文：本香猛
前年《LEGO 英雄傳》笑爆全球，亦成功令 LEGO 翻叮，新一套《LEGO 蝙蝠俠英雄傳》（The LEGO Batman Movie）亦正在熱播中。根據慣例，有電影一定有玩具，去年廠商就公佈了 11 款全新電影 Set，正當大家玩得好開心之際，第二波共 5 Set 又即將來襲，實行要買到一眾玩家破產為止！
先說編號 70913 的「Scarecrow Fearful Face-off」。之前 70910「Scarecrow Special Delivery」中稻草人以外賣仔造型亮相，電單車頭盔 Look 叫人難以識認。今次新版稻草人終於以真面目示人，爛身爛世加上猙獰樣子，望落都幾恐佈。隨盒仲有稻草人專用直升機，以及成個 Series 首個沒有繫上黃色腰帶的蝙蝠俠，收藏價值立刻升呢！惟留意這套 LEGO 只有 141 塊積木，可玩性唔算高，但考慮到僅售 US$14.99，就不能再有要求了！
第二 Set 是編號 70914 的「Bane Toxic Truck Attack」，顧名思義就是大奸狗班恩駕駛劇毒卡車攻擊蝙蝠俠。Boxset 內有劇毒卡車，以及蝙蝠俠、班恩、變種人首領三隻 Minifigures；當中班恩罕有地以 Big Figure 亮相，不單止更大隻更有型，膊頭位仲可加裝配件，玩法創新！全套有 366 塊積木，售 US$49.99，價錢合理。
再說編號 70915 的「Two-Face Double Demolition」，對上 70912「Arkham Asylum」中雙面人只是一名監躉，今次著番套經典老西，揸番枝輕機槍以靚仔樣示人。隨盒仲有蝙蝠俠、兩名高譚市警員、Batcycle 電單車及鏟泥車。只不過 LEGO 以往出過 N 次鏟泥車，講真今次造型唔算特別，雖然全套有 564 件積木，但賣 US$59.99 似乎唔多值喎！
編號 70916 的「The Batwing」是第二波最大亮點，原因有二。其一當然是電影中引發不少笑料的單座位蝙蝠機，超巨型偏偏只有一個位，並造齊半透明艙罩、炮台、吸風口等 Detail 位，加上蝙蝠俠 Lego 及「Black Thunder」等字樣，還原度相當高。據知蝙蝠機日後還可與 70905 的蝙蝠車作某程度合體，叫人期待。第二個亮點是 Minifigures，蝙蝠俠固然送埋畀你（其實盒盒都送，買齊可組隊足球隊…），仲有 Q 爆羅賓及人氣小丑女 Harley Quinn，後者穿上可愛裙仔並揸住大大個鎚仔，單是買佢就要科水。全套有 1,053 件積木，賣 US$89.99。
最後一 Set 是 70917「The Ultimate Batmobile」，簡單來說就是蝙蝠俠載具大合體，分別有蝙蝠車、蝙蝠電單車、蝙蝠機及蝙蝠坦克，毋須拆件重砌，簡單拼合就能變成巨型 Ultimate Batmobile。人偶數量也很豐富，一次過送你 8 個，包括蝙蝠俠、羅賓、蝙蝠女、英雄裝阿福、2 隻飛猴、巫婆及 Polka-Dot Man。全套 1,456 件積木，賣 US$129.99 絕對唔平，本香猛就買唔起，還是留機會給有財力人士吧！
「LEGO 70913 - 70916 The Lego Batman Movie Wave 2」預計今年 6 月 1 日夏天開始發售，仲有四個月，LEGO 迷係時候儲定錢！
