最近完成咗一個關於航拍香港十八區嘅攝影計劃，所以好想藉住呢個機會，同大家分享一下，呢啲照片背後嘅故事。
［中西區］
呢張相，右下角係香港仔水塘。佢係香港第四個興建嘅水塘，亦都係香港島最後興建嘅水塘。第一個水塘係邊個？薄扶林水塘！咁全港真正最後一個興建嘅水塘係邊個？萬宜水庫！佢亦都係全港容量最大嘅水庫。
講返張相，大家見到嘅係雲海日出。我自己好鍾意影呢類型嘅題材。除咗特別之外，最重要嘅就係因為香港嘅山勢唔係好高，你要影到雲海，其實即係話你要高過啲雲，等如大家搭飛機見到啲雲一嚿嚿喺下面一樣。所以，喺香港影到雲海嘅機會，每年嘅日子其實唔係好多。幾年前決定買航拍機，原因就係因為佢可以突破左高度嘅限制，我嘅照片已經唔再需要喺我嘅高度去影，而係可以飛架航拍機上去天空上面影，咁樣就會影到好多嶄新角度嘅相，俾大家見到咁靚嘅風景。
［油尖旺區］
呢張相，大家應該認得出係全港最高嘅建築物，ICC，490米高。俾個概念大家先，大家知唔知道香港最高嘅山係幾高？佢係大帽山，957米，即係話ICC已經高過大帽山嘅一半。
呢張相有兩樣嘢可以同大家分享：第一，如果大家從啲光嘅來源，應該會估到係日落時分拍攝，因為航拍機嘅後面就係光源方向，就係西邊。當時接近日落時分，顏色已經有少少金黃。第二，由於太陽喺航拍機後面，即係正光拍攝，咁樣個天空就會特別藍。所以好多時，我啲學生問我，點樣可以影到個天空特別藍，當然有好多方法。而其中一個方法，就係唔好背光影相，因為背光嘅時候，太陽喺我哋前面，大氣層就好難反射到佢啲藍色出嚟，呢個就純粹係物理學嘅解釋。你可能會即刻同我講：「唔係喎，Jacky，我上網見過有啲攝影師嘅作品，背光影埋個太陽但係個天空都好藍個喎！」冇錯，背光其實一樣可以影到藍天，不過當然就需要用另外一啲辦法，之後有機會再同大家詳談。
再講返呢張相，由於就係黃昏前拍攝，佢影到個天好藍，但係啲建築物嘅反光就係金黃色。藍色係冷調，黃色係暖調。一冷一熱，咁張相就充滿對比，有對比嘅照片就比較好睇。
［黃大仙區］
呢張都係日落相。想問吓大家，知唔知道個太陽喺邊度？究竟係喺照片嘅右上方，定係太陽已經落咗山？開估，太陽其實已經落咗山。你可能會覺得，唔係喎，明明照片嘅右上方係比較光，嗰度應該係光源，咁太陽應該喺嗰度啲雲嘅後面啦！冇錯，其實張相最主要嘅光源真係嗰度，但係偏偏個太陽唔喺嗰度。點解？其實影呢張相嘅時候太陽已經落咗山，但係因為太陽嘅位置只係喺水平線以下低咗少少嘅地方，佢嘅光其實經過大氣層嘅折射，於是就會令到我哋有個錯覺，以為光源喺照片嘅右上方。
呢一日去咗飛鵝山。因為係落完雨，有好多雲，但係啲雲比較低，所以放架航拍機上去，就好容易影到雲海日落呢啲咁靚嘅景色。但係大家要注意，依家新嘅航拍法例只准「日間」放飛，仲要全程必須要目視飛行，即係話你要見到架航拍機先得，唔可以就咁望住遙控器或者手機上面個mon嚟到操控，咁樣喺依家新嘅規例嚟講已經唔容許。所以而家如果大家想用航拍機穿雲影相嘅話，基本上就必須要獲得特別嘅許可先至可以咁做。
［深水埗區］
呢度係深水埗長沙灣一帶，再遠啲大家就望到美孚、葵涌同埋昂船洲大橋。首先講個天空，呢度對西邊，大家應該一睇就知道係日落相。我用咗濾鏡增長曝光時間。冇錯，有一啲嘅航拍機嘅鏡頭前面係可以安裝濾鏡，咁我當時就用咗減光鏡，意思即係話將啲光度減少嚟去增長嗰個曝光時間，所以大家就會見到天空上面嘅雲好似係移動緊嘅狀態。大家可能會問，航拍機喺天空上面其實不斷移動緊或者震動緊，長時間曝光點樣可以確保啲相係清晰？我呢度想分享兩樣嘢，首先就係本身有啲航拍機已經可以手動設定曝光時間，我嗰部最長可以曝光8秒。我試過，基本上喺無風嘅情況底下，8秒影嘅相都係清晰。第二，當然就係本身部航拍機嘅防震功能真係超勁！當然如果有風就試下用4秒或更短嘅時間。呢張相，我除咗用長時間曝光呢個功能之外，我仲連續影多幾張，之後返去用電腦疊相，咁樣就可以令到嗰個流動嘅感覺更加明顯。
講返依家個新嘅法例嘅要求先：無人機最高只可以去到離地面90米，即係大概30層樓高。香港高樓大廈林立，以後你如果喺地下放飛機高過啲樓嘅話，基本上就冇可能。當然你可以喺屋企個天台上面放飛機，咁樣你嘅垂直距離就可以係90米（因為佢係講「離地面」）。但係如果你只要向前飛行，離開咗你屋企個大廈天台邊緣，咁樣「離地面」就好大機會已經超過90米，因為佢係以地面計算，並唔係由你起飛嘅高度計算，所以大家呢個要小心最新嘅規例要求。
呢一篇講住咁多先，下一篇再見！
----------
香港十大勝景Postcard
----------
