文：本香猛
「男人愛高達，女人唔明白；男人愛血獸，女人嗌核突」。不過你就你嗌核突，男人一樣照買，所以就算 Hot Toys 出過 n 次 1:6 血獸，大把獸迷依然落疊！最近 HT 再打血獸主意，宣布推出早前於香港動漫節展出的《異獸戰 2》Wolf Predator （重裝版）人偶，實行以更生動擬真的神態質感回饋一眾獸迷！
自 2012 年 HT 重啟《異獸戰》人偶企劃後，已先後出過 Scar Predator、Celtic Predator、Ancient Predator 及 Elder Predator。今次這隻 Wolf Predator 份屬族群裡精英中的精英，專職是處理由鐵血種族所引發的異形生態危機，把所有異形曾經存在過的證據毀滅，簡單來說即是宇宙裡的清道夫。
跟以往一樣，今次 Figure 繼續由本地著名原型師 Joseph Tsang 操刀，憑著多年經驗及精湛雕刀，準確刻劃出血獸的猙矃雙眼、立體皮層斑紋、鋒利觸鬚質感及恐怖獠牙，並以黑色軟膠製作出招牌辮子頭髮，將角色勇悍兇猛一面活靈活現。惟留意一點，今次 Figure 只有一張嘴，沒有可換嘴替換，焗 Show 血盆大口，家中女主人見到一定鬧爆，繼而家變！
回溯過往舊作，血獸 Figure 例牌頭重腳輕，有時仲擁有一條「誘人」黃蜂腰。今次 Joseph Tsang 特別改良素體設計，先是提高體型比例的準繩度，繼而透過完整的原型製作模式進行部件分拆，足本還原高逾 35cm、具 20 多個可動關節的 Wolf Predator。與舊作比較，全個 Body 要粗獷健碩得多，更符合電影造型。
戰服方面，底層網衫走唔甩，表面蓋上塗有舊化效果的護甲，另外仿金屬面罩可安裝於頭雕上，毋須拆頭就戴到，設計周全。血獸武器不嬲多，這裡有兩把肩膊鐳射炮、兩對合金腕刃、一把組合式長矛、兩條長鞭、一個迴旋飛標、三個關閉形態的飛標。另外又有一條骷髏頭骨戰利品頸鏈、藥箱及和裝備箱，數量極多有排你玩！地台一改橢圓形膠板的土炮設計，變成一個有異形頭部殘骸的情景地台，完美地為作品增值！
《異獸戰》1:6 比例 Wolf Predator（重裝版）由即日起於 Secret Base 接受預訂，建議零售價 HK$1,680，預訂價 HK$1,630，暫定 2018 年第 2 季至第 3 季正式派貨。
查詢：3722 3988
網址：www.hottoys.com.hk
