文：本香猛
超英電影《正義聯盟》毁譽參半，但全球票房大收是事實，連帶周邊也一樣好賣，當中當然包括 Hot Toys 一系列 1:6 Action Figure 啦！繼蝙蝠俠、蝙蝠俠（戰甲版）、閃電俠、水行俠及神奇女俠後，廠商日前終於發表聯盟最後一員：超人，並首度還原「雷射眼」造型，對舊玩家同樣具新鮮感！
Hot Toys 雕工一向叫人放心，今次由韓國藝術總監 JC. Hong 率領雕師 Yong Kyum Kim，一口氣炮製兩個頭雕。一個是演員 Henry Cavill 真人頭，國字面、蝦餃下巴、嚴肅五官具一定神似度（雖然有人話似「大波謙」），就連高額角也經軟膠頭呈現。另一個則是「雷射眼」頭，戲中超人復活後因記憶紊亂而大開殺戒，更以雷射眼 Heat Vision 攻擊其他成員。這個造型最大亮點是雙眼會發出紅光，廠商聰明地以 LED 燈表達，做法有點似同廠的 Iron Man，但在超人憤怒表情搭配下，紅燈用得更有 Feel！
演員 Henry Cavill 出名爆肌，HT特別為此打造一個高 31.5cm 的肌肉素體，並提供 30 個可動關節，肌力十足之餘，仲可擺出飛天等高難度甫士。至於戲服，設計師用的緊身衣薄得來富有彈性，務求突出肌肉紋理及層次感的同時，無阻人偶素體擺出不同姿勢。特別留意，戰衣表層先後經過滴膠及金屬質感處理，前者製作出壓紋及胸前 S 標誌;後者則令戰衣有電影般的閃亮仿金屬效果。必提的還有鮮紅色斗篷，布料富彈性及重量質感，連接肩膊後有下墜感，造工別出必裁，仲認真過做真人衫呢！
超人在戲中幾近無敵，一拳就打死人，仲使鬼武器咩！所以隨人偶無跟武器，只有8隻造型手及一個懸掛式地台，論數量論玩味似乎不及其他成員，未必引到非超人粉絲購買。人偶由即日起於 Secret Base 接受顧客預訂，預計 2018 年第 4 季至 2019 年第 1 季推出，零售價 HK$1,530，預訂價 HK$1,490。
查詢電話：3722 3988
訂購地址：九龍旺角彌敦道 582-592 號信和中心 20 樓
