今次教大家拍攝你第一段Tiny Planet影片:)
鍾意睇片嘅話呢，可以睇呢段片嘅教學，廣東話，中/英文字幕
Tiny Planet Video, 中文又叫小星球影片，即係拍攝場景會變咗一個小星球嗰啲video，而當人響呢個小星球上移動的話呢，畫面就會變得好有趣㗎喇
睇下幾得意XD
今次會教大家用三個步驟去製作你第一段 Tiny Planet影片
一，買360相機
如果你淨係想影Tiny Planet相片嘅話，其實用手機都可以做到嘅，但如果要影Tiny Planet影片嘅話呢，就一定要有一部360全景相機喇。
依家360相機都唔算貴，一部全新嘅入門級大概港幣$2500左右
買二手嘅話呢，我見過大約$1000都有交易。
大男孩鍾意用Insta360既相機，想知道影像質素嘅話呢，大家可以睇吓我個IG或者Tik Tok。GoPro同埋Ricoh都有出360相機，大家可以按喜好去選購嘅
二，設定相機去拍攝
記住，錄影Tiny Planet同錄影普通360影片嘅方法係一模一樣嘅，設定到影片模式，撳掣開始錄影
全景相機係會影晒佢周圍360度嘅畫面嘅，當你隻手揸住部相機而且距離近，會擋住個畫面，好礙眼
要改善嘅話好簡單，用自拍棍就得喇。
今次用呢支JOBY Telepod 325，我之前有介紹過既，有興趣撳呢度可以睇返篇文章
用自拍棍呢都有技巧個喎，相機一定要同支自拍棍連成一條直線，好似咁樣
千祈唔好將部相機屈起鏡頭對住自己
唔信呀，你睇吓影出嚟會係咁㗎，支自拍棍會入晒鏡。
360全景相機仲有好多玩法，例如反地心吸力，倉鼠跑圈，又或者係扮無人機嘅，想知道點樣拍嘅話呢？考慮吓Subscribe 我呢個blog，或者大男孩YouTube頻道，留意我將來啲文章
三，用手機app生成Tiny Planet影片
唔同相機有唔同輸出Tiny Planet影片嘅方法，用我呢部Insta360 ONE X做例子，導入左影片之後，只需要用兩隻手屏幕上面指撳住，拉埋然後，咁段片就會變成Tiny Planet video㗎喇
響設定到開啟埋Direction lock，咁你錄影緊嗰時，就算唔係全程行緊直線，都唔怕個人側埋一邊
最後將段片輸出到手機嘅相集，或者直接分享到去社交網絡都得。
做啲簡單剪接，再加埋音樂上去，好容易就做到一段得意嘅360 Tiny Planet影片㗎喇
拍攝Tiny Planet就係咁簡單，有唔明㗎話，可以響下面留低你嘅comment，下次見。
大男孩Facebook http://www.facebook.com/hkbigboy
大男孩Youtube http://www.youtube.com/thehkbigboy
大男孩Instgram http://www.instagram.com/hk_bigboy
大男孩Blogger http://hkbigboy.blogspot.com
