Fever 達人文章分類

係男人就揸渣古,係文青就玩XPRO!曾經的另類旗艦 - Fujifilm X-Pro 1

係男人就揸渣古 係文青就玩XPRO
曾經的另類旗艦 - Fujifilm X-Pro 1

 

 

 

上一篇體驗報告用了比較文縐縐嘅書面語,今次決定用粵語口語去做分享。

高達迷就一定有聽過一句說話叫做:「係男人就要揸渣古」, 因為渣古佢有一種特別嘅工業風又帶點蒸汽朋克嘅感覺,具備機械嘅浪漫又不失科技感。

咁關文青玩Fujifilm x-pro系列咩事呢?

簡單嘅一句總結:Fujifilm嘅機其實就係披住機械嘅包裝,但又帶俾你與時並進嘅科技產物,而當中X100同X-Pro系列就係呢份精神嘅佼佼者。

用完xa2後俾富士無反相機嘅輕便同JPG出品吸引咗 ,加上當年畢業出嚟做嘢開始有穩定收入,把心一橫就買咗部x-pro 1返嚟玩下。今次就回帶講返X-Pro 1。

 


對焦慢,對焦慢,對焦慢。
按照本人理念唔講參數只講用落嘅體驗,同一啲一般用家真係會用到嘅功能。如果對富士相機有少少了解都知道x-pro 1其實係富士X可換鏡無反中一部比較早推出嘅相機,雖然佢已經係當代嘅旗艦機,但佢個對焦系統都係比較一般,配上原廠Fujinon XF18 f2後對焦速度可以話真係幾慢嘅。 但係,話到明係另類嘅旗艦機,佢個賣點好明顯就唔係佢嘅對焦速度同埋性能上嘅優越,反而係佢嘅設計同埋佢照片直出嘅色彩。
(註:直出指不經其他軟件佢後製的照片。)

">DSCF2146" />
圖片來源:筆者自己的Flickr,Fujifilm X-Pro 1 with Zeiss Touit 1.8/32mm


Fujifilm的初心,Xtran的初代色彩
首先講下佢相片嘅色彩啦,由於第一代嘅x-trans cmos佢冇使用到相位差檢測自動對焦系統,所以導致到佢嘅對焦速度極慢。 但係換嚟嘅相片質素無論喺銳利度定係顏色嘅層次感上,我個人都覺得比近代嘅機更加表現得出色嘅。 有少少似人哋口中CCD同CMOS嘅分別,不過當然分別又冇兩者咁大啦。


喺嗰段期間我主要配原廠XF18 f2同埋蔡司嘅32 1.8去用,對焦速度就真係冇眼睇嘅(同鏡頭都有一定關係啦)。 暗位對焦更加可以話不可用,而且低光拍攝表現亦一般。但係相片嘅成像同立體感絕對唔差過單反所做出嚟嘅效果, 呢一點就可以帶到落去佢設計上嘅優勢。

X-Pro系列個光學取景等於自護號對腳?只係裝飾?
如果你有少少相關知識就知道呢點,無反嘅其中一個大缺點係佢必須要CMOS長期通電先可以令EVF(電子取景窗)及螢光幕可以顯示拍攝畫面。呢一個問題唔單止會令到機身嘅電力消耗好犀利, 同時都會令CMOS嘅溫度上升得快過單反。久而久之就造成咗拍攝嘅時候見到嘅一啲偽色或者色塊出現,大部時間會出現喺天空或者一大片相似顏色嘅範圍中。有留意開富士嘅人都會知道x-pro 1嘅其中一個大賣點就係佢個混合取景窗, 佢可以切換成光學取景同埋電子取景。 不得不讚賞下呢一個嘅設計,無論係邊種模式底下個取景窗睇落都係好舒服而且你要嘅資訊可以話係一目了然。 有用過Leica M機嘅師兄一定會明點解我會話佢喺光學取景狀況下嘅資訊都好豐富,有時候取景窗入面資訊豐富對於新手影相真係會方便啲。
 
