文、攝：Vincent
網絡發達，不少馬路上的特殊狀況都會迅速被放上網，尤其是交通意外，不少路見不平者都習慣將影片上傳到社交平台，讓涉事司機被「網絡公審」。嘴尖的網民對事件當然會抱著「食花生」心態「加鹽加醋」，更會衍生一些網絡潮語，其中「女司機」一詞便在當中跑出。由於女司機開車事故經常曝光，大眾也對女性駕駛能力存有爭議，漸漸形成「馬路炸彈」與「女司機」掛勾的刻板印象。這也未免太概括而論吧！
其實「女司機」或「女車手」是一個相當令人津津樂道的一眾，既有美感、更是小眾，而懂得開車而且是棍波車的女士更有獨特的吸引力。為了替「女司機」作出大平反，今次特別邀請熱愛駕駛，視集齊「車牌」為興趣的「女司機」兼「女車手」做訪問，剖析她對「女司機」一詞有甚麼解讀！
現年 27 歲的安采妮原名馮殷，現為香港模特兒、電影演員同電台節目主持之外，還有個「動物義工」的身份。由於日常生活與工作需要，再加上刻不容緩的動物拯救行動都需要駕駛協助，她自小亦熱愛汽車，久而久之對駕駛、跑車培養出濃厚興趣。現時她除了的士之外，正努力將「車牌」數字集齊一套，目前更努力學習俗稱「拖頭」的貨櫃掛接式車輛，力證女士一樣可以擁有高技術性的駕駛操控技巧，為女士大平反！
自小愛車 興趣偏向男性化
安采妮說：「喺屋企我係獨女，而我細細個就好鍾意車，就算係童年，加上我冇要求買公仔、女仔玩具嘅情況之下，佢哋都係會選擇買車仔畀我玩，久而久之玩嘅、做嘅都偏向男性化多少少，跑車、遙控車、爆旋陀螺等等，都係我細個嗰陣最鍾意玩嘅玩具！相信形成而家咁鍾意車都有關係。」
由於疫情關係，加上她剛剛換了經理人公司，所以娛樂圈的工作暫時較輕鬆，讓她可以花較多時間在動物拯救保護的義工工作上。安采妮說：「今日做訪問呢個對方（龍鼓灘）就係我工餘時間經常會出現嘅地方，因為佢係我動物義工組織（龍鼓灘貓狗關注組）嘅基地。而如果我唔識得揸車，我亦唔可能做動物拯救，所以喺相輔相成底下，我更加鍾意車呢件事！」
Nissan Fairlady 熱改 鍾情棍波跑車夠玩味
訪問當日，安采妮駕著她的愛驅前來，是一部 04 年款的 Nissan Fairlady，馬力 276 匹、363Nm
峰值扭力，加上棍波規格，如果對一般女士而言相信操控上已有一定難度，但安采尼卻駕輕就熟，慢車離合器控制得宜，未見會「大油大腳」，反而感覺溫柔自然。小編其實也是第一次坐「女司機」操控的棍波車，還是帶點「辣味」的日系跑車，感覺相當不俗。單看外觀，這部 Nissan Fairlady 已裝上不少「補品」，大尾翼、尾喉、輪圈，就連車身顏色也專程找人設計，可見安采妮對跑車都有一定要求！
安采妮天又說：「18 歲左右我就考咗車牌，我一向都係鍾情於棍波跑車，由第一部跑車 R34，之後換過好幾次車，Faiylady、Golf GT、GT 86 等等，到而家又玩返 Fairlady，而嚟緊都有留意一下 Lotus（蓮花），S2 嗰一類，都係一啲性能為主嘅車。如果照計嘅話都有近 10 年嘅駕駛經驗。」
「雖然我而家所揀嘅車都係偏向性能，馬力都會較大，但做咗動物義工之後，反而對駕駛態度要求高咗，因為太多動物意外都係出現喺馬路之上。所以玩跑車、鍾意跑車，都唔係要飛，或者話畀人知我好快先叫做玩車，至少我嘅態度唔係咁。」
「女司機」細心成優點 切勿意氣用事
「女司機」成為網絡上帶有負面意思的名詞，甚至被扣上「馬路炸彈」的帽子，安采妮作為棍波車車主及「女司機」，她表示礙於生理、心理上，無可否認都覺得女生反應、態度上都會與男生有所不同，不過她強調女生也有一個特點在男生身上找不到的。
她說：「雖然我都係女仔，但會理解男士們見到女司機都有唔太好嘅聯想。因為女仔會比較小心，車有時會慢啲、扭多幾手軚，但又證明唔到女司機意外會較多。而且細心都係女生長處，更加唔會意氣用事，因為好多時意外就係沉唔住氣先會出事！」
安采妮既為「女車手」，同時熱愛棍波車，而她相信要有純熟的駕駛技術，依然要透過不斷的練習才可累積而成。亦由於有了基本技術，安采妮對汽車的熱誠就變得更加之高。在疫情之前，她閒時更會北上內地參加小型賽車比賽，贏過不少男生。
安采妮說：「女司機會唔會危險，我自己認為睇人啦，但好多嘢都要落心機，好似駕駛技術都一樣。其實揸多啲、想多啲、理解多咗一樣可以有好好嘅技術。所以希望大家對『女司機』都慢慢改觀！」
