【轉載】戶外Camping樂 -- 香港10大 露營地點 好去處
週末放假想去郊外盡情享受一下大自然美景，露營自然係最好不過嘅選擇。日頭同親友行山燒烤，夜晚觀星賞夜景，再等清晨睇日出，遠離鬧市煩囂，實在係爽！香港雖然人煙稠密，但境內其實都有不少露營好去處，HelloToby為大家推介10個人氣 露營地點 。
1）白臘營地
營地地點：西貢東郊野公園（萬宜水庫萬宜路白臘村）
營位數目：10
設施：燒烤爐、枱、櫈、旱廁
交通：於西貢市中心乘搭九巴94號；或者於假日及公眾假期，由鑽石山巴士總站乘搭九巴96R；想搭小巴嘅朋友則可以喺西貢市中心乘搭7號專線小巴，於北潭涌下車後，沿麥理浩徑第1段車路走前往營地，大概要步行2小時。
特色：白臘營鄰近萬宜水庫東壩同白臘村，喺度露營可以欣賞到萬宜水庫同西貢東半島嘅景色，清晨時分仲可以到東壩睇日出添！對地理學感興趣嘅朋友不妨順便去東壩對開嘅香港地質公園範圍內嘅破邊洲，附近一帶布滿六角形岩柱群，包你睇到嘆為觀止！
2）浪茄灣營地
營地地點：西貢東郊野公園（西貢浪茄沙灘）
營位數目：6
設施：燒烤爐、枱、櫈、旱廁
交通：於西貢市中心乘搭九巴94號；或於假日及公眾假期，由鑽石山巴士總站乘搭九巴96R；又或於西貢市中心乘搭7號專線小巴，於北潭涌下車後，沿麥理浩徑第1段車路走，大概步行3小時到達營地。
特色：對地質冇興趣嘅話，不如去東壩另一面嘅浪茄灣，欣賞號稱全港最美嘅沙灘啦！呢度水清沙幼就唔使講，而且沙灘平坦而寬廣，視野開闊，加上地點偏遠，人跡罕至，可以不受外人打擾咁觀賞南中國海嘅無敵靚海景，令你忘記工作嘅壓力同煩惱。
3）籮箕灣營地
營地地點：南大嶼山郊野公園
營位數目：10
設施：燒烤爐 、枱、櫈、污水穴、晾衫架、旱廁
交通：由東涌市中心乘11號或23號巴士；或者由梅窩乘1號或2號巴士，於水口村站落車，沿鳳凰徑第9段逆行前往營地（往石壁方向），步行約需25分鐘。
特色：如果你係露營新手，咁籮箕灣營地就好啱你！一來交通方便唔難去，二來籮箕灣擁有乾淨美麗嘅海灘，最適合賞星觀日出，享受寧靜美景。
4）東龍洲營地
營地地點：東龍洲炮台特別地區
營位數目：10
設施：燒烤爐、枱椅、資訊板、垃圾桶、涼亭、旱廁
交通：於鯉魚門三家村公眾碼頭，或西灣河筲箕灣避風塘乘街渡到東龍島，不過只於星期六、日同公眾假期提供服務，所以記得要配合船期提早計劃。
特色：從東龍洲碼頭步行約20分鐘就可到達營地，路勢平坦不難行，而且營地入口附近有士多，方便購買補給。營地三面環海，景色優美，附近更有炮台古跡，可了解香港當年防禦海盜嘅歷史。
5）西貢灣仔西營地
營地地點：西貢西郊野公園灣仔擴建部分（西貢灣仔半島西）
營位數目：20
設施：涼亭、燒烤爐、枱、櫈、大型浴室及洗手間設施
交通：由西貢市中心乘搭7號專線小巴，於海下村總站下車，再沿大灘郊遊徑，約走45分鐘就可抵達營地。
特色：營地有大片草地，設有多達20個營位，環境空曠廣闊，好適合晚上觀星。營地有設有燒烤爐、大型浴室同洗手間，設施相當齊備。營地附近係海下灣海岸公園，如果天氣好又撞正退潮嘅話，仲可以喺海下村碼頭附近，睇到水中嘅珊瑚同珊瑚魚。
想知更多秋日露營好去處？即上HelloToby Blog看完整文章！
