文：本香猛
佢，一個人獨闖楓林閣；佢，講過「唔會再俾人用槍指住我個頭！」、「我要話俾人聽，我冇咗嘅野可以親手攞番！」等經典對白；佢，燒銀紙點煙、穿大褸揸雙槍。佢，是 Mark 哥，是我們愛戴的發哥周潤發。即使《英雄本色》已落畫多年，形象至今依然深入民心。當其他玩具廠不斷為荷里活 Sci-Fi 電影打工，出完星戰一隻又一隻，ENTERBAY 沒有忘記我們這位本土英雄，近日就將他化成 1:6 Action Figure，單是這份集體回憶，已此刻無價。
《英雄本色》Mark 哥，以前很多細廠都「偷雞」出過，但今次 ENTERBAY 卻獲電影 Fortune Star 授權推出，加上廠商多年金漆招牌，品與質都具一定保證。先說頭雕，由雕師 SCUDERIA 落刀，YJ 上色兼監修，附有正常及戰損兩款，前者還原發哥當年飽飽面，五官俱似，但個人認為殺氣少了點；反觀戰損頭更叫人擊掌，皆因不但貼有藥水膠布，凌厲眼神更 Chok 到無朋友，加埋少少鬚根，整體極具江湖味道，相信發哥自己睇到都話似！
叫得做 Mark 哥，長褸當然少不了，這方面 ENTERBAY 參考了 80 年代西裝設計，裇衫、外套及大褸均略為鬆身，同時領呔花紋跟足，衫袖又夠長，減低手腕 Ball Joint 穿崩機會。另一套衫則神還原 Mark 哥倒霉落泊 Look，灰色上衫加長褲，右腳更如實設有輔助腳架，相當有心思。美中不足是大褸沒有子彈窿，否則就更加完美！
配件方面，造型手掌、偽鈔、火柴及洗車三寶均未算特別，最有心思是送埋布景板，加埋 M92F 雙槍，讓玩家自組楓林閣槍戰一幕。Figure 每隻賣 HK$1,680，額外素體則賣 HK$300。不過比起價錢，本香猛更想知道幾時出埋豪哥同杰仔囉！
ENTERBAY 1:6 Real Masterpiece《英雄本色》
售價：HK$1,680（額外素體：原價HK$300）
特別優惠: VIP 可以 HK$120，或 Premium 會員可以 HK$190 換購額外素體
查詢：2332 3615
