5 Nov 2019
筆者住大埔,由大埔出發上大帽山,已經變成筆者日常行山路線之一。沿途必經麥理浩徑8段,四方山沿途景色優美,又可登上全港最高山大帽山,沿途一路打卡,終點又有得影日落,下山路程近,又可以搭巴士回家,確實係一件賞心樂事!
正式開波嗰日所見所聞!
嗰日行到咁上下,陽光開始柔和,我又諗起自拍撚mode!剛好呢個位置個山一半有陰影一半透光。筆者近排又買咗老鏡Helios 44M 58mm f2(八羽怪),其實筆者近排係咁測試緊呢支鏡頭,諗住遲啲出文章,不過仲未摸熟支鏡頭特性,初步有啲見解,夜晚進光量特別低,眩光基本上下午3點至6點就有機會發揮,所以仍在儲相階段。果刻,陽光對呢支鏡頭爆發得好勁,我第一個構圖完全啲flare太爆,後製之後都唔能夠出相,所以放棄。故採用第二個構圖張相,時間只過數分鐘,陽光柔和,flare輕微減少效果,可以出相。
58mm iso64 f2.8 1/2500 (由於自拍關係,略收光圈,增加中fou範圍)
自拍都搞咗唔少時間,要趕上大帽山頂影日落,加快腳伐先!沿路中比我見到有趣事。第一,周圍都有芒草。第二,大帽山波波打落嚟嘅陰影,即刻構圖打返張卡先!
85mm iso64 f4 1/1600
打完卡盡快起步,行咗幾分鐘又見到有趣構圖。呢個位日出影過,日落未影過,呢個時間側光好靚,理所當然打卡!唔知大家有冇留意前景陰影呢?陰影係大帽山波波。
58mm iso64 f5.6 1/125
行左幾秒之後,抬頭一望,光線好完美,嗰日咁啱帶咗鑽石廣角,又係表演星芒時候,鏡頭flare係我之前諗漏咗一個驚喜,算係意外收穫!筆者覺得呢張相個構圖好有層次,前景係芒草,中景綠色山坡,後景係大帽山個波波,再加埋陽光爆發出嚟側光,加d flare,構圖自覺幾豐富!
30mm iso64 f13 1/100
再唔行快啲,真係趕唔切magic moment !一氣呵成!攻頂!搵位構圖!話明呢個幾月芒草係主角,構圖點少得芒草呢!
20mm iso64 f7.1 0.6s
總結:
只不過係日常行山打卡,無論影唔影都靚景,都真係冇乜所謂。香港成日咁大煙霞,真係要同煙霞做朋友。大煙霞並唔乞人憎,最緊要識如何用欣賞角度。呢一個幾月,係芒草盛放的時候,故筆者構圖都以芒草構圖行先!
希望黎緊有機會或者有mood分享其他野,老鏡、新鏡頭又好,日常遇上大景出動經歷又好~唔知下次幾時,會遇咩大景又可以成個故仔咁呢^.^v
歡迎加ig交流!
instagram: andrewncy.images