而正正係呢個原因令到佢可以唔使令CMOS長期通電,不過矛盾嘅係當你用佢嘅光學取景模式唔知點解會令到對焦出奇地唔準確同慢。呢一個絕對係一個大問題!亦都係令到我當初放棄咗呢部機嘅一個原因。 所以佢充其量喺一部試作型嘅渣古, 仍然有好多位可以改進。 由於佢第一代未支援電子模疑裂像對焦, 所以手動對焦嘅時候只可以用峰值對焦。對我呢啲唔鍾意睇峰值對焦人嚟講係一個極大嘅缺點,因為我覺得峰值對焦時嘅顏色提示令我覺得有點核突。

同埋手動對焦嘅時候基本上你就用唔到光學取景窗,變相佢都幾似個裝飾品。實際嘅拍攝功用唔算好大,但係作為佢嘅特色設計都值得一試嘅。而且呢個設計理念都幾值得欣賞,可以話令無反揉合機械化嘅理念。

SING2341
圖片來源:筆者自己的Flickr,Fujifilm X-Pro 1 with Zeiss Touit 1.8/32mm
 


真.日本機
不過講到旗艦機我覺得佢另一大賣點反而係佢嘅產地真係出自日本,要知道而家好多大廠都有好多機已經搬咗去發展中國家製造。話就話QC做得好就會冇咩影響,但你都唔好忘記呢幾年有幾多機因為QC問題而出現要更換或者維修。而且都畀得咁貴錢,有得揀點都想揀個產地好啲㗎嘛。

山東嘅富士蘋果同埋青森縣蘋果你會點揀啦?

整體嚟講啦佢係一部未完善嘅機但都值得收藏留念嘅,機身嘅造功絕對對得住個價錢。而且富士第一代嘅Xtran機都真係選擇唔多,唔買佢嘅話就只有用x100第一代或者xe1。

如果你問我喺2020年仲值唔值得入手,我會答你攞嚟收藏同玩下都係一個唔錯嘅選擇。

分享感想
YS Cheung 的其它文章
點解會喺2020年仲入手FujiFilm X70?點解唔買XF 10? YS Cheung 點解會喺2020年仲入手四年前推出嘅FujiFilm X70?點解唔買Fujifilm XF10或者GR系列?我用三個理由話你知。   一、平,平,平,又有反mon。 相信好多朋友都有聽過一代街拍神器,理光嘅GR啦,28MM配上2.8光圈,... (繼續閱讀)
係男人就揸渣古,係文青就玩XPRO!曾經的另類旗艦 - Fujifilm X-Pro 1 YS Cheung 係男人就揸渣古 係文青就玩XPRO曾經的另類旗艦 - Fujifilm X-Pro 1       上一篇體驗報告用了比較文縐縐嘅書面語,今次決定用粵語口語去做分享。高達迷就一定有聽過一句說話叫做:「係男人就要揸渣古」, ... (繼續閱讀)
由X-Pro 1走到X-Pro 3,Fujifilm的旁軸無反完美了嗎? YS Cheung 由X-Pro 1走到X-Pro 3,Fujifilm的旁軸無反完美了嗎? 作為Fujifilm X-Pro系列的fans,最近下了決心入手了X-Pro 3,上手第一時的感覺是:「Fujifilm差一點就完美了。」,以下將分享由X-Pro 1一路用到X-Pro3的感... (繼續閱讀)
終極回帶:沒有xtran的富士,還算富士嗎? 入門級無反 - Fujifilm XA2體驗報告 YS Cheung 沒有xtran的富士,還算富士嗎?入門級無反 - Fujifilm XA2筆者用XA2已經是差不多五年前的事了,當時為了方便和女友外出時拍照,放手上的單反(Pentax K-7)賣掉,換成方便隨身手口帶的無反相。自此就步入富士APSC... (繼續閱讀)