文：本香猛
有一定年紀的巴打們，一定睇過《筋肉人》這套經典摔角動畫。當年由已經倒閉的「亞洲亞洲」播放，雖然記憶中旁白水準極低，但一句「牛肉、頂呱呱、味道確唔同，營養又唔差，我足足食三百年，食到興起，最好就落手！」對白，今時今日依然叫人難忘。想當年，筋肉人玩具甚多，但細細個零用錢得一個幾毫，好多人得個望字。為滿足 Kidult 們童年願望又好，為賺錢又好，近年不少玩具商均重推筋肉人玩具，海洋堂山口式、BANDAI 旗下 S.H. Figuarts 出極都有，最近就輪到日本知名雕像品牌 Prime 1 Studio 出手，為這個摔角英雄打造型到裂的 1:4 雕像！
是次作品全稱為「キン肉マン "キン肉マン" 1/4スケール ポリストーン スタチュー EX 版」，以合成樹酯材質製成，高 75cm、寬 51cm，比正常 1:6 Action Figure 高足一倍，份量十足！作品中筋肉人擺出經典勝利姿勢，一身發達肌肉雕工極為逼真，而且落色準確，層次感高，胸肌、腹肌、斜方肌、臂大肌幾可弄真，將紙上的爆肌筋肉人完美真人化出來。頭雕方面，招牌「肉」字及孖潤腸嘴唇當然少不了，今次「EX 版本」更特別附送「銀色面具」頭雕乙個，讓玩家們重現《黃金面具篇》內的英姿。當然，若送埋真人樣或二世頭雕就更加完美。
配件數量不多，只有「握拳（は握り手）」、「一本指」、「和平手勢（ピース）」及「拿著牛肉飯的手（牛丼を持ったパーツと）」等四隻右手配件，EX 版本額外附送「手持銀色面具」的配件，玩家們可按需要組合出不同情景。作品另一賣點是地台，呈現出擂台一角，前方綴上冠軍腰帶裝飾，並附有筋肉人忠實 Fans「ミート君」全身雕像，放上擂台又得，獨立抽出來陳列又得，睇完保證大家回憶「返晒嚟」！
作品現於官網接受預訂，未連稅賣 55,500円，約 HK$3,824，預計 2018 年 2 月至 4 月期間派貨。貴是貴了點，但全球限量 500 套，每套底部又印有限量編號，若非家中老虎乸，本香猛已科水購買啦！
