文：本香猛
「Go Go Power Rangers！」仲記得細個放學衝返屋企追《恐龍戰隊》，睇住五隻機械獸合體成金剛戰神，一劍劈低隻怪物嗰種熱血嗎？如果你以為 Prime 1 Studio 之前推出的元祖五人組雕像已經係極限，咁你就太天真啦！他們最新搞作，是搵來荷里活機械設計師 Josh Nizzi 出手，將這隻童年回憶徹底重建，變成一座充滿戰損質感、仲可以換件換到好似玩模型般的龐然巨物。不過想帶佢返屋企，代價都唔細！
今次這款「金剛戰神 Josh Nizzi 特典版」，最明顯改動是將原著比較方正、甚至帶點笨重的特攝皮套體態，硬生生操肌成功，變成一個接近人類壯碩比例的重型機械人。如果話之前元祖五人組是忠實還原，今次這隻就是徹底「荷里活化」重構。Josh 在胸口、肩甲同四肢塞滿密密麻麻的機械結構，例如喉管、油壓、複雜關節位等，而不是一塊塊平滑的裝甲板。同時表面戰損塗裝，掉漆、刮痕樣樣齊，配合腳下破爛感覺的城市地台，成個畫面就如剛剛跟巨大怪獸打完一場硬仗，站在廢墟擺甫士，電影感爆燈！
對於鍾意「玩」的師兄來說，這雕像並非單單擺甫士這麼簡單，跟盒隨附兩組替換頭部、手臂同尾巴配件，一個是手持恐龍劍同猛獁象盾牌的金剛戰神；另一個是同綠衣戰士隻「龍皇凱薩」合體之後的「獸帝大獸神」，換上雙管砲手臂及恐龍頭裝甲，殺氣立即提升！值得留意的是，五隻戰鬥神獸眼部同砲口位，全部加裝了 LED 發光設計，熄燈亮起時機械細節全浮出，將立體感提升至另一個層次。
雕像目前只有特典版，全球僅限量 50 隻，最爆肯定是對額外附上的巨大飛翼。這對翼以翼龍戰鬥獸為靈感重新設計，安裝之後，金剛戰神可以展現原版影集入面從來未見過的飛行形態。
另外，要「供奉」這「神像」，屋企少些地方也不行。單是金剛戰神本體已經高達 69cm、闊 51cm、深 54cm；如果換做獸帝大獸神形態，高度仲會飆升到 77cm，闊度去到 63cm。至於安裝對翼之後，雖然高度同獸帝版差唔多，但跨度就大幅增加，實行上下左右都要打爆玩具櫃。價錢方面，US$4,899 未計運費，即差不多近四萬港紙才有交易，而且預計要等到 2028 年 3 月至 6 月先出貨，同時考驗玩家財力及耐性。
