你有冇曾經去過賣菲林相機嘅舖頭，入到去望咗兩眼，跟住就會同店員講，
「Errrrr唔該，我呢就係新手，有邊啲相機適合新手用架？」
老實講，其實新手定老手，用相機嘅方法都冇唔同。只不過係應對唔同嘅相機要用唔同嘅操作方法先影到相啫。
然而，當你同「新手」交談嘅時候你可能會發現，原來佢可能想搵一啲唔太自動可以全部手動操作嘅相機
而「老手」佢哋可能調返轉搵一啲盡量簡單自動方便啲嘅相機。
其實，世界上係冇邊一部相機係話專登設計比新手用。反而係應該按着自己嘅需要，去選擇適合嘅器材。
揀到適合嘅器材自然會開心~
選擇嘅時候可以遁以下9個方向入手：
1: 期望佢影出嚟係點嘅質感（焦段，光圈大小）
如果要影出嚟嘅相片睇落有明顯嘅淺景深，喺鏡頭方面可能要選擇相對較大光圈。
以而視覺方面如果鍾意比較廣闊可以選擇28mm或者35mm嘅鏡頭。
廣角鏡頭相對視覺較為廣闊，有比較明顯嘅透視感。
而相對普遍比較有壓縮感嘅就會係50mm，之後上面嘅焦段壓縮感就會越來越強。
↑ Mamiya Rz67+ Seckor C 128mm 3.8+ Fujifilm Pro 160 NS+沒有閃光燈 (64mm in 135)
↑ Fujifilm Tiara II+ Kodak ProImage 100+開閃光燈 (28mm in 135)
2:便攜程度（大小重量）
相機大小同埋佢嘅重量好直接影響你會唔會拎住佢周圍走，簡單來講如果唔介意重量同大小嘅話，
選擇單鏡相機比較全面。如果想大小重量都比較輕便，通常會選擇旁軸相機或者傻瓜機。
3:期望嘅操作方式（全自動全手動）
操作方法講緊嘅係如何處理曝光嘅過程。傻瓜機相對簡單就係可以自動曝光，
有啲比較高階嘅傻瓜機可以支援埋手動曝光。而單鏡相機方面，大致分為全機械同埋電動機。
電動機普遍都係支援自動曝光同埋手動曝光。而全機械嘅相機就需要自己決定光圈同快門嘅大小同埋速度。
但係咁樣都唔使覺得好大壓力，因為我哋可以透過手機下載一個測光錶app佢幫我地決定喺某個光圈大小之下用幾多嘅快門速度，
基本上都好方便，熟習左之後甚至乎可以透過自己估計。
自由式取景
視平式取景
潛望式取景
4:鏡頭最近對焦距離
鏡頭最近嘅對焦距離好影響一部相機嘅用途，呢個距離可以決定到佢影到啲咩嘅主題。
如果用輕便嘅傻瓜機或者單鏡機拎佢出去影枱面嘅嘢食，要影特寫鏡頭就要留意應該買最近對焦距離0.35米嗰啲款式。
旁軸相機最近對焦距離通常為0.7-1米。如果鏡頭對焦距離係相對遠的話需要留意影特寫嘅時候需要黎得較遠拍攝。
有較近對焦距離嘅鏡頭係狹窄空間比較有優勢。
↑ Fujifilm Tiara II+ Fujifilm Xtra 400+開閃光燈
當取景多於最近對焦距離，影像便不能成功對焦
↑ Yashica Microtec AF Super+ Kodak Ultramax 400+沒有閃光燈
5:是否需要閃光燈
閃光燈攝影係以前嗰個年代係一種好普遍嘅效果，如果鍾意呢種效果，令到我相對昏暗嘅環境或者主體都可以影出好光猛，相對質感比較強嘅效果，就需要考慮有閃光燈嘅傻瓜機或者配合閃光燈使用嘅旁軸或者單鏡相機。而旁軸相機同單鏡相機本身不具備閃光燈，都係需要額外配置，體積亦都相對較大，而普遍使用單鏡相機同旁軸相機嘅用家都比較少會用閃光燈。
↑ Contax T2+ Kodak ColorPlus 200+開閃光燈
↑ Contax T2+ Kodak Gold 200+開閃光燈
6:快門速度段數（寬為佳）
快門速度嘅範圍間接決定到相片效果同相片嘅質感。無論係邊一款相機，
若果佢慢速快門同埋高速快門之間嘅距離比較寬廣，對創作比較有利。
高速快門越高速，會令到喺日光都可以用到相對較大嘅光圈值，較方便營造淺景深效果。
快門速度能夠越慢，越有利於夜間拍攝時令到菲林吸收更充足嘅光線，從而減低菲林曝光不足產生嘅瑕疵。
↑ Fujifilm Tiara II+ Fujifilm Xtra 400+沒有閃光燈
↑ Contax T2+ Fujifilm Xtra 400 +沒有閃光燈
7:對焦方式（自動，手動或估焦）
最方便應該就會係自動對焦，但係都唔可以忽略手動對焦同估焦嘅好處，
相對自動對焦比較有自主性決定到對焦點嘅位置。手動對焦普遍出現喺旁軸相機同單鏡相機上面，旁軸相機通常會係黃斑對焦。
黃斑對焦即係將中間黃色斑對準要對照嘅主體，再將分離嘅影像移到中間對焦黃斑就為之成功對焦。
而單鏡相機普遍係用模糊對焦同裂像對焦，對準對焦主體後，前者就係有冇拎到最清楚果點就為之成功對焦，
後者就係透過中間兩個半圓形裏面嘅影像重新聚合就為之成功對焦。
↑ Mamiya Rz67+ Seckor C 128mm 3.8+ Fujifilm Pro 160 NS+沒有閃光燈
8:外貌協會（呢個都係一個好好入坑嘅方法）
呢個我諗無需多講，有時一部外貌靚嘅相機無論幾貴或者幾難用都好，佢都好似一件精品咁樣常伴你左右～
讀緊書嘅時候，呢部加埋鏡頭成3公斤嘅相機就係貪得意買咗返嚟><
9:當然還有價錢!!
價錢係基本上係決定嗰部相機個性價比值唔值得去買。佢一個好極端嘅例子，
lomo simple use係一部可以重複使用嘅即棄相機，
光圈既唔大，快門速度亦都得一個，對焦距離又遠，唔適合喺低光線時間拍攝。
但係勝在價錢低，又有閃光燈，唔使對焦快門速度又夠快，
缺點變成優點，鏡頭又夠廣闊，日光日白拎佢去街拍一流。
記住，適合嘅器材未必係最貴嗰款，佢可能隨時係人哋最唔睇好嗰款添～
↑ Lomography Simple Use+ Fomapan 400+沒有閃光燈
以前反而會諗，新手嘅相機係唔係就係應該去買最貴最方便又容易影到靚相嗰啲？
反而老手就可以買到啲最平但係要用啲方法先影到靚相嗰啲？哈哈哈
捷克攝影師 Miroslav Tichy 與他的「垃圾相機」
唔會話有一款相機係十全十美，用家應該按住自己嘅需要去選擇。
因為當你喜歡你嗰部相機嘅時候，你就會欣賞佢嘅優點從而包容佢嘅缺點，佢就係世界上最好嘅相機！
下一篇文章將會列舉出市場上所有有可能遇到嘅菲林相機，每一款大概有嘅優點同缺點，對尋覓老相機嘅你要留意~
慢曝人生
慢曝人生。導人向毒
與有格局的人分享有格調的底片人生
IG: https://www.instagram.com/hkbillyszeto/
