文：本香猛
本地人偶廠 Hot Toys 跟 Iron Man 幾乎劃上等號，事關出過的作品，手指加腳指都數唔晒！這麼多麼年他們總找到名堂推出新作，最近適逢啟德體育園 Power Gate 專門店開業一周年，特別打造周年限量版 Mark IV 霧影幻彩幾何版，設計激似某大水晶產品！
今次這款限量版以 Iron Man 經典型號 Mark IV 為藍本，設計概念呼應啟德體育園主場館的色彩美學。裝甲主體以深淺交織的冷冽霧影灰做膽，再透過多層電鍍幻彩工藝同不規則棱面切割處理，既令表面「起晒角」，也讓機體折射出如極光般流轉的幻彩漸變光譜。簡單點講，即不同角度睇有不同顏色，霧影銀灰、藍紫、金綠等幻彩光暈逐層綻放，外觀、色彩恍如水晶，難怪有網友笑稱是「Swarovski 特別版」。
人偶高約 32.5 cm，用上高規格合金打造機體骨架，配備 30 個靈活可動關節，精準還原 Mark IV 的機械結構同動感姿態。頭盔雙眼、圓形反應爐、掌心及前臂例牌內置 LED 發光裝置，點亮時跟裝甲的多層次幻彩塗裝互相輝映，將光學藝術同機械美學推至極致。配件方面都算齊全，三對可替換手掌、肩部導彈發射器同前臂裝甲，背部擾流定風翼仲設有開啟功能，擺 Pose 無難度。
此作全球限量 2,500 套，香港分到 400 套現貨，現已於於 Hot Toys 專門店開賣，零售價 HK$ 2,680。單純論價，雖然以合金打造，又有深灰色專屬 LED 發光底座，不過沒有跟真人頭雕，坦白講是貴了一點，究竟值不值得入手就見仁見智了。
