圖片︰外國月亮
現時通訊方便，社交媒體流行，鍾意人像攝影既影友，大都以私人方式邀請模特兒進行拍攝創作，好少見到一大班人既人像攝影活動。大家又想唔想像得到，十幾廿年前既大學攝影日人像外拍，需要動員七、八架旅遊巴？
以前未有社交媒體既年代，Model多數係指簽左模特兒公司既Model，佢地都甚少參與坊間既人像攝影活動，亦都唔多攝影愛好者會特登去Model公司搵佢地影相。業餘影友想嘗試一下人像攝影其實唔容易，一係搵身邊朋友、friend搭friend咁搵女仔做Model，仲要係一對一打電話咁去傾去約，再唔係就參加一D攝影會安排既人像攝影活動。
圖片︰Photographic Society, HKUSU
以前幾間大學既攝影學會，都有搞過大規模既外拍活動，當中以香港大學攝影學會既「妙舞豐姿攝影日」最為歷史悠久，連續舉辦左 34 年，直到 2014 年最後一屆先至停辦。以前小編仲喺港大讀書時都幫手做過 helper，嗰陣既 photoday 可謂攝影界既年度盛事，每年都有兩三百人買飛參加。
攝影日主題叫「妙舞豐姿」，原因係每年佢地都會搵芭蕾舞學校既學員比大家影相，至於其他女性模特兒，就自然係搵返校內年輕貌美既女同學啦！拍攝既地點一般會係上午校園、下午去外景，轉場時就要安排成七、八架旅遊巴接載所有參加者、工作人員同模特兒喇！
圖片︰Photographic Society, HKUSU
幾十人圍住個 model 影相，參加呢 D 攝影日又有乜野樂趣？其實每個參加者都有唔同目的，有人純粹出黎同一班攝影朋友交流吹水，有初學者走去學下野，有人買左新鏡走去試下影人像，亦都有高手會嘗試喺呢D千篇一律既環境下影D特別野，加D唔同既filter、特別鏡頭去試唔同效果。亦都有人為左贏豐富獎品而參加，有D師兄一個攝影日就影左成廿幾筒菲林大包圍投稿參賽，真係非常忙碌！
