Fever 達人文章分類

閃電拍攝分享 (附加後記)

自從意外出院後,這兩個月一直在家養傷,進度還算不錯,只是長時間在家,不能如常外出,難免會有點苦悶...不過,這不表示這段期間放棄攝影,因為有些機會總不能錯過...在有能力下,都會盡力試一次。

時為2014年5月11日,適逢母親節,但那日天公似乎不給母親一些面子,偏偏要在夜晚來一場雷雨...一道道雷光,如閃光燈一般在夜空閃耀...更有一條條閃電劈向地上...唔,天下間真的這麼多不孝子嗎??(笑)

不過這晚的雷雨並不影響在家慶祝母親節的雅興,而且對行動不便的我而言,是一個大好機會...因為之後那幾日天氣好轉,未必再有這麼好機會拍攝閃電。

結果,這幾張照片都可算是這晚的收穫,算是唔錯了吧,畢竟自己仍然負傷在身,不能隨便外出呢...而且拍攝閃電亦好講天時地利及運氣的,因為你根本沒有可能預料到閃電幾時失驚無神在哪裡劈下來的。

此外,亦不得不讚我的睡房,是一個很好的位置...只需將我的相機及小型腳架這樣掛在我睡房窗花內就可以,輕鬆,安全,又唔駛淋雨。

曾有朋友問我,點樣影到閃電...其實方法比較簡單,是同用腳架影夜景的原理一樣...所以,我個人是習慣用以下的設定: 30秒, 光圈f8-11, ISO100~200 (謹供參考,視乎現場環境光暗而定)

不過可以的話,盡量讓相機連續拍攝,所以用快門線的話就最好...為何??因為閃電是沒有可能預料到它幾時失驚無神劈下來,因此大可以由得部機在連拍狀態下不斷每張曝光30秒,務求在那段連拍時間下都可以有幾張中閃電所以,這是可以確保你不會錯過可能瞬間出現的閃光。

當然,事前準備也不可以少,事前亦要留意天氣報告及天文台網頁提供的氣像雷達及閃電位置資訊,以便掌握雷雨區的規模、影響範圍及其移動方向,方便你決定向哪個方向拍攝...當然,如果只能在家拍攝的話,就更加要視乎自家窗外的方向是否屬於受雷雨區的影響範圍。

例如,雷雨區在新界西或北一帶影響,但你屋企在葵青區,自家窗外的方向是向東南偏南,而且雷雨區向東移,對你身處那區的影響不大...那你在東南偏南方向拍攝到閃電的機會就大大減低;相反,你在西北或北方向拍攝的話就提高機會了。


(攝於蒲台島, 2013年6月9日)

有時,留在室內拍攝雖然安全,但可以拍攝的方向就比較有限,彈性較少...所以拍攝閃電還是外出拍攝比較有彈性。不過,要是非要外出拍攝不可的話,還是要小心為上,盡量在安全情況下拍攝,避免在高地及空曠的地方拍攝。

雨季已到,出現雷雨的天氣亦會隨之而來,所以有興趣的話,好好把握機會,在屋企試下先了。

 

後記(1):

在刊出了這篇文之後,收到一些意見...坦白說,我亦在網上看過其他師兄師姐在當晚拍攝出來的閃電照片,有些真的好有氣勢的,同我那些相比起來,真的比下去的...

2014年5月21日凌晨,又來多一場雷雨...我再嘗試多一次,結果亦引申了我以下一些感受:

可能,我拍攝的方向及位置並不是雷雨帶經常活躍的區域,而且我的行動力十分有限,所以影得沒有其他人有氣勢是可以理解的事。反正,我們不是雷神奇俠,閃電的位置、規模及大小根本就不是我們可以控制及掌握。


就算你前期的準備功夫足夠,要是沒有足夠運氣,沒有人算不如天算的覺悟的話,任由你有幾多雄心壯志要影得最好最有氣勢,最終都可能有不如預期的結果。

有些東西,影到有時比影得好更加重要…尤其是你影的是那些既只在瞬間出現,又變幻莫測的東西更甚。拍攝閃電就是這樣,沒有人話它好易,但又沒有人話佢好難,然而左右一切成敗,往往就是運氣...

 

後記(2):

有人認為我的setting是hea影,是搏大霧,是錯誤...是只會影出好似玻璃裂左咁奀吱吱的閃電...

不過,以下這張相是在2010年9月9日,以我現時用的setting,在我屋企拍攝出來的...請各位看看那些閃電是否好似玻璃裂左咁奀吱吱的...


