文:本香猛
近日長達四小時的導演版《正義聯盟》在 HBO 平台上架,口碑載道總算為 DC 迷吐一口污氣,然而講到最出色、最入腦的 DC 電影,路蘭三部曲的《蝙蝠俠:俠影之謎》才是影迷不二之選。最近 Hot Toys 趁著首間港島區專門店 Echo Base 開幕,為回應 Fans 多年訴求又好,借勢賺錢又好,宣布重推「神物」1:6 Batmobile!
HT 旗下 Batmobile 早於 2009 年電影上映前夕推出,雖然當年價位唔低,但甫開訂即迅速售馨。後來 2012 年重推過一次,同樣被秒殺仲要全球熱炒,在 eBay 就曾炒上數千美元,縱然目前價格已經回落,只不過全新未開仍索價 HK$8,000 以上,絕對是 Figure 迷的夢幻逸品。
今次第三度推出,尺寸維持在 73cm 長、46cm 寬、27cm 高,份量十足,並配有全黑車身。前端兩側是 10 組 LED 亮燈裝所在,同時車廂軚環、屏幕及儀錶等統統做足,車尾噴射喉的煙燻效果亦一一還原,齋講外型同原裝版本可謂 100% 相同!車身結構則採用分件製作,機關數量豐富,例如艙門可以分段式開啟;前後巨型車輪懂得獨立轉向;6 組定風翼和兩組側翼可需要調整角度等等。最正是雙座椅設計容得下同廠的 1:6 蝙蝠俠,絕對睇得又玩得!
此神物現正於 Secret Base 及 Echo Base 接受預訂,售價為 HK$3,900,官方無講派貨日期,但 Re-issue 無理由又要等兩年啩?