優點:
1) 支援頻譜非常多,幾乎香港及內地的4G頻譜都支援,呢樣嘢值得一讚,始終好多人都唔會話要求一部好高階嘅機嚟用,但往往低階機支援嘅頻譜都唔算好多,呢樣嘢係一樣進步同優勢
2) 機身質感同外型好靚 (恕小弟詞窮唔識形容),雖然自已為咗避免部機唔覺意受傷而特地買多個手機套,但係間唔中都會除出嚟睇下祼機,因為個質感真係冇得彈
3) Android 4.4.4,始終睇返好多機升上去5.0 之後都有大大小小唔同嘅問題 i.e. 食電、反應慢等,用返舊少少嘅系統始終都係一個優點
4) 電池算係夠長氣,以小弟嘅用量 (間中 whatsapp、上網、睇吓youtube、接1-2個電話) 可以用到一日至一日半,大用量嘅話都可幾撐到大半日
5) 相機質素唔差,白平衡頗為穩定,對焦速度 ... err 一般手機應有嘅速度,比幾前真係有進步
缺點:
1) 正如留過言嘅師兄所言,呢個versionh穩定性真係唔夠好,例如插完耳機之後好快通知列個耳機公仔就會唔見咗,有時會無啦啦有訊號 (小弟用緊中移lite data,但唔知關唔關網絡商問題),有時whatsapp會收唔到,但唔會收唔到電話
2) 充電速度唔算快,15% -> 100% 大約要 2:15-2:30,即係轉用2A充電器都因為機身電流輸入限制而辦法令充電速度加快
評價:
上部機用G2 Mini,因為訊號問題而轉用呢部同grade CPU但加咗64位元支援嘅機。
首先就係 --- 訊號收得好好,以往只係收到1-2格嘅屋企依家幾乎收爆 (不過可能係加咗2300頻譜嘅關係 -- 呢個plan是用中移4G限速而成的,好大機會用埋2300),唔使再捱嗰種求訊號嘅日子。
其次呢 --- 1GB RAM同8GB ROM應該係最多人有質疑嘅地方,但係我自己對空間需求真係唔多,連張4GB卡都用唔完嘅我又多咗內置5.1GB (係呀比其他機多起碼 1/4) 其實冇要求架喇。至於1GB RAM嘅問題 -- 恆常清一清RAM就得,反正我又唔係玩咩遊戲大作,對呢啲需求唔大 --小薯買機唔求咁多,有得用、用得順就得