文：本香猛
來自法國的 Patrick 波鞋未必人人識，但這品牌自從 2006 年於日本設廠生產日版後，漸漸已變成日本國民潮鞋。然而本香猛明明寫開玩具，為何突然講波鞋，因為最近這個品牌再出高達跑鞋，高達迷唔買都值得睇睇！
所謂「再出」，皆因 Patrick 早與擅長製作高達主題服飾的「STRICT-G」拉上關係，以前就合作過《機動戰士高達》及《機動戰士 Z 高達》等企劃，今次改以《機動戰士 GUNDAM SEED》為主題，以慶祝動畫播放 20 周年。
聯名鞋以 Patrick 著名鞋款「Marathon」為基礎，分別創作基拉．大和（煌．大和）及亞斯蘭·察拉兩個主角配色。前者代表地球聯邦軍，用上藍色牛皮布料搭配藍色透氣網布，並在鞋側以金線繡上聯邦軍標誌，加上紅白 EVA 大底，外觀搶眼醒目。亞斯蘭一對則代表 Z.A.F.T. 札多陣營，以紅色中筒配紫色鞋頭，鞋側加入大大個刺繡軍徽，鞋舌一如基拉款般附有獨家金色標籤，唯一問題是配色頗為難襯，非 Fans 未必 Like！
兩對鞋即日於 STRICT-G 官網或實體店發售，尺碼由 23 至 28 不等，同售 22,550 日圓，折約 HK$1,421。雖然售價不算平，但反應不錯，就連長期受觀眾憎惡的「基拉大魔王」也一對難求，有心入手就要諗諗計了！
