應該好多人都會聽過CONTAX T2呢個名,除咗應該係因為好多名人都有用呢部相機,我諗應該未必會個個知道佢究竟點解會咁多人追捧?!
其實佢來頭好架勢,機身嘅外型係由保時捷車廠設計,鏡頭係出自德國蔡司公司,機身係由日本京瓷公司製造。呢部細細的相機係集合左多個名廠嘅心血結晶。
而當你今日走上網搜尋一下呢部機嘅價錢,你可能唔明點解佢會賣得咁「貴」。
但係當你有機會用過你部機之後,你就會明白佢名氣大但係魅力更大,其實可能佢只不過係賣返原本應有嘅價值,呢啲應該就係一試難忘之後會講出嘅嘢!
好多相機係字面上可以講到有好好嘅配置,
但係一用落手就會見真章,
而T2絕對唔會係歸類去呢個名詞
T2配備左一枝蔡司Sonnar 38mm F2.8鏡頭,
鏡頭表現非常銳利而且發色仲有一種好有我哋希望菲林相機比到我哋嘅色水,
佢既唔係平價傻瓜機鏡片嗰種偏色,
又唔係影出嚟有暗角果種或者好似富士有EBC鍍膜鏡片影出嚟果種極現代色彩嘅效果
我會形容佢係好有佢個性咁樣演算出一種獨有嘅味道。
呢枝鏡既冇影像扭曲嘅問題,有冇暗角,既係銳利,
但係又唔會好有數碼味道嗰種銳利,好似係一種有少少柔和感覺幾銳利
機身操作非常簡單,
快門全自動,速度係由1秒至1/500秒,
最近對焦距離係70厘米,
我開頭諗會唔會唔夠用,
但係用落配合38mm焦段,
感覺上無論用黎掃街定係影人像我都覺得好夠用了
所有設定都係鏡頭嘅調節環上面,
佢嘅設定基本上分為以下三種
1: 強制閃光燈全自動模式( 光圈數值也是自動,從F2.8-F16由光線強弱而定)
2: 關閉閃光燈全自動模式( 光圈數值也是自動,從F2.8-F16由光線強弱而定)
3: 光圈先決模式(此模式僅適用於F4-F16之間,係呢個模式之下閃光燈默認關閉)
佢嘅觀景器裏面提示到嘅資訊都好有用, 除咗有標準取景框,
佢仲有一個細少少嘅近拍取景框, 構圖可以好精準。
觀景器左手邊嘅數字會提示拍攝嗰刻嘅快門速度,
如果顯示「LT」即係代表快門速度會調至低於1/30秒,
呢個時候變相就提示左你要拎穩啲部相機。
咁如果「LT」係閃爍嘅時候,即係代表現場環境太昏暗,
相機嘅快門會調整至長曝,呢個時候你可以開閃光燈曝光,
或者用腳架黎幫助拍攝。假如快門速度嘅符號「500」係咁閃爍,
即係代表過曝,咁你就可能要透過收光圈嚟解決~
畫面下方除咗有顯示使用曝光補償嘅符號同埋閃光燈充電符號之外,
中間係一個好有用嘅對焦輔助,喺AF自動對焦模式下面,
如果能夠成功對焦中間圓形會着綠燈,如果不能成功對焦圓形綠燈會不停閃爍。
綠燈圖形左右兩邊會有兩個箭嘴,喺MF手動對焦嘅情況下面絕對係一個好好幫助你成功對焦嘅功能。
佢會提示你需要將機頂手動對焦嘅轉盤擰去左邊多啲定擰去右邊多啲,最後成功對焦都係會着中間綠色圓形
機身有轉盤式曝光補償設定,
以加減半及方式調整,
對於拍攝深色或者極淺色畫面準確曝光好有幫助?
CONTAX T2拎上手嘅感覺好紮實,
唔會有好空洞嘅感覺,外殼係鎂合金製造,
重量大概係295克,相等於大概六盒樂天熊仔餅嘅重量
手感好足,對我來講我反而唔會嫌佢重,仲拎得好穩陣咁影相添! yea~
↑ Fujifilm 業務用100+室外有雲+關閃光燈
↑ Fujifilm 業務用100+室外有雲+關閃光燈
↑ Fujifilm 業務用100+室外晴天+關閃光燈
↑ Fujifilm 業務用100+室內有陽光+關閃光燈
↑ Fujifilm Xtra400+室外多雲+開閃光燈
↑ Fujifilm Xtra400+室內+開閃光燈
↑ Fujifilm Xtra400+室內+關閃光燈
↑ Fujifilm Xtra400+室外多雲+關閃光燈
↑ Fujifilm Xtra400+室外多雲+開閃光燈
↑ Kodak Ultramax400+室外晴天+關閃光燈
↑ Kodak Ultramax400+室外陰天+關閃光燈
↑ Kodak Ultramax400+室外晴天+關閃光燈
↑ Kodak Ultramax400+室外陰天+關閃光燈
↑ Kodak Ultramax400+室外晴天+關閃光燈
↑ Kodak Ultramax400+室內+開閃光燈
↑ Kodak Ultramax400+室外多雲+開閃光燈
↑ Kodak Ultramax400+室內+開閃光燈
↑ Kodak Ultramax400+室內+開閃光燈
一開頭我都覺得呢個係一個俾人追捧嘅潮物,喺度諗會唔會剩係得個賣相
用完之後發覺除咗支鏡頭真係好靚色水,過片同對焦速度都好快之外,
另外一個我超贊嘅地方就係個AF自動對焦真係好準確,
就算對住塊鏡自拍佢嘅對焦都好準確
↑ Kodak Gold 200+室外晴天+關閃光燈
↑ Kodak Gold 200+室外晴天+關閃光燈
↑ Kodak Gold 200+室外晴天+關閃光燈
好多菲林傻瓜機有一個弱點就係對住鏡拍攝嘅時候,
佢會理解成為另外一種拍攝情況,主動將鏡頭調整到無限遠,
搞到唔會成功對住鏡頭影到自拍
但係喺我用T2幾次對着鏡子拍嘅時候佢都好準確,呢個超贊
有一個測試方法就係假若你唔信調整去MF再搵啲嘢試吓對焦,
你會發現佢若果感覺到有少少走焦佢都會提示你重新調整
↑ Kodak Gold 200+室內+關閃光燈
所以結論應該係佢真係還原返佢應有嘅價值啫
作為1990年出品嘅佢絕對係一部值得喺歷史留名嘅經典之作!
慢曝人生
慢曝人生。導人向毒
與有格局的人分享有格調的底片人生
IG: https://www.instagram.com/hkbillyszeto/