【新車試駕】Model S 轉會 Model 3 有著數？！車主親自話你知

文：Vincent

不得不承認受社會氣氛影響底下，零售市場銷情每況愈下，汽車銷售當然也大受影響！然而，正當以為每間車行的銷情都同樣慘淡之際，Tesla 就正正在這個冰河月份交付近 400 多部新車，全歸功於新車 Model 3。而除了新買家購入新車之外，更有前 Model S 車主為它而轉會過來，到底有甚麼吸引之處？

其實 Tesla Model 3 在香港一共推出了三個版本，分別是賣性能的「Performance」、入門的「Standard Range Plus」，以及長續航的「Long Range」。而今次試駕的，則是 0 至 100 公里只需 3.4 秒的 Performance 版。有別過往，今次試駕的新車並不是車行提供，反而更有意思是車主 Chris 由 Model S 轉會過來，由他評論 Model S 與 Model 3 相信最公正不過！

▲Chris 由 Model S 轉會至 Model 3，有不少驚喜。

現年 34 歲的 Chris 從事廣告行業，近年更自資設立公司，加入「老闆」行列，當然要有部「老闆用車」才合身份。莫看 Chris 年紀輕輕，除了事業有成之外亦早已成家立室，所以買車除了合心水之外，還講求日常實用性。Chris：「同一般男仔冇分別，其實喺 21 歲時就考咗牌，之後一直揸私家車為主，由日本 Honda Civic 至德國 Audi A5，大概揸咗車 10 年。至於 Tesla 就差唔多揸咗 4 年，而平衡過幾方面之後，我上年決定入手 Model 3。」

▲車頭無孔洞的流線設計，使 Model 3 的風阻系數僅有 Cd=0.23。

▲碳纖尾翼為 Performance車型專屬，讓平淡的車尾變得活躍。

▲港版 Performance 車型搭載 20 吋鋁圈。

▲車頂需有特大天窗，但隔熱能力相當強。若使用手機 App 還可遠端預先開啟冷氣。

設計仔細　車身小巧更助操控
以日常使用出發，Chris 直言 Model 3 的實用性比 Model S 還高！「Model 3 對我嚟講可以話係第二個世代嘅 Tesla，唔單只內外都有新鮮感，就連大屏幕嘅反應都比 Model S 快得多！其次係儲物空間，除咗車頭車尾之外，車內中間位置仲多咗個雜物箱，好適合似我有小朋友嘅家庭。」

其實除了儲物空間，Model 3 也有好多細位比 Model S 來得細心！後座和車頭廂都有掛勾方便掛上物件；座椅角度比 Model S 為傾斜，令坐姿變得舒適，而車身尺寸比例更適合華人駕駛。

在訪問當中，Chris 曾表示最欣賞是 Model 3 全新的頭尾設計，比起 Model S 小巧更具靈活性。而當試駕 Model 3 過後，令 Chris 感覺出最大差別的是懸掛設定。其實 Model 3 的懸掛早已備受讚賞，一致好評比 Model S 更為穩定。Chris：「Model 3 車身明顯係比 Model S 短，所以操控上會比較放心同埋更靈活，不過有啲唔慣嘅係所以司機需要到嘅資訊都放咗喺司機左手邊而唔係正中間，呢樣係要習慣一下，總體上我都係覺得 Model 3 好玩、抵玩啲！」

▲全車配備 4 個泊車鏡頭，泊車時提醒司機四周環境。

▲Model 3 其實是部中型房車，車長 4690mm。

▲B 柱也內置錄像鏡頭，用作 Autopilot 電腦運算。

▲車頭位置的行李廂也能透過手機 App 開啟。

▲雖然車尾行李廂容積略小，但底板仍有深度充足的置物槽。

轉會 Model 3 基於高性價比　否認「降 Grade」
Tesla Model S 和 Model 3 其實定價與定位都截然不同，由 Model S 轉會到 Model 3 身邊總會有朋友覺得「降 Grade」、走回頭路，但作為兩代車車主的 Chris 就有另一種看法。Chris：「單睇車價，可能會覺得降 Grade，又或者冇轉車嘅必要，但當試過 Model 3 就令我發覺係兩個世代嘅產物，Model 3 好多位都造得比 Model S 細心，除咗之前講過 Model 3 嘅電腦比舊 Model S 運算得更快之外，Model 3 嘅加速表現、續航力亦追近 Model S 甚至更佳，加上操控靈活，以價錢嚟睇，Model 3 其實更化算。」

▲全車座位以厚棉製造，車室質感用料也達豪華車水平。

▲Model 3 的音響部份合共 14 顆喇叭。

▲門邊印有 Model 3 字飾件。

▲Model 3 車身偏短，原裝倒後鏡足以應付日常。

▲車門同時設有電子、機械式開門鍵，後者為備用以防電子零件損耗。

Model 3 車主條款不同　「Supercharging」需單次收費
Model 3 換入鋼材物料來製造部份車身，除了令成本大幅下降之外，相比起 Model S 全鋁製車身，維修成本同樣降低。Model 3 有別 Model S，在使用「Tesla Supercharging」服務時將需要逐次計算充電費，電費以每度電 HK$2.9 收費，以 Performance 性能版為例，由 0%-100% 計算每次充電大約需要 HK$220 左右，續航力為 530km，大約每公里HK$0.42。而 Model S 則大部分都可享受永久免費的「Tesla Supercharging」服務。對於經常用車的司機而言，無疑二手的 Tesla Model S 會更化算。

Tesla Model 3 已陸續在交付給車主，實際車價約港幣 $30 萬至 $38 萬，連同稅項車主大約需繳付 HK$472,500 至 HK$632,500。如果以「一換一」計劃（2021年3月31日前以舊私家車取消登記，亦即叫「劏車」），最高減免25萬首次登記稅後，只需要33萬便可以購入入門級的Model 3 Standard Range Plus。而街外的二手 Model S 則是 25 萬至 65 萬不等，兩者價錢相若，你又會怎考慮？

▲中控台 15 吋屏幕為 Model 3 的控制主幹，可操控全車功能。