文：本香猛
提到打機，現在選擇有很多，除了 PlayStation 或 Xbox，仲有手機及 PC 等選擇。但回想幾十年前，邊有咁幸福，有部卡片遊戲機已經玩得亦不樂乎！今年因為《Super Mario Bros.》（孖寶兄弟）35周年而動作多多的任天堂，最近就將經典 Game & Watch 卡片遊戲機復刻過來，絕對能勾起資深機迷的童年回憶。
Game & Watch（日語：ゲーム&ウオッチ）早於 1980 年誕生，由橫井軍平負責設計，最大特色是只有卡片般大，機身細細便於攜帶。雖然只有單色顯示，一機又只有一隻遊戲，但當年推出卻深受機迷歡迎，除了《Mario Bros.》，熱賣款還包括《Donkey Kong》（大金剛）、《Manhole》（過橋抽板）等等。
今次復刻機採用了 Game & Watch Gold 為原型，塑膠機身重 68g，三圍 67 x 112 x 12.5mm，細細部輕鬆插入衫袋。主色為紅撞金，並一如舊機般設有十字鍵及 A、B 掣，連帶「Game & Watch」字樣也用回昔日設計，還原度相當高。當然它亦與時並進用上彩色屏幕，約 2.36 吋大，畫面較原來的單色屏幕精美不少。
遊戲方面，個人認為是最大缺點，因為實在孤寒了點，雖然不是單機單隻Game，但也僅有三隻，包括《Super Mario Bros.》、《Super Mario Bros. 2》及最元祖的拋波仔遊戲《Ball》，若然遊戲數量多些會更加吸引呢！特別一提，昔日 Game & Watch 的鬧鐘功能它也移植了過來，並改為動態顯示時間，更有 35 種特別事件演出待玩家發掘。
此機內建鋰充電電池，經 USB Type-C 介面充電，充電 3 小時可玩 8 小時左右。預計 2020 年 11 月 13 日上市，未連稅賣 4,980 日圓，折合約 HK$363，比現在一隻 PS4 遊戲仲要平，機迷們應該可以無痛入手。
