文：本香猛
提到男人的浪漫，除了豆腐火腩飯，另一神物就是《男兒當入樽》。雖然已事隔多年，但當中的名場面依然叫人歷歷在目，例如最後戰役湘北對決山王工業，櫻木花道奮勇救球一幕，時至今日諗起，筆者還是會腎上腺素上升。
《入樽》角色、故事固然經典，但未必所有讀者都知，原來漫畫中所用的籃球真有其物，它就是由日本籃球品牌 molten 出品的 JB-77。最近，這兩大品牌終於再度合作，宣布將於 4 月 21 日推出「SLAM DUNK X molten」限量版籃球，款式正是當年的 JB-77，無論是籃球迷還是漫畫迷，見到無不雙眼發光。
跟當年款式一樣，是次限量版籃球的球面沿用天然皮革打造，屬男子用標準 7 號波設計，本身型號亦幾近停產，如今再在波面印上櫻木救球一幕的黑色原畫，收藏價值立即提高！留意包裝盒更是用心製作，不但呈正方形設計仿如禮盒一樣，盒面仲印有第 24 期單行本封面，見到櫻木大力入樽，相信大家買後唔捨得打更唔捨得拆！
「SLAM DUNK x Molten」限量版籃球連稅賣 16,200 日圓，折合約 HK$1,160，比普通籃球貴四至五倍！然而咪以為有錢就買到，事關此籃球只限日本本土發售，而且暫時未知限量多少，想買就要托日本朋友幫幫手了！
