文：本香猛
星戰第八部曲《最後絕地武士》進入倒數階段，邊個係最後 Jedi 固然引起熱烈討論，但新一集登場的新機械人 BB-9E 同樣吸睛。外國 Sphero 最近生產了一款 BB-9E 遙控玩具，實行畀星戰迷近距離了解佢真身！
基於保密關係，暫時 BB-9E 向外披露的資料並唔多，只知它是 First Order 裡的宇航機器人，負責飛船運行及機械操作。外形跟圓碌碌的 BB-8 好相似，但 BB-9E 全身就改為塗上黑灰色，頭部較為扁平，外界估計它是 Kylo Ren 的隨從之一，難怪外觀如此邪氣。
由 Sphero 推出的 BB-9E 比例為 1:6，高 9cm、闊 7.3cm。全黑球形機身外表光滑，頭頂中間設有大眼仔，花紋、天線皆跟足原設。運作時頭部的 LED 燈會隨之閃動變色，配合電影原聲音效，像真度極高，不說還以為是電影道具。
BB-9E 可透過 App 以藍牙遙控，連接範圍達 100 呎，在香港絕對可以通屋行。它以滾動球形身體進行移動，App 設有十字桿助玩家控制。只不過官方示範當然流暢，本香猛實際試玩過，操作難度卻異常地高，由於它以頭部方向決定前後，偏偏移動時頭部又會不斷走位，導致容易失控撞牆。雖然玩後發覺它都幾耐撞，但都建議大家玩時盡量減速，也要預留多一點空間呢！
除了走動，它仲有其他玩法，例如可用 App 控制它做出驚喜、生氣、打冷震等反應；又可叫它自動巡邏或睇星戰電影時畀反應等等。它也對應時下流行的 AR 擴充實景，只要它把放在隨盒附送的 DROID TRAINER 底座上，便可經 App 進入虛擬駕駛艙內，參觀不同知名戰機的內部結構。
BB-9E 外國賣 US$149.99，香港有舖頭已經翻貨，賣 HK$1,198，食水唔深！同期仲有經典角色 R2-D2，遙控時會伸出第三隻腳，操作較容易，適合入門玩家，賣 HK$1,428。
查詢：3577 8685
