文：本香猛
作為 Marvel Studios 本年度首部電影，《Marvel 隊長》未上已經話題多多，一時話女主角 Brie Larsons 唔夠靚女，一時又話預告打阿婆有歧視廢老之嫌，但無論上映前評價如何，北美預售成績超過對家《神奇女俠》已是事實。而所謂「三軍未動糧草先行」，各式玩具也準備就緒，包括日本 BANDAI SPIRITS 的 S.H.Figuarts 可動人偶。
S.H.Figuarts x Marvel 隊長全高 150mm，比早前由 Hot Toys 發表的 1:6 作品要細得多，但比例與舊有 Marvel 角色的 SHF 人偶一樣，儲齊一套更具隊型。用料是 ABS 混合 PVC，並通過全身塗裝還原紅藍配色的戰鬥服，眼肉看帶有仿皮質感，星星圖案、壓紋線條，以及前臂和膝蓋的護甲都相當帥氣，細節毫不馬虎，奄尖玩家無得投訴。
相比起來，人偶頭雕就令人失望，雖然保留了女主角的國字口臉及左眼旁的美人痣，但依舊是「面目全非」，軟膠頭亦細節欠奉。反而供替換的頭盔 Look 神似度更高，跟足原著塗有金屬紅及藍色，並頂上雞冠頭，霸氣非常。SHF 最大優勢是可動性，今次亦然，關節遍布全身，胸腹位更是分件處理，飛天遁地 Pose 難佢唔到。配件包括握拳、開掌兩隻替換手，另有兩個透明仿特效配件，數量唔多，但角色本身拳腳交居多，無理由送枝槍畀你啩﹖
S.H.Figuarts x Marvel 隊長現已接受預訂，價錢為 6,480円（約 HK$454），2019 年 3 月 30 日發貨。