(30秒, f/11, ISO125, 16mm,
 Canon EOS 50D, EF 16-35 f2.8L II USM)


分享感想
  • bb1915200 @2014-05-26 23:06:48
    好正,我有幸自己用眼去見過2次道電閃落黎,一次返學,1次放學
    可惜屋企的位置不太良好,真係想自己都可以影下閃電
    支持你
  • joy886 @2014-05-22 13:03:35
    30秒, 光圈f8-11, ISO100~200 這 setting ok , 莫非用 ISO 409,600加1/2000 去影? 快門太快根本拍攝不到 , 雷電如閃燈要同步或比它慢 !如果不 hea 的話.......... 用黑咭 ! 但問題是雷快還是你快 ?人家閃了你才開咭 !! 而且你能預知嗎?? 氣勢的話很視符環境角度 , 真係要人家走到海邊呀山谷呀大空地囉 ! 想人死咩!(玻璃裂左咁奀吱吱的閃電) 是地區性你想粗壯呀 PS 吧有多粗有多粗, post 出來給人狠批的確不是味兒 , 有更好 setting 可拿出作品給大家分享 ! 但環境不同你的更好會是最好嗎?我覺得 setting 不重要 , 最重要是拍攝者得到當中樂趣亦得到他想要的效果就可以 .
  • 千紅 XDD
    @2014-05-22 01:04:08
    問心
    三兄寫的不算錯
    看過其他發文的相片
    當中的多元化和功力質素也當得上達人之稱

    挑剔的是寫得太細太雜
    活像去一個地方出一篇文 也不是大景時份

    批評他的人先拿堆貨出來看看是不是那麼令人信服
  • 4lanchai @2014-05-21 23:40:21
    有必要開個新account 黎留言嗎?
    唔駛咁緊張喎。
    放心,根本我唔係黎挑機,你認為我吋既都係咁話。
    就算呢個account 唔係你本人,佢都已經越幫越忙,
    唔係想話就咁放低一句兩句就走人,
    但似乎真係對牛彈琴。係咁。
    阿三 
    @2014-05-22 00:53:47
    雖然你不是同我講...但都要補充下:
    我相信你都唔係黎挑機既...之但係,言者無心,聽者有意,其他人未必都是這樣睇...
    你寸咀,我沒所謂,反正把口生係你度...之但係,你這種寸咀的意見換轉是其他人的話就好難令人接納及信服...分分鐘冒犯了人都唔知

    既然係對牛彈琴,那你都冇必要再在這裡單單打打,放低一句兩句就走人...再講落去都已經沒有意思...
  • StevenPhoto @2014-05-21 22:46:44
    阿三的閃電相未必是頂級,但絕對見得人。
    反而網上太多人"講就無敵、做就有心無力"。只會講"無謂教精你"之類的說話,我就吾係要你教,只係要睇下你幾多料,你有料但吋,最多話你無品。否則就吾只無品!
    我都吾係ㄧ定要見識所謂大作,網上大把有得睇!
  • 4lanchai @2014-05-21 21:31:26
    我並無話你冒犯到我,唔駛道歉! 你都get 唔到我指出既問題,何來接受意見?
    你用達人名黎出post, 就要責起達人既責任,唔好而家又話唔係達人,好多人唔識分。
    每一點都搵啲似是而非既野黎遮掩,此post 如是,上次整親腳亦如是,就係你跟本接受唔到他人意見,你知道你跌一跌要幾多人做野幫你,你知道的。但係睇返你上次個post, 基本係無歉意,都係我行我素。
    根本呢次回應你我係多左,多講真係嘈交而唔係指向問題。
    如果你真係諗到每個場景光暗用唔同setting, 上面咁多張相點解唔搵一張轉下呢?
    講到尾就係而家事後搵野黎自圓。
    樓上有師兄講得好架,咩叫影品,接受唔到人地意見都算無影品! 就算第一post 我好斯文同講有問題,你之後都會用相同藉口講每個人感覺唔同架啦。
    係,感覺唔同所以影出黎既野咪唔同囉,所以咪永遠固步自封囉。
    你有你自由,但唔好每一樣唔啱既事都推得一乾二淨。
    就係咁多了,好自為之。
    阿三 
    @2014-05-21 21:58:23
    你有意見你可以提出來,我無任歡迎...但採納與否是由我決定,我會判斷你的意見合理與否才決定是否採納...

    與其說要接受你的意見,倒不如問你自己憑甚麼要人地接受你那套...你這種回應何嘗不是自我,不在別人的立場思考及理解,更以自己那套的標準強加於別人身上,以己度人,這更加是比接受唔到人地意見更加無品之極...

