
但實質純粹係想為自己迂迴既經歷寫一篇記事，
為當年既自己而做既一個小總結。
仲記得當時既文章以九十後攝影師作為開頭，
有點象徵剛出社會打滾既新鮮人既意思，
更曾經因為當時依一篇文章而得到一些意想不到既機遇，
感恩當時既自己會寫文章依一個決定。
時移世易係今日零零後都開始踏出社會工作既時代，
九十後既稱呼都開始演變成老一輩既意思，
雖然係咁但為左首尾呼應當時既文章，
我決定厚住面皮再一次用九十後作為開頭去重新講述自己依七年既小總結。
七年係一個好有趣既時間，
七年係一個人全身上下所有細胞「重新更換」一次既時間，
換言之七年前既自己與七年後既自己可以話係兩個完全不同既人。
而另外七年之癢係指婚姻進入第七年時，
人們可能對婚後生活既平淡規律感到無聊乏味，重而經歷考驗既時間。
而攝影上依七年我同樣有相類似既體驗，
由攝影白紙到今日累積超過二百個獎項既我，
如果有機會可以比自己超越時空限制地同自己互相對話，
感覺應該會似與兩個不同宇宙版本既自己相處一樣，
會係一個熟悉而陌生既對話過程。
經過七年時間既經歷同經驗今日既自己同七年前既自己對世界既理解同價值既睇法早已不一樣，
由一開頭對攝影一切都充滿好奇心既熱情，
到熟悉拍攝節奏穩定發揮保持高質素既輸出，
少了青澀既熱情多了由經驗累積既熟練。
曾經有諗過自己會否因為「七年」就此失去對攝影既愛，
變成純粹為工作而拍攝，
興幸係思考既過程搵到自己對攝影上最深處喜愛既原因，
成功經歷「七年」既考驗令所擔心既事情沒有發生。
而「七年」除咗可以係對人既一個考驗，
同時都可以係令成功果實孕育成長既必要條件，
羅馬唔係一日建成，
只有付出努力并持之以恒，才能取得成功。
即使每次既改變只係一少步，
但係「七年」既幫助下就會好似滾雪球一樣越滾越大。
為左寫依篇文章回望三年前既文章睇返今日既自己，
雖然依三年既時間發生太多事情真係唔易渡過，
而且身邊太多太多事都物是人非。
係不經不覺渡過既依三年困難時間，
原來自己都一直有為自己努力付出，而收穫都不少。
三年前既自己參加國際攝影比賽剛剛一年，
為自己初出茅廬就得到國際上其他攝影師既認可而振奮，
而當時珍而重之既兩個獎項，
現在已成為我為數兩百多個獎項既其中之二。
現在更不知不覺已經得到了當年自己好期待可以得到既名銜同獎項，
「One Eyeland 世界十大婚禮攝影師」「PPAC國際十大攝影師」「AsiaWPA 年度攝影師」「WPPI 第一名及95分既特金獎」⋯⋯
而今日淨係攝影比賽首三甲既獎座已經拎過超過三十多個，
收到既獎項多到甚至令自己產生一種係國際比賽上得獎係好輕易就做到既錯覺，
曾經既自己更會覺得自己參加比賽除了三甲以外既獎項都有點不值一提。
回望過去睇返以前既自己，
其實每一張參賽作品都係自己好努力去付出，
抱住熱誠同期望去拍攝同參賽，
每一張得獎既作品即使唔係首三甲沒有得到獎座，
但依然係一張非常之好既作品係值得得獎既照片。
以前覺得好困難先得獎既國際比賽，
今日要得獎其實依然係同樣唔簡單，
只係成長令自己產生一種一切變得輕而易舉既錯覺，
係不斷追求既過程好易會令自己迷失變得盲目，忘記了最初既目的。
追求進步固然重要，但同樣要學識感恩現有既一切，
雖然未來已經唔打算參加攝影比賽但感恩曾經參加過攝影比賽令自己進步既自己。
經過「七年」既時間由攝影白紙，
到現在可以得到身邊同行欣賞有時會抬舉自己謬贊做「大師」，
依個係一個好有趣而夢幻既過程，
始於夢想而努力最終成就現在既自己，
無論過程係辛酸定甜蜜都係屬於自己人生既旅程。
我係Alex 一個九十後既攝影師，
依個係我入行七年既小總結，
期待我未來更精彩絕倫既人生。
Facebook:
www.facebook.com/alexfungphotography.hk
Website :
https://www.AlexFungPhotography.com/
Instagram：
https://www.instagram.com/alexfungphotography/
