2016畢業旅行推介 ：3大創意路線 + 5個慳錢貼士

咪以為5月先完Sem，Grad Ttrip唔使咁早Plan。學生哥資金有限，趁仲有時間買到平價機票，一早預定行程，自然可以慳錢又玩得放心。你嘅 Grad Trip Plan好未？想唔想有個有創意嘅Grad Trip旅遊路線？有乜Grad Trip慳錢貼士？等MoneyHero.com.hk幫幫你！

 

3大 Grad Trip 創意路線

1）尋找自我之旅：東南亞（老撾、越南、柬埔寨）

如果你冇乜錢，或者未諗清楚畢業後自己嘅去向，諗住一個人去旅行尋找自我，呢個 老撾、越南、柬埔寨行程可能適合你。濃烈嘅宗教氣息再加上歷史遺跡，更有趣嘅係，你其實可以選擇一人電單車之旅，無論係老撾定柬埔寨，都有大量二手電單車 出售，當你完成咗呢一段心靈之旅，部二手電單車仲可以用差唔多嘅價錢賣返出去添！（當然，前提係你識得揸電單車。）

2）藝術之旅：日本瀨戶內國際藝術祭

去日本，東京、京都就玩得多，想趁Grad Trip嚟一個知性日本之旅？大家可以試下去3年一次嘅瀨戶內國際藝術祭！ 喺日本本州同四國之間嘅瀨戶內海，上面有7個小島，而瀨戶內藝術節就係每3年喺呢啲小島上進行，旅客可以欣賞極多有價值嘅藝術品，同時了解與海洋共生嘅島 民生活。藝術節嘅春祭由3月20日到4月17日，而夏祭就由7月18日到9月4日，大家可以選擇由大阪前往，或選擇例如HK Express直航往岡山嘅飛機！

3）創意開拓之旅：歐洲（德國、荷蘭、比利時、法國）

想喺歐洲大陸開拓自己視野？推薦大家以德國柏林作膽。柏林而家係歐洲嘅創意中 心，好多最前衛嘅藝術家都聚集喺柏林。然後大家可以去荷蘭嘅阿姆斯特丹（一個幾乎全世界最開放嘅城市）、比利時嘅安特衛普（一代時尚美學發源地）同法國嘅 巴黎（由文藝復興到現代嘅文化遺產），全部都係可以等你開拓視野嘅好地方！

5大 Grad Trip 慳錢貼士

各位出發去Grad Trip前，記住一定要帶你哋張4年前影嘅醜樣學生證！皆因你嘅學生優惠仍未完，好多時都會去到6月底。唔好以為外地人唔會承認你張學生證，實情係好多時佢哋都會照俾學生優惠你！

1）車票 / 火車票學生優惠

以去歐洲為例，如果你仲係學生（12至25歳），你就可以享用優惠去買Eurail Passes。用呢個Pass你可以喺特定嘅地區無限任搭（請自行留意細節）。另外要注意，學生優惠好多時只係跨國Pass專用，但各國當地鐵路嘅學生優惠通常只限本土學生，一個唔留神俾人罰錢就無謂。（想了解更多不同的歐洲火車證資料，可按此。）

2）買學生機票

好多航空公司，都會不定期推學生機票，例如國泰都不時推出大專學生飛計劃，有得買平機票之餘，仲可以賺埋Asia Miles。另外，你亦都可以去學聯社或一些機票Agency問問，佢哋都會有平機票，出發時，不妨可以問下先。

3）博物館 / 景點學生優惠

博物館控注意！如果你哋係去歐洲的話，一定要帶學生證，因當地城市閒閒地都會有8、9間博物館，學生通常都會有半價優惠，真係幫你慳唔少！

4）住學生宿舍

有時各地嘅大學會有合作，預留學生宿舍房作為Summer短期學生房，提供俾合作伙伴，價錢分分鐘比青年宿舍更低！不過呢啲機會唔係經常有，各大學生可以問下你哋嘅所屬院校。

5）ISIC國際學生證

某啲國家未必承認你張本地院校學生證，所以你最好申請ISIC學生證。呢張國際學生證，同好多機構都有合作，例如Hostelworld、Hard Rock Café等等。如果想知目的地有乜嘢飲食旅遊優惠，可以上佢官網睇睇。

 

圖文轉自：http://www.moneyhero.com.hk/blog/zh/grad-trip-2016-%EF%BC%9A3%E5%A4%A7%E5%89%B5%E6%84%8F%E8%B7%AF%E7%B7%9A-5%E5%A4%A7%E6%85%B3%E9%8C%A2%E8%B2%BC%E5%A3%AB