文：本香猛
農曆新年，各大電視台必播賭片，數當中最經典，唔使審一定是《賭神》。一大推經典對白，如：「朋友，你返印度食蕉啦！」（種族歧視，今日一定唔出得）；「後生仔始終係後生仔。」（現已成常用 Cap 圖)；「我摸戒子這個動作，是我在最近五百舖牌裡加進去的，來裝你呢個老狐狸。」（以後賭錢時必講）；仲有「我呢度有張瑞士樂斯銀行本票，價值三千萬美金。」（從此本票成賭局最後籌碼）等等，一提起香港人必能如數家珍般背出來。
如此一套經典，除了每年新年賭錢時透過對白致敬，如今多了一個方法，就是買賭神的 1:6 Action Figure 回家「供奉」。新出這套 Figure 由人偶公司 Stingrayz 推出，分別有高進及陳刀仔兩款，兩者均配有 30 個活動關節，並有齊各式賭具，玩家可獨立選購，也可兩隻孖裝購買，讓兩師徒重聚。
先說「賭神」高進，招牌油頭、精緻五官，配合眉頭深鎖表情，雖未如大廠般造到惟肖惟妙，但總算叫人一眼認出是「發哥」，質素仍比很多副廠要好。隨人偶附有襯衫、褲子、大衣、領帶和腰帶，並配有手指尾玉戒指，造型滿分。加分位還有配件，計有賭枱一張、絨面木椅子一張、黑色手提箱一個，另又有銀行本票、美鈔、骰仔、骰盅及一副同花順啤牌，當然唔少得賭神至愛的德國 Feodora 朱古力。整體配套無得輸，若非液晶體顯影眼鏡太細，相信廠商都會造埋出來！
至於「賭俠」陳刀仔，劉華的俊面在此得以還原，戴埋副黑超，可謂 100% 神似，女 Fans 要買。服飾亦交足戲，包括紅色外套、洗水牛仔褲、白色波鞋、金色佛牌、一條銀色項鍊及一隻金色手錶，一身牛屎飛造型幾可弄真。此外還有四張 Ace 啤牌、手槍、香煙，以及一把怒插吳孟達的折疊短刀。最抵死是送埋一張賭神背影照片，方便賭仔們放上神枱供奉！
售價方面，「買起」高進唔使高義幫手，現在只需 US$239 就搞掂，陳刀仔要 US$199，孖裝則售 US$398。全部現可經 Enterbay 預購，預計最快今年 3 月發貨。但比起發貨，筆者反而最想知道，幾時出埋「賭聖」星仔呢？
