【夏天為大地帶嚟雪水!? 】3大暑假 滑雪 隱世勝地

啱啱踏入初夏，香港已經日日30幾度，熱到人都熔埋。喺炎炎夏日，有咩嘢比去個冰天雪地透心涼嘅旅行兼滑下雪更治癒呢？就算唔識 滑雪 都唔緊要，好多滑雪場都有 滑雪 教練，你想即時學都得。而且，就算唔 滑雪 ，淨係去睇下靚靚雪景都已經夠晒享受。好，事不宜遲，今次就等MoneyHero.com.hk 專欄作家湯馬士同大家介紹3個暑假必去隱世滑雪勝地啦！

 

1.意大利切爾維尼亞Cervinia

(雖然周圍都係雪，但係唔算好凍，所以暑假去滑雪都唔使帶太多額外嘅衫。)

提起夏天嘅意大利，好多人可能只會諗到熱辣辣嘅羅馬又或者好好味嘅意大利雪糕，但原來喺北部阿爾卑斯山脈一帶，周圍都係長年積雪，有好幾個地點仲有設備完善嘅滑雪場。而其中位於意大利同瑞士邊界嘅馬特洪峰（英文Matterhorn、意大利文Cervino）更係好多滑雪同攀山人士嘅最愛。

(馬特洪峰奇特嘅外形令佢成為歐洲最具標誌性嘅山峰之一。)

4478米高嘅馬特洪峰擁有奇特嘅外形，令佢成為歐洲最具標誌性嘅山峰之一。滑雪場位於峰頂東面嘅山坡上，由於係位處邊境，要到馬特洪峰可以從瑞士或者意大利到達。但湯馬士就建議大家由意大利切爾維尼亞出發，因為意大利呢邊無論係住宿定租用滑雪器材都比瑞士嗰邊平。而且兩邊其實係互通嘅，只要買張day pass，你就可以住意大利，然後搭ski lift過埋瑞士嗰邊滑都得。

要到切爾維尼亞，可以從都靈出發，揸車需時2個鐘頭。每逢星期日同公眾假期，亦有一班巴士朝早7點從都靈開出，下晝5點從切爾維尼亞返返去都靈。換句話講，中間大約有8個鐘，做day trip就啱晒。

 

2.日本月山Gassan

(去日本滑雪食得好住得好，最適合香港人。)

日本嘅滑雪場大部份到3、4月已經進入雪季嘅尾聲，唯獨係山形縣嘅月山滑雪場因為冬天積雪太多嘅關係，要到四月份先會開放，一般開到7月底。月山唔算係一個好大嘅滑雪場，而且比較隔涉，如果要用公共交通的話要轉好幾程車。但如果你7月去開日本，同埋自己揸車的話，去月山可以係一個好好嘅消暑活動。

 

3.非洲萊索托Afriski

可能好多人都冇聽過萊索托呢個名，其實佢係非洲南部嘅一個小國，全國完全畀南非包圍住。由於地處高海拔，加上位於南半球，7、8月時候正值係呢度嘅冬天，造就咗呢個非洲僅有幾個之一嘅滑雪場，亦係當中雪量比較可靠嘅一個。

唔好以為佢喺山卡啦冇人去，其實呢度旺季時候係南非人同歐洲人嘅渡假勝地，住宿可以好搶手，所以去之前一定要book定。滑雪場有全非洲最高嘅餐廳，食物質素仲幾好！

(淨係話畀人聽8月去咗非洲滑雪都夠型啦！)

要去萊索托可以從南非約翰尼斯堡飛過去，或者由Bloemfontein搭巴士到首都馬塞盧，用特區護照可以免簽證。從馬塞盧揸車到Afriski大約3個鐘；每朝亦有一班巴士，不過車程就要成6個鐘。

滑雪始終有一定危險性，去旅行之前一定要買定保險保障自己，而家即上MoneyHero.com.hk旅遊保險比較平台選擇一份包危險運動嘅旅遊保險！除咗 Starr、FWD同MSIG，仲有好多不同計劃俾你揀，經我哋買仲有優惠添！去埋MoneyHero.com.hk信用卡比較平台睇埋有咩信用卡優惠啦！

——

作者簡介︰

湯馬士
現職中學教師，大學主修語言學，熱愛語言、歷史同文化。因為愛自由所以愛上旅遊，想喺世界嘅大課室中自主學習。著有《重新發現高加索》同《放逐自己到孟加拉》兩本書。最近亦將經典名著《小王子》翻譯成廣東話版，並且積極推廣廣東話寫作，因而接受多間傳媒訪問。