    再重申一次,既然你認為我的setting是錯的話,那請你用你的方法去拍攝出來,以証明你的論點正確...在這裡單單打打紙上談兵,是不能證明你的意見值得令我去採納...
  • Pluginjack @2014-05-21 18:03:04
    各位,我係acc: 4lanchai 三哥一睇到唔支持既留言,就第一時間BLOCK左我acc 禁言,本來都想就咁算,費事越鬧越大,但都想講清楚先收聲!

    點先影得好就無謂係度討論,我而家角色係衰人,無責任係度話比人知要點影點影,但係如果想影奀吱吱既大可跟住三哥既setting 收細到F8-11, 用30s 去捕!咁大家一定可以影到上圖畫面!
    另外唔係講句外出要注意安全就算,如果有人聽三哥講,出街外影靚啲,出左意外既話點呢?有時啲野知道唔一定揚架,唔通我話:最衰嗰日無上山影啦,上山一定影得好,你地閃電上山要注意安全呀。咁樣又點?
    我第一次留言係因為佢setting 太hea, 30s 細光圈根本搏大霧,咪就係上圖嗰啲囉!
    佢仲要賴因為隻腳受傷出唔到去,三哥你係咪仲係為呢啖氣想再冒多次險呢?
    上次為影相整親腳都應該諗下野啦,今次仲賴隻腳令你出唔到去影?
    Ok 你可以話你安唔安全唔關我事,好,就當影相嗰日你行得走得,用你「習慣用既 setting」相片結果都係一樣。
    各位可以keep 住話我無禮,我唔care, 亦唔會係呢度出相作証,以心為心你地想影閃既可以自己試左先,係度嘈無用。我唔回佢都得架,三哥可以拎住支持你嗰啲留言繼續傷春悲秋話有人蝦你,但如果想大家攝影技術有進步,唔該唔好諗都唔諗就搵藉口。
    如果個個人見到唔啱既事都唔出聲,下下要恭維地大師前大師後既話,呢啲場面好健康咩?睇完要心裏有數邊啲先係真邊啲流料,叻既就話隔到渣啫。新手點呀?咪又係睇留言個個都讚,照跟無衰啦卦。
    最後都係目標為本,各位大師可以試下風大雨大,好注意安全咁出街用三哥setting去影,影到好野返黎就大把人讚架啦!駛乜理啲無謂人亂講丫!
    OK, 就此打住,各位隨便繼續鬧。。。。
    阿三 
    @2014-05-21 20:14:37
    block你禁言,基本上是覺得你一開始的留言無禮,而且帶有敵意...所以以你的語氣及態度根本不會有討論的意義,要是唔block你的話,只會引來更多爭執...如果這樣又有冒犯你的話,那就真係唔好意思...
    須知道,你的意見我是接受的,但不表示連無禮的說話我可以照單全收...更何況在這裡我根本唔知道你是誰,所以別以為"一場相識"就可以連無禮的說話都要人地照單全收...

    我不是咩大師,亦不是咩達人,只是一個很普通的攝影者,純粹分享下自己的經驗而已,真的沒有意圖在大師面前班門弄斧...我分享的經驗是否亂講,由各位判斷,覺得有用的就參考下,覺得垃圾的大可以不看...

    如果你認為我的setting是錯的話,那請你用你的方法去拍攝,以証明你的論點正確...而不是在這裡單單打打紙上談兵...

    不過,影呢D是否有絕對的setting,我認為唔一定了,都要視乎當時的環境光暗而調整...所以我在這篇文提供的setting謹供參考
  • Eddie Kwong
    @2014-05-21 16:01:02
    三哥加油, 祝早日康復...^^
  • Golfer512 @2014-05-21 10:56:05
    首先多謝阿三師兄的分享,可以感受到你對攝影的熱情,同時分享左拍攝閃電時的知識。更重要你對別人的批評當作指導來看待,證明你是一位很謙遜的人。比多個讚你。

    aedis821 兄講得無錯,現今的香港太多負能量,要批評人或事太容易啦,懂得欣賞別人好的一面,多給讚賞,就得於結好緣,這就是“隨喜”。

    4lanchai 兄,你可以分享到“點先可以更有氣勢?而唔係好似玻璃裂左咁奀吱吱及前期setting 有咩緊要“ 的話,我相信大家都會欣賞你,讚歎你的!
  • Kala @2014-05-21 10:54:06
    終於明白点解話影品比影技更重要!
  • wllui @2014-05-21 10:12:06
    感謝分享

    攝影是態度, 在人家的POST咁批評我只覺得沒有風度
    網上讀者都係為興趣來看, 我覺得阿三師兄的POST已達其目的, 改進技術是靠自己不段嘗試, 誤人前程/子弟 未免太言重

