優點:
1. 機身扎實, 造工相當之好, 炭灰色機身, 邊位全部都做得好好, power鍵今次做得比較實淨, 外型望落去的確高雅. 實機拎上手0既感覺真係堅型,同睇相差好遠~
2. 畫面方面, 我唔理咩咩技術名,咩咩萬色, 總之幾部最大品牌最新至top型號放晒響度, 睇來睇去, 呢個色最舒服冇味精, 而且又夠光, 線條好幼細而扎實.
3. 喇叭BoomSound當然勁, 好鬼大力, 我唔可以講話佢最響, 其實N記個喇叭都好響, 不過一來左右喇叭立體聲效果, 二來大聲得黎唔拆, d聲唔會痴埋晒一舊舊, 好細緻
4. 雖然冇左beats audio技術(我好重視插耳筒聽歌質數) 起初我以為佢冇晒音樂技術加持, 我唔會買m8, 後來知道佢插耳筒聽歌o既時候都係用埋BoomSound技術, 我同場比較Z2, 聽落去, 一D都唔差, 個bass好重, 中高音都好好, 而且個音量輸出好夠大, 開到70左右都已經好大聲, 如果開到100, 聾都即刻開耳. 推力我覺得都好重要, 因為有時唔夠力推, 真係到喉唔到肺.
5. 電量方面, 我真係冇咩特別研究過數字, 總之, 我感覺呢部m8去電速度真係比較慢~ 電在我自己就完全夠用一日. 0拿, 本身我就唔睇片既, 電話雖然唔多, 不過就機不離手, , 拎上手, 就一直睇網頁. chat下, facebook, instragram, 玩左成15-20分鐘, 都係用0左幾個%. 而且 真係冇發熱情況, 呢個抵讚~
6. 查實我真係好鐘意佢個BLINKFEED,唔洗開好多個唔同既app.可以好方便咁睇到最新0既資訊, 咩都有, 自己揀自己set. 而且仲可以好方便咁share去唔同0既地方, 呢下真係好好, 有時睇到咩新消息可以即share,比人快一步分享, 唔洗比人笑share埋晒d舊聞比人話out~
6.佢個Dot view膠套真係好好既, 一來其實幾有時代感, 二來唔洗成日禁幾廿百次個開關黎睇時間, 開關都冇咁易壞, 三來平凡中帶不平凡, 用手指點兩下, 灰色套小洞口透出時間, 天氣, 來電人名~. 型爆! 唔洗打開面套, 掃上就係唔聽, 接電話仲唔洗按制呢下勁, 放塊面埋去就已經接左電話講, 完全唔洗掩開個套, 原來佢有個眼球感應器, 透過個感應器知我準備接呢個電話. 如果唔想接, 撥下就可以唔接, 真係幾型.
7. 影相400萬象ultrapixel, 今次其實影野質數真係好好, 出黎效果有比M7好, 因為加埋個距離偵測鏡頭, 影到好強烈0既景深效果, 影出黎, 講真你會睇唔出佢係用400pixel鏡頭, 其實日常影野已經好夠好靚. 同埋由於相0既size唔會好大, save相影相速度快. 所以share出去比人既速度都好快, 好方便
8. htc本身好多執相功能, 我仲未玩熟晒, 其實好多功能, 外裝app都好多, 不過當然始終佢build in最好, m8好在佢build in執相野夠晒多, 而且好易用.同實用.我最怕好多功能點來點去, 麻叉煩. 今日我去食鐵板燒, 我影到火最猛果一刻, 佢可以按實影相制, 之後果一瞬間,cap左好機張相, 仲要即時比埋我揀邊張係我認為最好0既一刻, 廚師一話讚酒, 個個拎起手機, 仲未開晒app.我已經 cap到晒最靚0既火動態, 朋友仔即刻叫我send番晒比佢地, 真威威, 當然仲有好多其他功能.,加四季效果, 飄雪飄葉. 雙鏡頭可以影到3D效果相, 呢個都係好驚喜. 仲有好多其他, 不過果d而家好多手機都有, 我就唔講喇.
9. 前置鏡頭有成500萬象, 自拍出黎真係好清, 效果唔錯. 因為家下人人都玩自拍, 有時唔係冇人幫手影相, 而係好鍾意自拍個感覺, 同朋友好close咁自拍, 係好開心好warm0既事,如果前置鏡質數差真係好冇癮家麻
10. 好鍾意佢個下拉式功能表, 好方便地可以set到機入面大部分功能, 我知而家好多廠都可能會有, 不過htc用起黎個感覺係真係清晰同方便d, 佢軟件真係做得唔錯
11. 用左咁耐, 冇Hung機, 冇疾. 好順好快. 我本身唔打機0既. 睇片睇youtube都有, 睇youtube好順, 好靚個色, 配埋個喇叭, 真係幾正.
