文：本香猛
等了又等，LEGO 與 Nike 攜手打造的「43025 Nike Air Max 95」套組日前終於正式曝光！這款隸屬 Editions 系列的新作，將於 2026 年 3 月 28 日殺到，就算著唔上腳都值得留意！
繼編號 43008 的「Nike Dunk」積木套裝後，今回輪到 1995 年誕生的 Air Max 95。話說當年這鞋一出，憑着破格大膽的外形設計，即刻轟動波鞋界，時至今日依然是經典中的經典。今次 LEGO 用上 1,213 件零件，將這對傳奇跑鞋以 1:1 比例呈現，砌好後高約 22cm、長 28cm、高 16cm，放在鞋櫃上夠晒搶眼。
套裝選取 1995 年面世的 Neon 配色，由黑灰漸層到螢光黃點綴，連中底氣墊細節都神還原，鞋墊位置仲可以搵到印上 LEGO 及 Swoosh 標誌的零件，誠意十足。除了波鞋本身夠像真，套裝另一賣點是附有一個身穿 Nike 服飾的 Minifigure 人仔，仲有個胖嘟嘟、充滿氣泡感的「Air」字樣模型，同對鞋擺埋一齊，成個展示效果即刻升呢。不過有外媒實測後發現，官方宣傳圖的「Air」字體偏亮，實物其實略帶啞色，鞋舌上的「airmax」字樣則因為白色撞黃色，視覺上容易睇錯做「aimax」，準買家要留意番。
套裝仲附有一個特製展示底座，轉動鞋身自會觸發機關，令隱藏小抽屜彈出來，可以用來收埋人仔或小零件，設計幾有心思。此作建議零售價為 US$99.99，香港賣 HK$719 左右，價錢同真鞋差不多。特別一提，Nike 官網同步推出可着上腳的兒童版 LEGO x Nike Air Max 95「Neon」鞋款，尺碼由 27.5 至 39，不妨買畀小朋友著。
