日本九洲 攀山越嶺
首先去片：https://www.youtube.com/watch?v=PluRuLhsTNo
全程Gopro拍攝
2017年第一個旅行，一月廿一日下午上想機。日本時間1750到達鹿兒島機場。事關日本氣溫比香港低，所以要首先要習慣當地溫度，一月平均 -2℃至16℃，日夜溫差都頗大。
目的地：日本九洲
Day 1：鹿兒島機場、指宿市
Day 2：開聞岳
Day 3：福崗、博多
Day 4：高千穗町
Day 5：宮崎、青島
Day 6：宮崎、Sun messe 日南
Day 7：高千穗峰
Day 8：鹿兒島市
Day 1 指宿市 晴 4℃：
黃昏黎到鹿兒島機場。為左消磨去指宿市既時間，即刻食碗拉麵先。事關機場餐廳，就唔好太執著質素，正正常常吧。食飽飽就去搭巴士去指宿市，需時大概90分鐘。然後搭車行左20分鐘到第一間民宿，結束第一日。
Day 2 開聞岳 陰 5℃：
第二日係成個旅程重頭戲之一既登山活動－開聞岳。行山前係需要由搭JR指宿駅到開聞駅，需時大概30分鐘。上山前食個lunch，今次我地就揀左間意式餐廳食。之後就準備上山啦。今日天色一般，陰天多雲。一開始山行石屎馬路，輕鬆。之後進入山路段，大致上難度不太高。接近登頂，一點點白色徐徐落下，對於未見過雪既我地表示興奮。終於登山，雨雪夾雜，非常凍，只得-6℃。建議穿戴足夠防寒衣物，另外，普通手套係唔夠保暖，要買雪山專用手套。落山之後我地搭JR到鹿兒島市食晚餐，吉烈豬扒定食。最後我地嘗試下搭通宵巴士，鹿兒島→福岡，需時6小時20分鐘
Day 3 博多 晴 8℃：
第三日6點我地就落車，之後食左個麥當勞早餐，日本既麥當勞高質過香港好多，十一點，我地搭車去左第個OUTLET 叫Marinoa City，聲稱去九州必去前往博多車站正前方A公車乘車處，搭乘西鐵巴士303坐到終點站就係瑪莉諾雅城，單趟行車時間約為40分鐘。有Sports DEPO大型運動商店，講得出既運動用品都有，運動人必去之選。
Day 4 高千穗町 晴 6℃：
是日目的地係高千穗町，由JR博多旁巴士中心出發，需時3小時30分，車票最好預先購買。車程沿途風景怡人，因為天氣係冬天，所以好多白茫茫既雪景。話咁快就到，我地黎既主要任務係係高千穗峽划艇。車站我行去高千穗峽都要行一段距離，但指示好清悉唔怕迷路。沿路有好多特色小店，行大約半小時就到了。如果旺季黎划艇，建議早上或前一日預約，以免Full Booking。預約後，我地經過一間流水麵店，真係相見不如偶遇。味道不俗，我地仲加左麵，另外原來夾失左既麵會比番你食。食飽飽就去划艇，一落到艇划出去，發覺高處望下同係現場好大分別。划到瀑布下，完全感受到震撼，但係非常凍，因為本身得幾度加水氣。每30分鐘為一段，個人發得已經足夠，因為唔係太長。划完就番民宿，七點半出去食晚餐，發覺大多數店鋪都已經打烊。最我後入左間壽司店，老闆仲請左我地食桔。高千穗町之旅完。
Day 5 宮崎 青島 晴 6℃：
一大清早又係搭車離開既時間，前日係博多黎高千穗町要3.5小時，衣加去宮崎都差不多。到左宮崎市，我地食完午餐就馬上起行到民宿，宮崎既民宿係叫青島既地方，事前我地唔知係一個咩地方，只係地圖見近海就BOOK左。出發可以買張遊客PASS，日南海岸巴士線無限任搭。過左大約一小時就到左青島，我地決定去左青島先。到左青島發覺有極度開揚既無敵海境。島上由沙石組成，島上有個神社。島上被石包圍，後來上網睇原來有「鬼之洗濯板」之稱，之後去島另一邊，見到有一個熱帶植物群落，配上無敵大海景簡直風景如畫，繼續向前行就環島完畢，日落西山就回到民宿。
Day 6 宮崎Sun messe 日南、飫肥 晴 10℃：
今日去既地方係我最想去地之一，就係有「偽復活島」之稱既Sun Messe，呢到有仿製真正復活島既石像，當日天氣極好，萬里無雲，Sun Messe 係宮崎日南海岸既主題公園，鄰近海岸配合石像，簡直係視覺享愛。公園內有好多仿製古跡，例如天空之塔、感謝地球的鐘。睇完古跡就可以去園區下方，有一隻隻既牛、羊同馬，大家可以去玩下。玩完食左個Lunch，味道一般。之後見時間仲早，見到巴士線尾站有個叫飫肥，好奇心驅使就去左，一落車發覺原來係古城黎，有座叫飫肥城，周圍都有好多充滿歷史氣息建築，不過除左飫肥城，參觀其他都要比錢，我地就冇咩興趣，飫肥城冇咩特別，最令人吸引就係城內地一片樹海，影相一流！
Day 7 高千穗峰 晴 10℃：
行程接近尾聲，黎到霧島做完美作結，登上高1574米既高千穗峰。首先搭JR到霧島神宮站，出到黎有我巴士上去霧島神宮，到達霧島神宮然後拜個神就可以開始上山，係Google 地圖app打高千穗峰就會有路，或者去詢問處問路。路程如下：
霧島神宮---1.5小時--->高千穗河原---1小時--->御鉢---30分鐘--->高千穗峰
時間因人而異，只供參考。去高千穗河原條被森林包圍，又長又悶，去到河原大約900米，好彩既話可以撞到老闆娘開鋪，可以食下拉麵、烏東，鋪內仲有好多特色既小物同食物，不坊尋下寶，老闆娘都非常好客。食飽就繼續上路，行上御鉢路程最艱辛，建議帶備行山杖協助上山，到達御鉢已經超過1200米，風景好開揚。有一片小空地，可以俯瞰御鉢呢座死火山，旁邊有一個小神壇。距離山頂大約仲有280米，但係呢280米絕對係難度最高，上之前要戴好所有裝備例如手套同冷帽，呢段路好大風，呼吸都好似冇咁暢順，建議慢慢行。上到頂景色開揚，真係一世難忘！
Day 8 鹿兒島市 晴 12℃：
最後一日，1850飛機起飛，我地係鹿兒島市周圍逛逛，鹿兒島市既商場都幾多野買，食完午餐買左少少野就起程回港，九洲之旅完滿結束。
