文：本香猛
數近期玩具Hot Item，除了 LEGO 團年飯外，就是 ES 合金六神合體。只不過「甲之蜜糖，乙之砒霜」，有人鍾意佢夠 Cute，有人卻厭佢頭大身細失去了原著神髓。若閣下睇法屬於後者，就麻煩先儲定錢，事關 Bandai 又再度「炒冷飯」，宣布以 Renewal 之名翻出「GX-40R 六神合體」，預計今年 6 月發售，連稅賣 30,240 円，平過 GX-40 目前炒價，向隅客今次咪再錯過！
Renewal 系列源於 Bandai 數年前的「超合金魂 20 周年再販希望」投票，其後超獸機神斷空我、黃金戰士、鐵人 28 號等都因為高民意而陸續復刻。有趣得是 GX-40 六神合體當時是五強不入，但試問 Bandai 又點會放過搵錢機會，今次再出暫時官方資料不多，但據悉配色會承襲 80 年代的 POPY 合金，並加入亮面金屬塗漆，視觸覺預期更具質感。
六神以原著造型亮相，分別是變成 Godmars 身體的人頭獸（Sphinx）、變成左手的巨人神（Titan）、變成右手的天神（Uranus）、變成左腳的地神（Ra）、變成右腳的真神（Sin），以及主機體基因（Gaia）。全部有手有腳有關節，官圖所見可動性有所改進，頭部可動，擺姿勢更趨自然，影相構圖毋須再遷就角度。
改版另一賣點是為各魔神追加了一款小武器，合體後的 Godmars 更附有一把舊版「六神劍」，擺到明向初代超合金致敬！特別一提，改版多了一個地台支架供基因使用，並保留魔神岩及地球防衛隊的三台戰機，配件及可玩性有增無減。
《六神合體》粵語主題曲
