文：本香猛
你唔好咁癲啦！如此絕世好橋都畀你 Bandai 度到！好嘢！上個月筆者曾介紹過 Bandai 與 Disney 合作推出的 Toy Story（反斗奇兵）合體機械人，當時官方已事先張揚會推出第二彈。事隔一月終於真相大白，新機體將以巴斯光年 Buzz Lightyear 做重心，並命名為「太空騎警．機械巴斯號」（BUZZ the SPACERANGER ROBO），同步更有動畫續篇推出，等大家了解清楚來龍去脈，想睇就撳以下連結啦！
合體機原材料為 ABS 及 PVC，並由四部分組成，一是巴斯光年機械人，本身已備有關節、機翼及透明頭罩，獨立擺甫士都見得吓人。另外就是兩隻三眼仔，頭大身細、手短腳短跟足原設。再來是名為「太空飛梭」的巨型太空船，搭載雙噴射器及巨型火箭，並內置透明機艙，唔嚇得都睇得！結合後，巴斯光年會變成合體機的核心部分，兩隻三眼仔做手，太空船則變成頭、胸及雙腳，而巨型火箭則搭載在背部隨時準備發射，機械感比上一次「Woody Robo Sheriff Star」更為濃厚。
合體機全高 205mm，單看數字未算高大，但最正是它可跟「Woody Robo Sheriff Star」作二段變身，變成總高度達 350mm 的超友情合體機械人「GANGREAT JING(ガングレートキング)，戰鬥力幾何級上升！唯一美中不足的只是翠絲及薯蛋頭先生太太不知所踪，不排除日後還有第三個機體登場，實行買窮 Fans！
作品預計 2017 年 1 月 27 日發售，今年 8 月 1 日正式收訂，連稅售 18,900 日圓(約 1,369 港元)，跟「Woody Robo Sheriff Star」同價，買齊都是二千多元，今時今日平過你買隻 1:6 Iron Man啦！
