文：本香猛
「Go Go Power Rangers！」一聽到呢句口號，唔使問阿貴都知《新恐龍戰隊》出現。呢套特攝劇於 90 年代風靡全球，人氣不亞於美漫英雄，今年年頭更有埋荷里活真人電影，可以話威到盡！只不過講到歷史，1992 年日本播映的《恐龍戰隊ZyuRanger》才是元祖正宗。近年 Bandai 旗下食玩部門以「超級迷你盒玩」（スーパーミニプラ/SUPER MINIPLA）系列之名，先後出過劇內經典機體「大獸神」及「龍皇凱薩」，最近廠方再宣布推出更大型機體「獸騎神雷龍王（King Brachion）」，又睇吓會否如前兩作般一賣即斷市！
當年《恐龍戰隊 ZyuRanger》以恐龍守護獸和邪靈妖魔之間的戰鬥為背景，5 位戰士均從古代沉睡中甦醒，各自擁有所屬機械獸，並可合體成為大獸神。而雷龍王則可變身成為「超獸戰車（King Tank）」，讓大獸神與龍皇凱薩騎乘，繼而合體成為最終形態「究極大獸神」。
說回今次隻 SUPER MINIPLA 雷龍王，高 18cm、寬 16cm、長 29cm，比例上跟大獸神及龍皇凱薩相同，份量十足，氣勢比合體機械人有過之而無不及。顏色則以白色為底，雖然沒有電鍍零件，但不少位置如胸前推進器、雙爪等均經過金屬漆上色，看上去閃閃發亮。造型與舊版相似，龍眼、龍口等全部造齊，龍頸也如實以一圈圈呈現；若細心留意，更會發覺龍身上的古代文字是顏料塗裝，富有立體感，比一般食玩用貼紙代替要具誠意得多。
SUPER MINIPLA 出了名還原度高之餘，活動及變形亦跟到足。這裹雷龍王的輪子是軟膠履帶，加入兩顆 AAA 電池後就能令機身自主前進；尾巴雙火砲可拆除放到前方，變成炮口向前的「Tail Cannon」形態，再把胸口展開，即可變形成為超獸戰車。當然，它還可與早已推出的兩款機體來個終極大合體，變身成為究極大獸神，將全身火砲齊發的「究極制裁 Grand Punisher」大絕招完美立體化出來。
雷龍王現正接受預購，預計 2018 年 1 至 2 月上市，參考零售價為 12,960 円，折合約 HK$905，經香港官網買則只需 HK$840。雖然仍然比之前五盒裝的大獸神貴成倍，但作為系列最終作，有儲開的朋友實在沒有錯過的理由！