缺點:
1. 個鏡頭玻璃好易花. 岩岩買番黎, 當然好多人都會好愛鍚部機, 成日抹. 我已經唔係用紙巾抹, 我買塊成30蚊0既3M專業鏡頭抹布去抹, 點知燈光底下, 都已經開始有微花痕. 其實呢個問題M7果陣已經有, 我M7果個鏡頭玻璃. 已經有好多微細花痕. 長始落去,累積0既花痕越來越多0既話,我覺得或多或少會影響攝影質數. 我以為黎到M8會改善, 呢個問題我都幾介意 我希望佢未來新型號會改個鏡頭玻璃物料啦. 因為部lumia 1020個鏡頭玻璃, 真係到而家都一條花痕都冇, 抹極都唔會花, 個物料真係勁~ 我睇到人地N記呢part 真係一絲不苟囉~ (22/5 有個師兄同我講, 佢話MK 星際有得痴鏡頭貼.前後都有,Imos牌。今日我拿拿林拎去痴, 真係怕左佢之後越來越花. 都洗0左成98蚊~for d鏡頭咋.唔連營幕. 所以, 我奉勸各位朋友買左M8, 唔好突登搵紙巾呀, 其他野去抹個鏡頭, 真係超易花. 因為今次M8同M7唔同, 原來唔可以淨換塊玻璃. 要成個背殼換, 要收錢.... 所以...大家醒目喇) (16-5-2014: 自拍鏡頭玻璃已花, 花到係當我同朋友戶外陽光底下自拍, 由於光線充足, 鏡頭玻璃面折射出黎就特別明顯, 影出黎好似有層霧咁樣, 真係激死我, 我打算拎去維修部睇下有冇得解決,,,,)
2. 有時我覺得個ultrapixel太強烈. 影野有d爆光, 你focus果樣野就梗係清楚啦, 不過如果周圍有d比較反光又或者白色0既物件, 冇晒入面d detail野. 或者可以set白平衡黎就, 不過咪會整到張相整體拉暗囉, 所以我希望日後有更新改善呢個情況, 其實m7果陣都有呢個情況出現.
3. 笠個dot viewer的確型, 不過有個缺點就係好易無啦啦拎住響手, 都唔知掂到佢d乜, 整開左佢個語音撥號功能. 就算set左靜音, 都會發出do..一聲, 除左呢個影響之外, 就算你拎住響手插住耳筒聽緊歌, 你掂到佢開左個語音, 就會停左我個音樂... 之後又要突登入去關閉番, 仲要我按番play, play番個音樂, 呢下真係好鬼麻煩. 希望佢日後軟件更新會改善呢個位, 唔該與人為本少少
4, 機面聽電話同講電話果個位好易入塵, 事原有一次我借左比個女仔傾左個電話, 用完之後, 冇幾耐發現小孔入面有個女仔d粉底>.
我再諗都唔覺有咩特別缺點了~~~~
評價:
我其實係換機達人, 再早果d機,唔講喇, 最近呢兩年我印象係用xperia TX, Lumia920啦, xperia Z, 之後轉htc one. 之後出埋lumia 1020, 之後到而家M8. 係堅持唔用三叔, 個人主觀,比較注重外型設計, 同唔鍾意一街都係.
呢部M8, 係接近我心目中0既完美手機。我到宜家都冇放我部1020, 因為, 佢影相我真係服左佢, 不過, 如果1020 係肯行andriod 0既話, 我心目中既完美手機反而去番1020度,在我, 我最緊要係款要型, 唔會一街都係冇性格, 聽歌靚聲, 影相要靚. 大牌子, 造工好, brabrabrba (好高要求hahaha)1020 款, 造工.音樂, 影相,一流,皇者,係衰響平台上面. 唔好怪我咁好似好hard sell, 我主觀感受0者.
