文:本香猛
《孖寶賽車》這款遊戲,相信不同年齡層都玩過,這款任天堂王牌除了多年來不停改版,還衍生出多款實體玩具,剛於 10 月推出、結合 AR 玩法的「Mario Kart Live: Home Circuit」就是一例。而最近日本京商玩具 Kyosho 亦推出了一系列《孖寶賽車》迷你遙控車,手指咁長一樣行得走得,即睇!
這款迷你遙控車名為「ミニ マリオカート R/C コレクション」,一套共有 5 款,包括瑪利歐、路易吉、奇諾比奧、碧琪公主及耀西,各自跟番遊戲坐上所屬顏色戰車。雖然每部車只有 63mm 長、21g 重,但人仔、車身、四個車輪及雙出死氣喉都似模似樣,即使唔遙控住玩,買齊 5 款當作收藏也絕對唔失禮。
車仔的動力來自內藏的 35mAh 鋰電池,可經車底 USB 充電,充 30 分鐘玩到 7 分鐘左右;而 Wi-Fi 遙控則需要 2 顆 AAA 電芯驅動,不玩時車仔可放於遙控內,相當方便。睇番資料,車仔的最高速度為 5km/h,官片所見具一定速度感,而且最多可 10 台一齊鬥車,然而首先要有足夠空間玩,才有加速衝刺及扭過障礙物的爽快感。
若果嫌以上車仔太細兼太慢,同期廠方還推出了一款瑪利歐單拖的大版遙控車「マリオカート R/C BIG!」,車身大幅加長至 345mm,最高速度提升至 20km/h,輪胎用防震軟橡膠打造,並內置防震技術。玩時瑪利歐更會左搖右擺,同時遙控器會播出經典背景音樂,投入感大增。
以上兩款遙控車現已發售,迷你車仔每款賣 3,980 日圓,折合約 HK$296;而巨型瑪利歐遙控車則賣 12,000 日圓,折合約 HK$894,後者計落比「Mario Kart Live: Home Circuit」仲要貴,個人就認為唔太吸引了。