文：Tony Lam
只限法拉利超超級 VIP 獨享嘅 FXX K 終極拉利，以 1,036 匹、全球限量 25 部加上 260 萬歐元天價，成為拉利迷終極 Dream Car。若然早前錯過了機會嘅車迷又有好消息，因為更勁嘅 FXX K Evo 剛剛推出了。
雖說是多咗一個機會，不過你有錢買都要拉利肯賣，若然你唔夠資格，廠方都唔會俾機會你買部車去參加呢個屬於法拉利 XX Programmes 賽車實驗計劃。簡單啲嚟講，呢部超級拉利係唔能夠揸出街嘅，只可以落場揸，買咗都交由法拉利客戶賽車部門管理，當法拉利喺世界知名賽道攪活動嘅時候，廠方就會將部車運去賽場，車主去到後就會有教練陪同或者單獨落場試車，同時廠方工程師更會提供後勤服務，車主可與工程師共同研究部車嘅特性及提出問題，參與開發過程，成為廠方嘅另類試車手。所以，能夠參與呢個計劃嘅人絕對係有錢之餘，更要對賽車充滿熱誠、有技術及對車輛有足夠認識，當然，最重要嘅當然係你已經買過多部拉利嘅超級 VIP。
講返部 FXX K Evo，外型上較之前嘅 FXX K 更輕更惡更進取，原本分開左右擺放嘅尾翼再次合體，而且更有兩層，加上更新嘅頭翼及其他擾流置等，新車較 FXX K 多 23% 下壓力，當 FXX K Evo 以 200 公里行駛嘅時候，可以提供 640 公斤下壓力，極速時更可達 830 公斤。動力心臟為一台 6.3 公升 860 匹 V12 引擎，扭力 750 Nm，加埋摩打 190 匹，總馬力輸出去到 1,050 匹及 900 Nm 扭力，使用 F1 雙離合器七前速波箱，後輪驅動，前 19 吋後 20 吋輪圈內蔵碳陶瓷 Brembo 制動系統，靜止加速至 100 公里少於 2.8 秒，極速則超過 360 km/h。
