文：Tony Lam
車廠想要為旗下車型作宣傳，實在無咩好得過為佢攞個世界最乜最物嘅朵，正如早幾日保時捷部 911 GT2 RS 就攞咗紐布靈北賽道最速量産車傍身，今日又輪到 Koenigsegg Agera RS 呢部頂級超跑。
介紹番，Koenigsegg 呢個瑞典超跑品牌其實存在已久，只係佢嘅産品實在太超太勁，香港跟本無路俾佢行，而且部部都係天價，所以喺街見到佢嘅機會實在同中六合彩差唔多。而今次破記錄嘅主角，就係廠方最強代表 Agera RS，佢嘅心臟嚟自一台 5.0 公升 V8 雙渦輪增壓引擎，最大馬力係過千匹嘅 1,160 匹，扭力就有 130.6kgm，你以為已經好誇張？錯！因為佢嘅對手係更勁嘅 Bugatti Chiron。Bugatti 大名相信車迷應該唔會陌生，佢部 Chiron 就更是現今量産車型中最勁嘅，睇佢 1,500 匹最大馬力同埋 163.2 kgm 峰值扭力，0-100 公里加速只要 2.5 秒嘅數字，就知佢真係堅到冇朋友。
咁究竟兩部過千匹嘅超跑鬥乜？咪就係鬥 0 - 400 – 0 km/h，即係鬥快跑到 400 公里再踩停部車嘅時間，之前部 Bugatti Chiron 就造出 41.96 秒嘅世界記錄（其實世界上都冇乜幾部車跑到 400 公里）。要打破佢嘅記錄，Koenigsegg 當然要出盡法寶，負責嘅車手係自家測試車手 Nikias Lilja，至於部 Agera RS 本身就係要攞去交俾美國買家，不過買家就好大方咁借出嚟俾佢哋做挑戰，至於地點則為丹麥 Vandel 機場（已荒廢，條跑道啱晒做直路挑戰），雖然係咁講，但由於跑道狀態未算理想，令到可以攞嚟跑嘅路段只得 2.8 公里，要做到 0 - 400 – 0 km/h 的確有啲難度。
不過，經過幾次試跑，部 Agera RS 同車手喺進入狀態後，正試開始時就造出靜止加速至 400 公里只要 26.88 秒（好癲！），而且只要 1,958 公尺就攪掂，去到 403 km/h 後就即時踩 brake，喺碳纖維陶瓷制動碟幫助下，9.56 秒就由 400 公里踩停架車，距離更只要 483 公尺，加埋嘅結果就係 0 - 400 – 0 km/h 只要 36.44 秒，輕鬆踢走 Bugatti Chiron，成功登上最速極速皇寶座。
