文:本香猛
Bandai 近年開了多條戰線，唔講高達、龍珠等人氣作品，單是聖衣神話已經買死人，攪到本香猛唔敢再行模型舖，怕銀包又迅速「乾硬化」！只不過，有些作品就算幾窮幾唔掂，唔食飯一樣要科水買，例如去年大熱的「Figure-rise Mechanics」系列便是一例。叮噹（Sorry，我不會叫多啦 A 夢）、時光機、菲利連移動座駕款款好玩又過癮，而即將於本年 4 月推出的有《IQ 博士》裹的則卷小雲，一眾 80 後好難走得甩！
一如叮噹，這個小雲一樣要用手砌，尺高 130mm，組件不算多，大約有 70 件左右，而且每件都非常大，估計半個鐘內就砌好，好適合初階人士玩。這裹的小雲以最經典的吊帶褲造型示人，頭部、身體、眼鏡、衣服連嚿「屎屎」都是獨立分件，而且配色相當準，只有心口內的蔬菜圖案是貼紙，完全素組化不用上色，成品可觀性相當高。
當然系列內的機械元素它也少不了，隨模型有齊實色及透明件，只要裝上透明外殼，小雲的內構就隱約可見，讓人可細意欣賞鳥山明老師當年的機械創意。
「Figure-rise Mechanics Dr.スランプ アラレちゃん」連稅賣 2,700 円，預計 2018 年 4 月推出。考慮到一系列舊作香港派貨唔多，而且估計以後必出埋小吉，屆時有心買就唔好等，否則後追唔單止食炒，仲分分鐘買唔到呢！
