文：本香猛
今時今日環顧全球，只有一間「車廠」車款包羅萬有，由世界級超跑，到甲蟲車、電單車、泥頭車都出到，邊間車廠咁巴閉？咪就係 LEGO 囉！最新他們又有新搞作，宣布推出 10279 福士麵包露營車（Volkswagen T2 Camper Van），外型復古 Chill 到爆，一定引到車迷注意。
LEGO 曾於 2011 年推出 10220 Volkswagen T1 Camper Van，賣足接近十年於去年底停產，雖然市場仍有少量供應，但要搵全新兼靚盒卻非易事。新一款 10279 取材自 1967 年的第二代福士麵包露營車，此車當年是嬉皮士穿州過省至愛，與崇尚自由、熱愛旅遊劃上等號，跟第一代相比主要是削平了車頭，車身變長，同時分離式擋風玻璃變為一體式，又用上全景式座艙，視野更為清晰。
10279 的零件數量共 2,207 塊，較 10220 多出近 1,000 件，高 15cm、長 35cm、寬 14cm，展示出來相當吸睛。車身採用藍白配色，起角線條及擋風玻璃俱似足原車，輪胎是 LEGO 新款，並附有多張花花貼紙讓玩家粉飾車身，想幾文青就幾文青！如同其他 LEGO 車仔，它除具有帶動軚盤的前輪轉向系統外，還有其他活動機關，例如側門可以推拉敞開，車頂可以揭起變成折疊布帳篷，另外後車箱與引擎蓋都打得開，細緻得來認真好玩！
作為旅行用車，既要住人仲要兼顧煮食，此車變成 LEGO 後依舊設備齊全，打開車門可找到 Gas 爐、水槽、雪櫃、櫥櫃、餐枱及摺疊床等，全面照顧 Minifigure 人仔的生活起居需要。而針對沖浪愛好者，更可用零件砌出一塊滑浪板及兩張摺櫈，同呢個 Summer 夾到暈到！售價方面，此作將於 8 月 1 日上市，賣 US$179.99，香港部分網店正接受預訂，有愛就上車啦！
