＜彥根城．彥根貓．玄宮園．近江牛＞
彥根，對香港人來說不是一個熱門的旅遊地點，
我也因為看高木直子的漫畫才認識這個地方，
一直對那可愛的彥根貓和近江牛念念不忘。
今年六月去了名古屋，終於有機會，專程用一天時間去彥根。
廢話少說～跟我一起尋找高木直子和彥根貓的足跡啦～
由名古屋出發，不用一小時的車程就來到彥根。
＊一出車站就見到這隻吉祥物彥根貓 ひこにゃん（Hikonyan）歡迎你啦～
這裡是彥根貓的地盤，由車站到彥根城這段路程，隨處都看到他的身影。
＊車站裡的彥根貓～
＊出左車站上面個天花板又是彥根貓～
＊沿途又見到很多彥根貓～
行了約廿分鐘的路程，來到入口，買了入場卷就進去囉～
這是彥根城的地圖，我主要去了幾個地方：
- ．彥根城天守閣（睇彥根貓）
- ．玄宮園（睇花園）
- ．夢京橋 和 四番町（食近江牛，行商店街）
- ＜彥根城天守閣 與 彥根貓＞
彥根貓一天會出來3次表演，每次約30分鐘，
大家出發前記得check左時間同地點先啊。
我當日睇早上第一場（10:30am在天守閣前，其餘2場在彦根城博物館）。
好彩我預早左時間去，因為……
由入口行去天守閣的路程是相當崎嶇的。
＊經過入口，先走上一段石路，「彥根貓我來了～」
＊走完一段石路後，你以為行完到達了吧？之後又會有另一條石路（甚麼？！）
我忘了走了幾多條石路，只記得當日氣溫高達約28度，
在熱屎辣辣既天氣底下，沒有鐵一般的決心是會想馬上放棄的。
想不到探彥根貓跟拜其他神明一樣，
要好神心咁行上一段路淨化一下心靈先見到。
上到去之後，距離表演還有一點時間，先參觀一下天守閣。
＊後來才發現原來我沒有在天守閣影相，唯有畫啦。
＜彥根城天守閣＞被列為日本國寶級建築（類似大阪城、名古屋城d friend咁啦），
入面保留左好多以前為左防衛敵人的設計，
例如有d好細既窿窿用黎發射砲彈，有d網封住d窗咁。
另外，每層之間的樓梯都極為陡峭（基本上都可以用爬黎形容既）
行上行落都要慢慢黎，否則好易仆…係d階梯度。
＊入面d密室、砲彈窿（真抱歉，忘了影相，睇住小冊子先）
＊在頂層由城內望出外的窗，有網封住，有種鐵窗邊緣的感覺。
行完天守閣後，去番入口前面，時間差不多，
萬眾期待的彥根貓出場啦～～！！
＊登登登登～彥根貓駕到！
彥根貓的動作極度緩慢，好得意～
表演主要都係揮揮手，同你say下hello，
玩下自己個噹噹（註：係頸果個噹噹）
又玩下自己支旗仔之類。
聽到好多學生哥講卡哇伊～卡哇伊～卡哇伊～
而老一輩的遊客對彥根貓完全沒興趣，隻貓一出場就走左。
＊表演左約20分鐘到就走左囉～
＊天熱咁熱，真的很佩服彥根貓入面個人，著住件咁厚既衫表演，我相信佢係後台應該係咁樣。
之後出發去下一個目的地：玄宮園。
頭先行左咁多石路上黎，當然要行番咁多石路落去啦（嗚嗚～）
＊又熱又累，碌落去會唔會快d？
- ＜玄宮園＞
＜玄宮園＞是個江戶時代大名所建造的私家庭園，任何一個角度都很美。
作為香港人，黎到呢d咁靚既地方，
自拍是指定動作吧？
唔影過人地點知你黎過姐（真膚淺！）
＊入玄宮園前，途中有條河，先自拍一下。
＊靚到可以整張postcard。
＊擺pose。
＊我迷失在這個彥根城了。
＊到此一遊～耶～～
睇完靚景，肚餓，去下一站：食近江牛！
- ＜夢京橋、四番町（食近江牛、行商店街）＞
夢京橋、四番町有很多食肆、商店，
這次去了高木直子到過的店食近江牛：近江牛肉せんなり亭 伽羅。
＊伽羅入口。
＊入去前先除鞋，之後會俾舊木你（鞋的locker鎖匙）
＊入到間房，坐底，叫野。
叫左兩個套餐，
一個係「近江牛壽喜燒」（近江牛 すき焼き鍋膳），
另一個唔記得左咩名。
滿心期待，一黎見到咁多野咁靚人都開心d。
＊「近江牛壽喜燒」（近江牛 すき焼き鍋膳）套餐
＊我已經唔記得左自己叫左咩黎食，淨係知係近江牛。
＊牛：「啊～～～！！！」
＊甜品好精緻～好食～
味道幾好既，但又未食到哇哇聲。
反而個甜品好食d。
價錢都唔平，
叫做食個靚靚環境同服務啦～
食完就出番去商店街行下，周圍都好多彥根貓的商品：
文具毛巾鎖匙扣明信片公仔書籤野食野飲等等等等。
＊扮下彥根貓～喵～
＊彥根貓神，請保祐我身體健康財源滾滾來。
行完哂，去車站返去名古屋囉～
＊係車站蓋的印章。
彥根是個古色古香的地方，不像大城市般繁華，
遊客也不多，舒舒服服渡過大半天，各位有機會都去下啦～
講完，下次見。
-------------------------------------------------------------------------
資訊：
去彥根有幾個方法，我揀左最快但又最貴的方法：
先由＜名古屋＞站，搭新幹線到＜米原＞站，
再轉搭JR到＜彥根＞，需時約30分鐘（只是車程，未計你行去架）
入場卷有兩款，我買了＜彦根城・玄宮園＞：
－彦根城・玄宮園入場券：大人 600円、小中学生 200円
－玄宮園単独券：大人 200円、小中学生 100円
彦根城所在地：滋賀県彦根市金亀町1-1
営業時間：8:30〜17:00 年中無休
＊彥根城入場費，營業時間：http://www.hikoneshi.com/jp/castle/#fee
＊彥根交通：http://hikone-hikonyan.jp/access/
＊彥根貓表演時間：http://hikone-hikonyan.jp/schedule/
＊近江牛肉せんなり亭 伽羅：http://kyara.sennaritei.jp/
-------------------------------------------------------------------------
Facebook: www.fb.com/tungwood
Instagram: instagram.com/tungwood
Youtube: www.youtube.com/ytn