本來, 我真係完全唔會諗出M8,.(如果唔係都唔會出左咁耐之後等到宜家先至去買) 因為M7佢紫光鏡頭真係好離譜, 響就黎過保養期0既最後幾日, 我先的起心肝拎去維修部整, 儘管佢維修部真係服務一流, 要拎手機上去整始終好麻煩, 因為太多資料響入面, 要backup好晒再拎去整真係好麻煩0既事~ 我而家部m7 已經整好send番番黎. 換左鏡頭. 真係冇左紫光問題, 仲要幫我換晒換背全新殼! 當佢公告m8正式規格一樣係用400 ultrapixel果陣, 再知埋佢個定價, 我真係唔敢再用成6千銀去upgrade m8. 如果再係再紫光我真係會火都黎. 所以起初我真係dip埋心水出Z2嫁. 我唔知佢市場策略係咪想又行hungry marketing, 要成6月先有行, 真係hungry到忍唔住, 台水都照殺! 響呢個時間, 平時同我傾交流開手機0既師兄朋友, 雖然之前大家都唔睇好m8, 不過佢後來突然轉口風, 話佢話會想出m8多d, 事關原來佢落0左行睇左部實機, 話好令仔, 同埋好快, 搞到佢好心動, 同埋佢話佢唔係特別大期望個影相. 因為其實我同佢反正都有1020, 影相都唔會對其他現時手機有好大期望. 所以佢話z2同m8,佢覺得m8真係好型, Z2佢拎上手只係覺得好似拎住塊玻璃, 同部Z感覺差唔多, 都冇咩分別. (話說我同佢都用過Z, 大家都放賣晒出去了) 搞到我15.16, 之後果晚即刻research好多資料呀, 評測呀, 突然之後, 我搵到一個網, 就係呢個網, 令我改變, 即刻第二日落去行出機. 不過雖然係咁, 我落到行都同場拎真機z2同m8同時拎上手比較, 睇下出邊部, 我當時即刻慢慢, 試晒音樂, 試晒影相, 最後當然出左m8啦,, 一來M8一拎上手果種感覺真機真係幾型仔(同果陣M7感覺好唔同), 睇相係了解唔到, Z2比我都覺得好似一塊玻璃而己,. 冇咩太大感覺, 拎上手,同果陣我Z真係冇咩分別, 包埋套一定唔會知道係Z2. 同埋個sales竟然同我講sony比較多女仔出, 呵呵, 咁就梗係啦,M8個樣好型, 好剛強. 我拎上手個感覺, 我西裝番公個Look揀直一流, 真係比較岩男仔~~~ 哈哈. 其實果日個sales好cool, 都冇sell我, 問一句答一句, 我真係走去問佢M8多唔多人買, 佢話: 冇咩人買, 多數都係出三叔. 因為好多大6人黎買都係買三叔. (同場我已經見到兩個大6人試緊d三叔....) 我話, 部機咁型咁勁都冇人買? 佢話: 貴丫麻..咁貴冇咩人買. 我見佢個態度都唔似sales 0嘰, 所以我問佢: 比著你, 你會出邊部, 佢話: htc, 佢營幕真係靚, 冇味精, 你咪自己睇下囉~ anyway, 我用緊M8了, 都冇後悔0既~感覺相當之良好~
太夜喇先講住咁多先..
其實個轉捩點令我唔再15.16, 想買M8, 係因為我上網搵到呢位仁兄用m8影0既相, 佢用m8響日本影0既相, 靚到不得了.我完全睇唔出係400pixel影出黎0既, 令我真係領會到, 真係唔可以單憑睇象數高低黎斷定攝影效果~ 所以, 真係唔分享都唔得. 心諗, 我又唔係用0黎晒婚紗相晒大海報, 鬥高pixel冇咩意思, 屋企已經咁多相機, 又有1020, 其實如果講手機影相, 都係最緊要係影出黎d顏色, 同表現出黎0既畫質靚唔靚, 同埋有冇feel, 影相反應快, save相快,share出去夠方便o者, 係咪?~~
不經不覺用左部機已經成兩個月有多, 仍然冇後悔, M8攝力真係有好大進步, 比起M7係明顯進步, 影出黎d相真係好靚~ htc繼續加油~!
就係呢幾個相簿web:
https://www.flickr.com/photos/bestguy-express/sets/72157643060092015/
https://www.flickr.com/photos/bestguy-express/sets/72157635016189417/
https://www.flickr.com/photos/bestguy-express/sets/72157633015792195/
https://www.flickr.com/photos/bestguy-express/sets/72157634618373633/
https://www.flickr.com/photos/bestguy-express/sets/72157645047816120/
前面係佢響台灣影0既相, 質數已經好好, 後面日本果d, 真係好到容易導到人地心郁郁買m8囉 hahaha