文、攝：Tony Lam
講真，近年唔少人買車只會睇住個油耗數字嚟揀，細 c.c. 有 Turbo 可謂首選，頭轆尾轆驅動無所謂，總之最緊要慳油！四驅車？仲要無 Turbo？「唔係掛！」相信好多人聽到上述兩點後都即時回應呢三個字，但其實若然我話你知：「係呀，呢架 Subaru XV 四驅車都係行緊每公里 $1 左右咋。」你會唔會都即時心郁郁先？
其實近年 SUV 市場多被歐洲車廠雄霸，全因品牌效應外，其中一個最主要原因當然係引擎選擇。除了大熱 2.0 公升 Turbo 偈外，更有不少 1.4 公升 Turbo 引擎可選，集低油耗而夠力好玩於一身，間接令到日本品牌嘅産品被受冷落，何解？因為現行有售的日本中小型 SUV 多數配上自然吸氣引擎，加上四驅系統後，自然會令人聯想到唔夠力又大食嘅不良錯覺。
但係呢，話分兩頭，雖然歐洲品牌引擎看似有啲優勢，但其實論賣相，我就投日本牌品一票，相較歐洲 SUV 千篇一律嘅設計，日本選手可謂每部都具有鮮明個性，簡單啲嚟講係你一定唔會認錯。就好似今次測試呢部 Subaru XV 為例，揸出街肯定唔會俾人話似邊部邊部，以一身藍撞黑嘅顏色配搭示人，潮味十足，LED 頭尾燈組又俾人一種高級感覺，輪圈都用埋黑銀雙色 Tone，後生仔一定 Buy。
|
|---|
|
中控台除咗個 8 吋觸控屏外，上面仲有另一個顯示，更支援 Apple CarPlay ／ Android Auto 資訊娛樂系統及藍牙音訊串流功能。
|
呢部 Subaru XV 係全新第二代，可能你會以為同舊款差唔多，但頭泵把、頭燈、鬼面罩及尾燈等造型其實完全唔同，造型依舊保持 Sporty 外，亦增添咗一份貴氣，唔信？打開車門睇吓你就明，首先最吸睛嘅，應該非那個中控台 8 吋輕觸式多功能屏幕莫屬，賣相高級之餘，解像度亦相當細緻，觸控反應亦相當好，同你屋企部平板差唔多。不過，最吸引到我嘅其實係個軚盤，直徑恰到好處，握感相當唔錯，設計亦極有豪華車味道，幾乎所有控制都可以喺 3 點同 9 點位置搵到，加埋轉檔撥片，真係可以做到軚不離手，大大增加駕駛時的安全性。
|
|---|
|
天窗已列為標準配備，唔使另外加錢。
|
|
|
車廂的碳纖紋飾板及高級真板連橙色縫線設計，的確有型討好。
|
|
|
X-Mode 下引擎輸出及四輪抓力會隨著路面情況而自行調校，簡單啲嚟講即係越野時或遇到爛路時可以用。
|
|
|
尾箱空間夠晒用，一次放三四個大喼都無問題。
|
最後當然要講返個駕駛感，先旨聲名，本人由擁有第一部車至今，買入嘅幾部都係歐洲 Turbo 引擎車，日本車加上無 Turbo 真係平時試車先會接觸到。講真，試車前對於其力量沒有抱好大期望，但當入 D 波俾油一刻開始，Subaru XV 俾我嘅感覺係完全唔覺得唔夠力，雖然相比起 Turbo 引擎那低轉開始便擁出的最大扭力有明顯唔同，但其實自然吸氣的好處就是力量嚟得更漸進，你踩幾多佢就俾幾多，俾你有更好嘅掌握。絕對唔似 Turbo 突如其來發力，但當一收油啲力又跌得好快嘅大上大落個性，操控感一切都係好順滑。除了係無段變速波箱的功勞外，Subaru 晒名嘅水平對向引擎天生就是又靜又靚，怠轉時幾乎沒有任何聲傳入車廂，加上懸掛調校功夫出色，全程駕駛時嘅感覺就係好靜好舒服，有令人置身高級豪華房車嘅感覺。至於後排乘座感，行車時我就試唔到，不過尾排的空間的確好充裕，相信除非閣下身高超過 6 呎先會覺得頂頭頂腳，否則普通身高的人一定無投訴。
|
|---|
|
引擎方面一直為 Subaru 的強項，其水平對向渦輪增壓引擎更早已稱王稱霸，今次用於 XV 身上的雖然無 Turbo（馬力為 156 匹），但力量及寧靜度依然出色，最重要係可以喺四驅情況下做到每公里 $1 的數字，的確好吸引。
|
規格表：
引擎：水平對向 4 汽缸
排氣量：1,995 c.c.
最大馬力：156ps/6,000rpm
最大扭力：196Nm/4,000rpm
波箱：Lineartronic CVT 七前速自動波箱
懸掛：前麥花臣、後雙搖臂
傳動：左右平衡式全時間四輪驅動
耗油量：7.0L/100km
售價：HK$279,800
查詢：2828 2488（Motor Image）
