文：本香猛
日本人一向創意爆燈，而且是宣傳高手，很多商品往往叫人意想不到。最近日清食品就將今年 7 月 Twitter 上載的一張杯麵四驅車變為實物，並命名為「カップヌードルミニで作った四駆」，即用迷你杯麵做的四驅車，全球限量一部，由本月至 2019 年 12 月 31 日為止可透過「日清食品積分交換計劃」用積分參加抽獎換領，真正有錢都買唔到，超激罕！
叫得做杯麵四驅車，全車最特別是之處，是車身由迷你合味道的發泡膠杯身製成，製作人巧妙地將杯身最圓的地方當作車殼，並分別剪裁成定風翼及拱輪部分，全車沒有多餘的塗裝拉花，反之是最原裝的 Cup Noodle 花紋，識別度勁高！其他部分也相當盞鬼，例如車頭位置用了杯麵上的 Barcode 當作車牌，車尾有「電子微波爐調理不可」的字眼，最爆笑是龍頭凰尾兩側的滑輪，這裏竟然是杯麵內的蝦乾，而且真係轉得，真係估你唔到！
齋睇相同官方資料，暫未知這部四驅車能否入電行走，只不過就算可以，相信都無人捨得放它落場砌車。是次抽獎結果將於 2020 年 1 月公布，杯麵四驅車抽一次需用 1,000 點，香港呢邊當然無得抽，只希望廠商見反應理想日後會商品化啦！留意番，同一活動仲有 NBA 球員八村壘的 Jordan 運動背包抽，仲要 3,000 點，畀著你會玩車定打波呢﹖