    腳傷左都仲要影, 配得起"達人"兩個字
  • aegis821 @2014-05-21 09:35:06
    4lanchai 師兄,唔知你有無D咩佳作分享下比大家欣賞下呢?
    阿三師兄都已經講明有腳傷同係屋企休養時影,
    係咁既情況下仍放不下攝影才與大家分享,
    你又何必咄咄逼人呢?
    誤人前程?你講得太誇張啦

    香港地太多負能量,學懂欣賞別人的努力,而唔係係度網上批評做鍵盤戰士。
  • 4lanchai @2014-05-20 20:09:50
    三哥,影得到唔代表影得好,好彩你寫係分享,唔係話教學。
    總算一場相識,留返餘地比你自己諗諗,上面幾張圖點先可以更有氣勢? 而唔係好似玻璃裂左咁奀吱吱。
    就算係影閃電得靠運氣,前期setting 都好緊要。
    人家比得達人個名你,請小心出post, 大把新手以呢類post 做師傅,小心誤人前程。
    阿三 
    @2014-05-20 23:44:55
    真的很抱歉,係我影得唔好...
    我當時的拍攝位置基本上是向東南方向,然而雷雨帶大多是集中在新界西北位置,是在我的後方...
    所以,真的很抱歉,我左腳受傷,行動不便,無法外出向西北方向拍攝,引致拍攝出如此廢到無倫的作品出來...

    如有誤人子弟的話,謹此萬分抱歉!!!
阿三 的其它文章
一開始已經是錯誤的寫真 阿三 (圖片來源:Wing Ysf facebook專頁) 近期書展中鬧得熱烘烘的話題,恐怕是6歲小女星楊鎧凝(Celine)寫真集一事,問題的重點,在於寫真本身有部份照片有懷疑不雅及意淫成份,並批評女童母親及負責的攝影師;另一邊... (繼續閱讀)
編輯推薦
尋找雲海的故事 阿三 雲海,是一種當你置身在高山,山下四周都是一片片很低雲層的景象,這種景象猶如置身仙境一般。 過去幾年,不少風景攝影愛好者都會專程在入春時份走上香港三大高山——大東山、鳳凰山及大帽山,拍攝雲海日出,加... (繼續閱讀)
雨傘運動 - 由「星空攝影者」到「時代見證者」 阿三 已經很久沒有在這裡分享我近期的近況...只可以說,這個2014年年尾可是"多事之秋"。  先說說左腳腳傷的情況,經物理治療後,由最初用行山杖輔助,到現在已經唔需要用行山杖,可以如常行路,當然,鋼片仍然鑲在腳踭內,仍... (繼續閱讀)
閃電拍攝分享 (附加後記) 阿三 自從意外出院後,這兩個月一直在家養傷,進度還算不錯,只是長時間在家,不能如常外出,難免會有點苦悶...不過,這不表示這段期間放棄攝影,因為有些機會總不能錯過...在有能力下,都會盡力試一次。 時為2014年5月11日,... (繼續閱讀)
意外經歷 阿三 為了攝影,可以有幾盡?? 我不敢說,但這次會令自己受傷,是始料不及的結果。更想不到的是,這次意外,將要用2至3個月甚至半年以上時間才可以復原。這段期間,好多預計要做的事都要被迫擱置及重整… 在3月中的一... (繼續閱讀)
星塵回憶錄 - 大東。雲海。銀河。日出 阿三 如果有人問,香港有沒有一個美麗得要帶淚觀看的天地,我會毫不猶疑地說:有,我首推大東山。的確,大東山我已累積去了5次,5次都是令我印象深刻。 就在剛踏入這個2月的年初二,Herman開團上大東山,本來我可以... (繼續閱讀)
電視劇星空拍攝誤導教學 阿三 本來,我平時因為工作及返學關係,根本沒有時間及興趣睇電視劇,尤其是無線雞汁台那些肥皂劇。 但要不是有朋友在facebook提及在昨晚(20.11.2013)播的"On Call 36小時"劇集,當中有演員教男主角拍攝星空, 其講述的內容... (繼續閱讀)
Canon EOS 70D 兩星期實地試用體驗分享 阿三 在8月下旬至9月中,我有幸得到朋友的介紹,參加Canon舉辦的EOS 70D優先體驗會,並獲大會借用EOS 70D進行兩星期的試用體驗。參加過後,EOS 70D已交還,但畢竟自己是難得第一次參加這種新機試用體驗,所以自己都打算... (繼續閱讀)